O pasado 10 de febreiro os catro grupos de 2º de ESO  participaron ao longo da mañán activamente nun taller de estruturas. A actividade, organizada desde o departamento de Tecnoloxía, foi impartida polos membros do proxecto de divulgación "Camiños do futuro", co obxectivo de familiarizar ao alumnado co mundo da Enxeñería Civil.

No taller o alumnado experimentou o comportamento de estruturas e elementos construidos do seu  entorno, relacionándoas con conceptos básicos (forza, velocidade, desprazamento) e introducindo outros novos (como tensión, vibración, deformación) que se enlazaron con elementos da vida diaria como sismo, deseño, proxecto, edificios e pontes.

Día da Ciencia e Tecnoloxía en Galego no IES de Brión

O alumnado de 1º de Bacharelato de Tecnoloxía Industrial e Debuxo Técnico, foi premiado no concurso "Sensores 2019" convocado por Igaciencia e patrocinado polo Concello da Coruña. O xurado do certame recoñece con este premio a calidade do proxecto interdisciplinar "Visor estereoscópico de gráficos vectoriais interactivos", un visor de figuras, modelos e lugares que nos permite obter unha experiencia inmersiva de realidade virtual empregando o xiroscopio dun dispositivo móbil.

O acto de entrega de premios tivo lugar o pasado xoves 20 de xuño no IES Ramón Menéndez Pidal - Zalaeta da Coruña. Os alumnos Victor Sloth Sixto e Óscar Suárez fixeron unha breve presentación do proxecto e coñeceron os traballos premiados tanto na convocatoria "Sensores 2019" como en "Inventa en galego" por alumnado de toda Galicia.

O proxecto presentado á convocatoria foi evolucionando ata o final de curso, ampliando o repertorio de gráficos disponibles e creando unha páxina web coas versións para móbil e ordenador.

O alumnado implicado realizou unha pequena exposición cos resultados deste proxecto coa finalidade de difundilo entre o alumnado doutros niveis, que puideron desfrutar dunha experiencia inmersiva subindo por escaleiras virtuais, sobrevoando as Cíes ou adentrándose en moléculas de diferentes compostos.

Parabéns ao alumnado participante.

Accede a máis información:

Proxectos premiados de Sensores 2019, en Igaciencia.

Entregados os premios de Sensores, no Concello de A Coruña.

O alumnado de Tecnoloxía Industrial de 1º de Bacharelato participou o pasado 25 de abril na actividade O Core das TIC, proposta desenvolvida por Coremain e impulsada pola Axencia para a Modernización Tecnolóxica de Galicia (AMTEGA), dentro do Plan DigiTalent (Plan de Promoción do Talento Dixital de Galicia).

A proposta, que presenta o obxectivo de incentivar as vocacións STEM (Science, Tecnology, Engineering, Mathematics) entre o alumnado, permitiulles vivir en primeira persoa o día a día dunha compañía TIC, coñecendo a organización e metodoloxías de traballo e experimentar de maneira práctica as labores tecnolóxicas. Durante a mañá o alumnado tivo a oportunidade de empregar algunha das tecnoloxías que aplica o equipo técnico executando unha demo de automatización e de coñecer a linguaxe de programación dun proxecto para dotar de intelixencia a robots con membros do equipo I+D do proxecto.

Accede á nova en:

Código cero: Coremain mostra á rapazada como se traballa nunha empresa TIC

Coremain: Recibimos aos primeiros participantes en "O Core das TIC"

O día 25 de abril coincidindo co Día internacional  das rapazas nas TIC déronse a coñecer os premios de # Apuntas Tech?

I concurso #Apuntas Tech? do CESGA para potenciar as vocacións STEAM nas nenas.

Un grupo de alumnado de 3 ESO  B acadou o  premio de ACCESIT pola súa proposta RECOÑÉCEAS na categoría de secundaria.

RECOÑÉCEAS

Alumnado participante no concurso:

Coordinadores: Andrea Grille e Adan Maroñas

Colaboradores: Diana Cantorna, Carla Castro, Dakota Esparís,Yolanda Garcia, Marco Gualillo, Lara Guzmán e Iago Nieto, Paula Señorís

https://e-learning.cesga.es/ictgogirls/dia-rapazas-nas-tic/apuntastech/

O pasado venres 26 de abril un total de 56 rapaces e rapazas do noso instituto participaron na "V Competición de Robots da EEI" organizada pola Escola de Enxeñería Industrial de Vigo, na que se chegou ao milleiro de estudantes.

Nesta ocasión participou alumnado de 2º de ESO que cursa a materia de Introdución á Robótica, de 4º de ESO que cursa Tecnoloxía e de 1º de Bacharelato con Tecnoloxía Industrial, chegando tres equipos á final e acadando un dos grupos de cuarto un 5º posto entre un total de 58 equipos que competían na súa categoría.

Accede ás novas da Competición:

Un milleiro de estudantes na V Competición de robots en Vigo, na TVG

171 equipos participaron na Competición de robots da UVigo, en Código Cero.

O xoves 4 de abril, Eva Cernadas, profesora de Enxeñería Informática da USC e investigadora no CITIUS, impartiu a conferencia "Informática visual aplicada á Medicina e á Bioloxía" na aula de usos múltiples do instituto para alumnado de 1º A de ESO e 1º de Bacharelato de TIC. A profesora Eva Cernadas xa colaborara con parte deste alumnado cunha entrevista para a páxina web Luminísticas.

Eva Cernadas falounos de mulleres e homes relevantes na historia da Informática, de linguaxes de programación e programas informáticos, píxeles, resolución, e outras cuestións técnicas sobre imaxe. Finalizou a súa conferencia amosándonos programas creados por ela mesma para a análise de imaxes, que se aplican nos campos da Mediciña e a Bioloxía.

A continuación impartiu un obradoiro para o alumnado de Bacharelato no que profundizou nas aplicacións creadas por ela e insistiu na importancia de considerar as aportacións á sociedade deste tipo de proxectos. Afondou asimesmo nas linguaxes de programación empregadas para crealas, nas súas características e especificidades. Explicou diferentes proxectos nos que participou e  conversou co alumnado sobre metodoloxías de traballo no campo das TIC e da Ciencia en xeral.

Por outra banda, o pasado venres 29 de marzo, a profesora Susana Ladra, directora do Campus Innova da UDC impartiu a Charla Divulgativa "A nosa pegada dixital en internet: canto saben de nós e para que o usan" para o alumnado de 4º de ESO.

Ambas actividades están organizadas ao abeiro do proxecto "Elas nas STEAM" co que o IES de Brión participa no programa Rapazas Emprendedoras nas TIC do Plan Proxecta.

LuminísTICas, a proposta do IES de Brión para a 3ª edición de Wisibilízalas, ven de ser recoñecida co 2º premio na categoría Sénior.

O pasado día 8 de marzo, coincidindo co Día Internacional da Muller , déuse a coñecer o fallo do xurado na web oficial de Wisibilízalas, un certame convocado polo  Departamento ETIC da Universidade Pompeu Fabra.

Este traballo foi elaborado por alumnado de TIC I de 1º de Bacharelato Científico Tecnolóxico coa colaboración de alumnado de EPVA de 4º de ESO no apartado gráfico e deseño web.

En LuminísTICas publicamos perfís, entrevistas e referencias de mulleres galegas ou formadas en Galicia que traballan co sector TIC e participan activamente en proxectos de divulgación de mulleres nas TIC.

Grazas a Natalia Costas Lago, Eva Cernadas García, Ana Cidre Perry, Sonia Lois García, Carmen Cotelo Queijo, Laura Milagros Castro Souto, María Saez Fernández, Mercedes Rodríguez García e Miriam Pena Villanueva pola súa colaboración con este proxecto.

Parabéns ao alumnado participante!

.

O IES de Brión participa na 3ª edición de Wisibilízalas, unha convocatoria do Departamento ETIC da Universidade Pompeu Fabra que presenta os seguintes obxectivos:

• Xerar reflexión nos institutos sobre a menor visibilidade das mulleres en ciencia e tecnoloxía
• Dar visibilidade a mulleres que traballan no ámbito das TIC
• Potenciar as referencias femininas no ámbito da ciencia e da tecnoloxía

A convocatoria consiste na creación dunha páxina web que describa a carreira de mulleres contemporáneas que traballen no ámbito das TIC.

LuminísTICas é a proposta presentada polo alumnado de TIC I de 1º de Bacharelato Científico Tecnolóxico coa colaboración de alumnado de EPVA de 4º de ESO. O traballo consiste nunha páxina web na que publicamos os perfís, entrevistas e referencias de mulleres galegas ou formadas en Galicia que traballan co sector TIC e participan activamente en proxectos de divulgación de mulleres nas TIC.

Queremos expresar o noso agradecemento a todas as mulleres que participaron no proxecto.