O Concello de Pontedeume en colaboración co Centro de Saúde desenvolveu no noso IES un taller de soporte vital básico para o alumnado de 4º de ESO. 

O obxectivo centrouse en identificar se unha persoa está en situación de parada cardiorrespiratoria e, se así fose, realizar manobras de reanimación cardiopulmonar (RCP).

Á chegada á Escola de Camiños, Canles e Portos, había unha recepción no salón de actos aos 14 equipos participantes de centros de toda Galicia. Tras unha explicación por parte de Victor Barrientos, organizador e Xefe de Estudos da escola, os nosos dous equipos ("As Fragas" e "Eume") realizaron a primeira das probas consistente na construción dunha presa de materiais soltos con 1 quilo de arxila, 2 quilos de area e 2 quilos de grava miúda. Dispoñían dun máximo de 5 minutos para construíla con dous condicionantes, unha altura mínima e que filtrase a menor cantidade de auga posible. O equipo Eume, realizou unha gran proba aforrando moito material e cunha mínima filtración que o colocou nos postos dianteiros.

A continuación, repartíronse os equipos nas probas restantes entre as que había que construír a ponte de Leonardo Da Vinci con listóns de madeira, a resolución dun quebracabezas con seis imaxes de obras civís, a repartición de colectores entre cinco cidades mediante un camión teledirixido e a resolución dun xogo de simulación por computador de construción de pontes con diferentes materiais, onde os nosos dous equipos ocuparon as posicións máis altas da clasificación da proba.

Unha vez feito o reconto de puntos por parte da organización, o equipo "As Fragas" obtivo o segundo posto na Olimpíada. Pero o máis importante foi a convivencia con estudantes doutros centros e gozar dunha mañá onde puxeron en práctica o aprendido estas semanas, demostrando a súa capacidade de aprendizaxe, colaboración e compromiso co equipo.

Parabéns!

Hoxe tivemos a sorte de ter con nós a Xulia Lago. Esta ilustradora recibiu o Premio Castelao polo seu libro Nós Seis: nel, recrea a infancia da súa avoa, que tamén estivo con nós na biblioteca do IES Breamo, relatándonos como viviu a época franquista nun internado, como foi deixar Ferrol e tamén deixándonos unha bonita reflexión das dúas xeracións que se entrelazan no libro: avoa e neta.

Clases sen fume para os alumnos e alumnas de 1º e 2º de ESO. 

Estamos a desenvolver un programa, organizado polo Servizo Galego de Saúde en colaboración coa Consellería de Educación (Plan Proxecta),  de prevención do consumo do tabaco onde o alumnado e profesorado debe manter o compromiso de non fumar. Este programa trata de reforzar a confianza nun mesmo e nos demais, ao tempo que utiliza charlas e probas de “cooximetría” por parte de equipos sanitarios do SERGAS e diferentes concursos como incentivo.
O programa tamén dá a posibilidade de participar ás persoas do entorno familiar e así trasladar os beneficios de non facelo e de insistir na importancia dos "hábitos de vida saudables".

O alumnado de 1º de ESO participa en Ferrol nunha xornada mariñeira enmarcada dentro do programa creado pola Consellería do Mar “Ti si que es un bo peixe”, que ten por obxectivo principal coñecer os beneficios de consumir produtos do mar. 

As actividades realizadas serviron para que puidesen coñecer no porto os distintos tipos de embarcacións, artes de pesca e especies que se capturan. Tamén visitaron a lonxa local, onde comprobaron como é o proceso de primeira venda dos produtos pesqueiros e marisqueiros, como se celebra unha poxa e a importancia do etiquetado.

Tamén recibiron explicacións “in situ” ,na praza de abastos, para coñecer os diferentes tipos de peixe, crustáceos e bivalvos. 

Finalizaron a mañá cunha rica merenda Mariñeira.

No IES Breamo celebramos o día de Rosalía con lecturas de poemas, a proxección da curtametraxe "A rosa incandescente", e coa degustación do Caldo de Gloria.

A profesora de lingua e literatura galega no centro, Anxos García Fonte, é a guionista e produtora de A rosa incandescente, unha curtametraxe premiada no Aracnea Film&Book Festival de La Castellaneta, na Puglia (Italia).

Na presentación Anxos resaltou a Rosalía como a nosa poeta nacional, e que é unha das primeiras que escribiu e reivindicou con forza a lingua e a cultura do seu país deixándonos unha visión crítica da sociedade que lle tocou vivir.

“A rosa incandescente” é o nome dun proxecto que pretende devolvernos unha imaxe fresca de Rosalía de Castro. Ten dúas partes que se completan; por un lado unha curtametraxe na que Rosalía fala de si mesma e das razóns polas que escribe (diálogo directo co espectador e achegalo así a algúns dos aspectos fundamentais da súa vida e obra), e polo outro, unha unidade didáctica na que se amosa o proceso de elaboración da curta co sentido de comprobar a relación entre a linguaxe cinematográfica e a literaria. A profesora Anxos García Fonte é quen asina “A rosa incandescente” consciente de que a figura de Rosalía estase a revalorizar cada día.

Good Morning, benvidos e benvidas ao gran  entroido, a EumeWood 2023 no noso IES Breamo, o noso espectacular centro de ensino, onde podemos encontrar personaxes tan peculiares como vós e coma nós. Así comezaba o espectáculo o pasado venres 17 de febreiro.

Moitísimas grazas ao Concello de Pontedeume e á ANPA APERTA pola súa colaboración. 

O venres 10 de febreiro o alumnado de 1º de ESO asistiu á representación Tambores de paz da compañía de teatro Transeduca. Desprazáronse ata  A Coruña coas súas profesoras Ana Allegue, Cristina Fernández, Rosa Mourelle e Glafira Fernández-Campoamor. Ademáis de ver a  obra, que logo comentaron na clase, tiveron a oportunidade de manter un diálogo cos actores aos que lles fixeron todo tipo de preguntas sobre a súa traxectoria, sobre o texto e outros aspectos da representación. Foi un xeito distinto de acercarse á literatura, ao mundo do espectáculo en directo e a certos temas que nos preocupan a todos: os conflictos, a violencia, o amor e a amizade.

Esta semana o alumnado de 3º ESO tivo varias saídas á praia da Madalena organizadas polo Dep. de  Bioloxía. 

Acompañados de dúas persoas do CEIDA (Centro de Extensión Universitaria e Divulgación Ambiental de Galicia), que promove a educación ambiental en todos os sectores sociais, tiveron a oportunidade non só de recoller lixo, senón tamén de clasificalo. 

Recolleron ata 72 kg de lixo!

Hoxe tivemos unha nova charla dentro do programa de actividades de Divulgación da UDC.

A de hoxe, presentada por Manuel Francisco Herrador Barrios, "Tsunamis, terremotos e inundacións: a Física no cine de  catástrofes", foi dirigida ao alumnado de 4° de ESO.

Interesante, divulgativa e moi entretida.