Benvidos/as á Web do CEIP Plurilingüe das Vendas da Barreira!

O VI Concurso de Cabazas de Samaín foi todo un éxito! Queremos felicitar a tódolos/as participantes pola súa incrible creatividade. A calidade dos traballos presentados nesta edición superou tódalas expectativas, amosando unha vez máis o talento que hai entre o noso alumnado e familias.
Parabéns a Ada, Mía e Ysabella por resultar gañadoras nesta edición.

Unha boa nova máis! E é que fomos escollidos para participar no programa de formación Observa_Acción. E sabedes o mellor? SOMOS O ÚNICO CENTRO DA PROVINCIA SELECCIONADO!!!

Dominar a arte do ensino leva tempo e require práctica e esforzo sostido. A observación e a reflexión son ferramentas esenciais na carreira profesional docente.

Pero de que estamos a falar?

O programa Observa_Acción ten como finalidade fomentar o desenvolvemento profesional nas Competencias Profesionais Docentes para a cooperación e colaboración, a construción conxunta de coñecemento, a internacionalización das organizacións e o liderado e xestión de centros, a través do intercambio de boas prácticas e a observación entre iguais.

ANO I: Fase Autonómica. Desenvolverase ao longo do curso académico 2024/25 entre os meses de novembro e xuño e será de carácter obrigatorio para todos os centros participantes. Esta fase constará de dúas etapas:

• Etapa Comparte: Desenvolverase no propio centro educativo.
• Etapa Acolle: Desenvolverase con outros centros da comunidade galega.

Unha vez máis estamos de parabéns pois concedéronnos tres dos catro programas de innovación educativa que solicitamos.

Pero... que é o Plan Proxecta+?

O Plan Proxecta+ é unha iniciativa da Consellería de Educación, Ciencia, Universidades e Formación Profesional, en colaboración con diferentes organismos, dirixida a fomentar a innovación educativa nos centros a través de programas educativos que promovan o traballo cooperativo, interdisciplinario e competencial, pero que ademais estean comprometidos coa consecución dos obxectivos de desenvolvemento sostible da Axenda 2030.

Este curso traballaremos os seguintes:

-Vexo, vexo Xacobeo: Que ten como obxectivo achegar ao alumnado os valores do Xacobeo e do Camiño de Santiago.

-Protexe os animais: Este programa consistirá en desenvolver un proxecto que fomente o respecto na protección dos animais domésticos e asente valores fundamentais na tenza responsable de mascotas.

-Donas de si: Desenvolveremos un proxecto relacionado coa visibilización e empoderamento das mulleres como pezas fundamentais do desenvolvemento da sociedade galega.

O pasado 24 de outubro o alumnado de 2º a 6º de Educación Primaria participou con entusiasmo na carreira de Campo a Través en Tintores, unha actividade enmarcada no programa Xogade. O programa Xogade ten como obxectivo promover a actividade física e os valores deportivos. Este evento deportivo reuniu a alumnado de distintas idades e centros educativos da comarca.

Mía, de 2º de Educación Primaria, clasificouse quedando segunda. O seu esforzo foi evidente mentres corría con determinación ao longo do percorrido. Esta vitoria non foi só motivo de orgullo para Mía senón que tamén é un exemplo inspirador para os seus compañeiros/as.

Parabéns a Mía e a todo o alumnado pola súa participación e esforzo!

O pasado martes 22 de outubro, para conmemorar o Día das Bibliotecas que se celebra o 24 de outubro,  tivemos o privilexio de recibir a Sabela Gago, que compartiu connosco a súa paixón polos libros a través dun contacontos que deixou a tódolos/as presentes fascinados.

A visita de Sabela non foi tan só unha oportunidade para gozar dunha boa historia senón tamén un recordatorio da maxia que pode ofrecernos a lectura.

A través do seu entusiasmo e imaxinación amosounos como os libros poden ser portas a mundos descoñecidos, onde as palabras cobran vida e as personaxes como Felipe e Felipa convértense en novos compañeiros/as de aventuras. Unha vez máis... grazas Sabela!