Hoxe, 21 de maio, comeza o prazo para a presentación de solicitudes do Fondo solidario de libros de texto e as axudas para adquirir libros e material escolar.

Como presento a solicitude? 

• De xeito electrónico (unha solicitude individual para cada fillo/a): a través da aplicación fondolibros empregando a Sede electrónica. É preciso identificarse con Chave365 ou DNI electrónico.
• Presencial con asistencia da aplicación: cubrindo os datos na aplicación e imprimindo os Anexos I e II para presentación na Administración do centro.
• Presencial manual: cubrindo os anexos a man e presentándoos na Administración do centro.

Qué documentación teño que presentar?

• Anexo I e II cubertos e asinados.
• Copia do libro de familia.
• Sentenza ou convenio regulador (se separación ou divorcio).
• Se é o caso, a especificada no artigo 11 da convocatoria.
  
• Se hai oposición á consulta: DNI, NIE, acreditación de discapacidade expedida pola Xunta, acreditacións de pensión por incapacidade.
• Se non se marca o consentimento expreso para a súa consulta: declaracións de IRPF.

Toda a documentación deberá ser válida e eficaz no momento da súa presentación e reflectir a situación persoal, familiar e económica a 31 de decembro de 2022 agás cando unha sentenza de separación ou divorcio posterior atribúa a custodia exclusiva a unha das persoas proxenitoras, nos casos de violencia de xénero e nos casos de falacemento dalgunha das persoas proxenitoras. 

A administración poderá reclamar a presentación de documentación cando non sexa posible a verificación por vía telemática. 

Información sobre o procedemento

Onde presento a documentación se aínda non estou matriculado no centro?

O alumnado que non estea admitido nin coñeza en que centro vai estar escolarizado no curso escolar 2024-2025, deberá presentar a solicitude no centro no que está matriculado no curso 2023-2024.

Para dúbidas e consultas:

• Teléfono 881 880 447.
• Correo electrónico: administracion.ceip.vicente.otero@edu.xunta.gal
• Presencialmente en administración no horario:

             luns a venres: 9:30 - 11:00h e 12:30 - 14:00h 

             luns: 15 - 17h

Informamos que hoxe, 14 de maio, publicáronse as listaxes definitivas de alumnado admitido e excluido no noso centro para o próximo curso.

Onde se consultan?

De xeito presencial no taboleiro do centro ou telemáticamente na aplicación admisionalumnado (identificándose con chave365 ou certificado electrónico).

Cal é o seguinte paso?

Seguindo a Orde do 21 de outubro de 2022, o alumnado admitido ten que facer a matrícula no noso centro educativo do 20 ao 30 de xuño de 2024. No caso de non formalizar a matrícula enténdese que renuncian ao posto adxudicado. 

Reclamacións contra a listaxe definitiva

Ábrese un prazo de un mes (do 15 de maio ao 15 de xuño) para formular recurso de alzada ante a Xefatura Territorial da Consellería competente en materia de educación.

Informamos que hoxe, 25 de abril, publicáronse as listaxes provisionais de alumnado admitido e excluido no noso centro para o próximo curso.

Onde se consultan?

De xeito presencial no taboleiro do centro ou telemáticamente na aplicación admisionalumnado (identificándose con chave365 ou certificado electrónico).

Reclamacións contra a listaxe provisional

Seguindo a normativa, ábrese un prazo de 5 días hábiles para reclamacións (ante o Consello escolar) que serán resoltas coa publicación da listaxe definitiva o 15 de maio.

A semana pasada tivemos reunión do Consello da Infancia para poder tratar diferentes temas que tiñamos pendentes, entre eles falamos de cousas como a festa de fin de curso, a xestión dos xogos do patio... Ademais, nesta sesión eleximos o logo que representará o noso Consello da Infancia. Para isto cada aula levou algunha proposta e entre as nenas e nenos representantes votamos e eleximos o noso logo gañador.

Estes foron todos os logos participantes:

E, finalmente o logo máis votado foi o da aula de 1ºB de Educación Primaria!!!

Ademais, modificamos e aprobamos os estatutos que publicaremos proximamente e tomamos decisións que remataremos de perfilar o próximo mes!

O vindeiro martes 23 de abril, Día do libro, contaremos no centro coa experta en literatura infantil e xuvenil e profesora da Universidade de Santiago de Compostela, Montse Pena Presas. Falaranos de por que é importante "dar de ler" como forma de acompañar ás nosas nenas e nenos na súa infancia e compartirá algúns libros e lecturas cos que alimentarnos dende os primeiros anos.
Paralelamente, para que as familias poidades conciliar e asistir á charla, haberá unha actividade lúdica para as nenas e nenos.
Deixámosvos o cartaz con toda a información. Non volo perdades!

Infórmase que xa rematou o prazo de entrega voluntaria de documentación para baremar e, seguindo o artigo 35.2 da Orde do 21 de outubro de 2022 que regula a admisión, o próximo 25 de abril publicaránse as listaxes provisionais de admitidos e excluidos no CEIP Plurilingüe Vicente Otero Valcárcel tanto no taboleiro de anuncios do centro coma na aplicación admisionalumnado.

En cumprimento da nova lei educativa estatal, este curso está previsto en todas as comunidades autónomas a realización das probas da avaliación de diagnóstico para o alumnado de 4º curso de Educación Primaria e 2º curso de Educación Secundaria Obrigatoria. No caso de Galicia, terán lugar os próximos días 10 e 11 de abril.

Este venres día 5 de abril ás 16h faremos unha reunión informativa sobre o procedemento, aínda así, podedes atopar máis información no seguinte documento elaborado pola Consellería de Educación:

AVALIACIÓN DE DIAGNÓSTICO 23/24 de CEIP Plurilingüe Vicente Otero Valcárcel