A semana pasada remataron os obradoiros de pandeiretas, tanto de iniciación coma de perfeccionamento. Aproveitando a véspera do día das Letras Galegas celebramos un mini concerto durante o recreo. Moitas grazas a todos e todas por participar, esperámosvos o curso que ven!

Se queredes ver e escoitar as cancións non dubidedes en pasarvos polo blogue ValesMusical.

Publicada no DOG a orde que regula a participación no fondo solidario de libros de texto e pola que se convocan axudas para adquirir libros de texto e material escolar.

Para ver a orde publicada, prema na imaxe.

O 3 e 4 de maio celebrouse o I Congreso Aliméntate ben no pazo de congresos de Santiago de Compostela. Unha iniciativa da Consellería de Cultura, Educación e Ordenación Universitaria, en cooperación coa Consellería de Sanidade, coa Consellería do Mar, coa Consellería de Medio Rural e a Escola Galega de Consumo, e en colaboración con Sogama e a USC.

O día 3 de maio o noso proxecto, xunto con outros nove centros de infantil e primaria, foi seleccionado para participar e contar o que facemos entre todos/as no cole.

A experiencia foi marabillosa. Gustounos moito poder contarlle a compañeiros e compañeiras doutros centros, autoridades, e a quen pasara polo noso stand o proxecto de "Almorzos con xeito" que comezamos este ano en primaria, para continuar o bo labor que xa está instalado en Infantil.

Que o noso traballo sexa considerado para recibir un accesit ao mellor proxecto de infantil e primaria danos folgos para seguir traballando nesta liña. Esperemos que esta iniciativa continúe e teñamos a posibilidade de acudir ao II Congreso o vindeiro ano.

                                                                                            PARABÉNS PARA TOD@S!!!!!

Nenos e nenas de 2º de Educación Primaria foron de excursión a Aldea Nova. Alí aprenderon a coidar as plantas, os animais e fixeron diferentes obradoiros, como a elaboración de candeas. Aquí tedes unha mostra do ben que o pasaron!

Nenos e nenas do colexio asistiron a Gandarío á exhibición do traballo que realiza a Garda Civil. Alí viron, aprenderon e experimentaron cos distintos medios e recursos dos que dispoñen tanto a garda civil, protección civil,... para desenvolver o seu traballo.

Varios niveis do colexio fixeron un roteiro por Betanzos. Os nenos e nenas puideron coñecer un pouco máis o lugar onde vivimos e tamén se mergullaron na Idade Media da man dos técnicos de turismo do Concello. Moitas grazas!!

O pasado venres celebrouse unha nova edición da Carreira Solidaria "Corre por Betanzos 2018" na que participaron nenos e nenas dos coles e institutos de Betanzos. Cada participante colaboraba na carreira donando comida para Cáritas e Cruz Vermella. Moitas grazas a todos pola vosa colaboración e participación!

Esta semana os pequenos bufóns de 3 aniños recibiron a visita de Mere, o papá de Álvaro dos amarelos, para que aprenderan o oficio de titiriteiro. Moitas grazas pola exhibición!!

APRENDENDO A SER BUFÓNS on PhotoPeach

Dentro do Proxecto Documental Integrado sobre a Idade Media que estamos a levar a cabo no cole, os nenos e as nenas de 6º de Infantil visitaron o castelo de San Paio de Narla en Friol. Trátase dun castelo-fortaleza do século XII. Alí, na compaña de distintos persoaxes medievais, visitaron o museo histórico e etnográfico e realizaron un obradoiro no que aprenderon a facer unhas rosquillas boísimas!