Taboleiro

O luns 3 de xuño de 2024, tivemos a visita de Ramón, traballador social da Consellería de Política Social e Xuventude, que organizou un obradoiro para o alumnado de 3º, 4º, 5º e 6º de Primaria.

Os nenos e nenas participaron en varios xogos cooperativos que pretendían mesturar diversión, valores do voluntariado e da solidariedade e recordar todas as actividades en relación co proxecta de "Voluntariado miúdo: móvete" que se realizaron ao longo deste curso. Ao final da actividade, recibiron un diploma pola súa xenerosa participación nas accións solidarias realizadas dende o centro.

Este ano celebramos as Letras cunha xincana e con varios xogos de escape sobre a vida e a obra da autora homenaxeada, e escritora, música e profesora Luísa Villalta.

O alumnado de Primaria fixo unha xincana percorrendo o centro, na procura da información agochada sobre a escritora coruñesa. Mentres, o alumnado de Secundaria realizou varios xogos de escape en liña onde aprenderon unha chea de datos relevantes sobre Luísa Villalta.

Sobre estas liñas tedes unha imaxe dos intrépidos investigadores de 5º e 6º, tomada cando ían percorrendo o centro na procura da información agochada sobre a autora homenaxeada neste Día das Letras 2024.

O pasado mércores, 15 de maio de 2024, celebramos o Día das Familias co noso alumnado de Infantil e Primaria.

Os cativos e as cativas prepararon unhas saborosas madalenas caseiras que levaron para a casa nunha bolsa decorada con agarimo por eles/as mesmos/as.

O alumnado da ESO estivo dous días de excursión en Mondoñedo, os días 24 e 25 de abril de 2024.

O primeiro día, os rapaces e rapazas entraron na cova do Rei Cintolo (a máis grande de Galicia, con case 6 km de lonxitude).

Unha experiencia inesquecible!

Despois de pasar a noite no albergue do Seminario, a rapazada visitou o museo da imprenta e a continuación realizou unha ruta literaria e histórica, seguindo as pegadas do autor mindoniense Álvaro Cunqueiro e do mariscal Pardo de Cela.

Aproveitamos esta entrada na nosa web para agradecerlle a Félix Villares Mouteira que nos mostrase a magnífica biblioteca do Seminario de Santa Catalina e as xoias que conservan; e tamén a Fernando López, que nos guiou na visita ao Museo da Imprenta.

O luns 15 de abril visitamos a Residencia "Nosa señora do Socorro" de Arnoia para unha xornada de convivencia cos nosos maiores. O alumnado de primaria e ESO cantaron unhas cancións tradicionais animando aos usuarios da residencia e organizaron distintos xogos (de mesa, de lanzamento, de retos...) que tiveron moi boa acollida.

Quedamos moi agradecidos/as, especialmente co persoal da residencia que se implicaron no desenvolvemento de todas as actividades.

Ademais, tivemos a oportunidade de gozar das vistas dende o mirador e de xantar e xogar no centro social de Arnoia para rematar esta xornada.