O IES de Brión fará a I Solta de libros o día 16 de maio cunha alta participación do alumnado do centro.

Baseándose no concepto de ver o mundo como unha gran biblioteca global, o Bookcrossing, ou solta de libros, busca favorecer o intercambio gratuíto de lecturas. A actividade é concibida no IES de Brión como un xogo de intercambio de lecturas no que cadaquén pode liberar un libro para recoller outro. Poden participar alumnos, profesores ou persoal non docente. Cada participante liberará un libro en galego que previamente será rexistrado polo profesorado de Lingua Galega para contabilizar os libros que se mobilizan e levar un control sobre as lecturas.

A solta farase polas instalacións do centro para buscar a visibilidade dos libros e procurar o interese dos alumnado polo seu intercambio e a súa lectura. Faranse lecturas de textos de Xosé María Álvarez Blázquez, o autor homenaxeado polas Letras Galegas 2008.

O principal obxectivo é fomentar a lectura entre o noso alumnado favorecendo o intercambio de libros de xeito gratuíto.

Procúrase, así mesmo, achegar ao alumnado a valoración do libro como obxecto de interese non só a nivel cultural, senón tamén como agasallo estético ou riqueza persoal.

O pasado día 28 de febreiro, celebrouse no IES de Brión, un acto inaugural con motivo da apertura do novo centro, para os alumnos, ex-alumnos e profesores.
O acto contaba coa presenza de Mariña Álvarez Rei, profesora no instituto e unha excepcional escritora con obras publicadas e dous premios no seu haber.
Ela foi a encargada de presentar ao señor Víctor Freixanes, autor de varios libros narrativos e membro da Real Academia Galega.
O discurso de Freixanes estaba dirixido a Xosé María Álvarez Blázquez, xa que este ano se lle adica o día das Letras Galegas.
Durante o acto, o señor Freixanes falounos e comentounos aspectos da vida e da obra de Blázquez, e incluíu varias historias anecdóticas no seu discurso.
O momento máis emotivo foi cando Freixanes recitou varios poemas compostos e recollidos en libros de Álvarez Blázquez.
Logo, Mariña entregoulle un presente en nome da comunidade escolar.
O acto ramatou cunha gran ovación dirixida a Víctor Freixanes e déuselle as grazas por acompañarnos e poder contar coa súa presenza neste día.
Tamén lle agradecemos a súa asistencia a tódalas persoas que esa tarde quixeron acompañarnos.
Para todos nós, foi un día moi emotivo xa que nos reencontramos con antigos profesores e compañeiros e ademais, tivemos o grande placer de que viran este novo centro, polo cal todos loitamos, e aínda que eles non poidan disfrutalo, poden ter a satisfacción de que grazas ó seu esforzo este proxecto xa é unha realidade.

Cristina Labandeira, Elisa Bargo