IES Castelao

O 10 de xuño de 2024 foi un día ben especial no IES Castelao. Paula Carballeira visitou o noso centro. E aínda que non era a primeira vez, de seguro, que desta volta non foi coma as anteriores. 

Pola mañá atendeu o alumnado de 1º de Bacharelato e mais do Club de lectura A pé de obra, que leu a súa obra As alumnas, último Premio Nacional de Teatro. Confesoulles como construíu a obra tras unha encomenda da compañía de teatro onde traballa. Nótase que é unha das mellores contacontos galegas, pois mantivo a súa atención en todo momento. Afondou na historia real que agocha a trama e no importante que é para ela representar este texto. Ao finalizar a sesión, un grupo de alumnas entrevistaron a Paula para a revista do IES, que moi pronto poderedes ler. 

Álbum: Curso 2023/2024 -> Encontro con Paula Carballeira

O pasado luns 27 de maio o alumnado de 3° PDC fixo unha visita a Santiago de Compostela. En primeiro lugar foron ao Observatorio Ramón María Aller onde puideron descubrir os misterios do universo e a historia do observatorio e os seus telescopios. Ademais o astrónomo José Ángel Docobo especialista en estrelas dobres, ensinoulles como observar a imaxe do sol de día.
Xa pola tarde, visitaron o Pórtico da Gloria na catedral e xa de paso aproveitaron para darlle unha aperta ao apóstolo.

Álbum: Curso 2023/2024 -> Visita a Santiago 3º PDC

Un ano máis volvemos visitar a Fundación Penzol, a que consideramos a nosa casa. O alumnado de 1º de Bacharelato achegouse ata a antiga casa do Concello para coñecer os fondos da biblioteca, as obras de arte que garda e ler a exposición dedicada a Luísa Villalta, homenaxeada nas Letras Galegas deste ano.
Queremos agradecer a ambilidade e o tempo do seu director, Xosé Manuel Soutullo.

Álbum: Curso 2023/2024 -> Visita á Fundación Penzol

Onte, 15 de maio, celebramos no noso centro o Día das Letras Galegas. Comezamos cun concurso poético-literario na nosa biblioteca, onde o alumnado gañador de cada aula tiña que recitar o seu poema diante dun xurado. A continuación tivemos o festival propiamente, onde homenaxeamos a poliédrica Luísa Villalta, a través da lectura da súa poesía e dunhas pinceladas biográficas con acompañamento do alumnado de música.

Tamén contamos coa inestimable participación das poetas Lara do Ar e Silvia Penas que recitaron obra propia e obra de Luísa Villalta. A parte festiva correu a cargo do alumnado de regueifas e do grupo de pandereteiras do centro.

Unha xornada ben bonita para dar pulo á nosa lingua!

Álbum: Curso 2023/2024 -> Festival das Letras Galegas 2024. Recitando a Luísa Villalta

No IES Castelao temos moita canteira de escritores. Co gallo das Letras Galegas, celebramos o II Certame literario As letras do Castelao. En homenaxe á autora deste ano, Luísa Villalta, as composicións foron poéticas e de temática libre. 

Álbum: Curso 2023/2024 -> II Concurso as Letras do Castelao

Durante o mes de abril contamos coa exposición Sorrisos por un mundo. O humor en Carlos Casares. Este traballo pretende, por unha parte, botar algo de luz sobre os distintos aspectos do humor tratando de responder preguntas de enorme interese: Que é o humor? Onde nace? Como é o humor noutras culturas? Cantos tipos de humor existen? Para que serve? Cal é a historia do humor en Galicia?

Álbum: Curso 2023/2024 -> Exposición sobre o humor. Carlos Casares

O venres 5 e 19 de abril, o alumnado de 1ESO A, 1ESO C e mais o grupo de alumnado de regueifas participaron nuns obradoiros impartidos polos grandes regueifeiros Pinto d’ Herbón e Luís o Caruncho. Estes obradoiros lévanse a cabo grazas á Concellaría de Normalización Lingüística do Concello de Vigo e finalmente frutificaron o venres 26, cando 14 regueifeiros e regueifeiras seleccionades nos obradoiros representaron o IES Castelao no Auditorio do CVC Valadares no Certame Escolar de Regueifas de Vigo. O resto do alumnado estará animando e desfrutando desde o público.

O alumnado de 1º de bacharelato, 4º ESO PDC e Club de lectura tivo unha xornada moi especial neste 25 de abril. Acudiron ata Celanova, o que significou a décima visita do instituto.

A saída comezou coñecendo a vila de Vilanova dos Infantes, descubrindo a súa historia a través da Torre da Homenaxe, a virxe do Cristal e o museo dos zapateiros.

Álbum: Curso 2023/2024 -> Saída a Celanova, terra de Curros e Celso Emilio

María Canosa visitou o IES Castelao para ter un encontro co alumnado de 1º da ESO, logo de ler a biografía que escribiu da autora homenaxeada nas letras galegas deste ano: Luísa Villalta. Melodías de palabras.

O encontro versou arredor do proceso de creación desta obra.

Álbum: Curso 2023/2024 -> Visita de María Canosa

O 21 de marzo, Día da Poesía, o alumnado de 4º PDC xunto a tres alumnos que recitaron doutros cursos, acudimos ao salón de actos da EOI de Vigo para participar na celebración que organizaban. Desfrutamos do coro da escola, ademais de lecturas, con e sen acompañamiento musical, en diversos idiomas tanto de alumnado coma de profesorado da EOI. Pola nosa parte, Xaime de 2º ESO B recitou: _No meio do camiño_ e Gael de 4º ESO A e Germán de 4º ESO B recitaron: __Diremos_, poemas de Luísa Villalta. Foi unha xornada enriquecedora e algún alumnado interesouse por estudar outras linguas.

Álbum: Curso 2023/2024 -> Día da poesía na EOI