Skip to Content

ADMISIÓN DE ALUMNADO 2020-21: LISTAXE PROVISIONAL

Dom, 07/06/2020 - 13:55 — admin

Xa está publicada a relación provisional de alumnado admitido e non admitido neste centro para o vindeiro curso: 

4º Ed. Infantil: Todas as peticións admitidas.

5º Ed. Infantil: Unha petición, non admitida por non haber vacante.

1º Ed. Primaria: Dúas peticións para unha vacante. Despois de ser baremadas, unha é admitida e outra non é admitida por non haber vacante. 

2º Ed. Primaria: Unha petición, admitida.

As listaxes pódense revisar presencialmente no taboleiro de anuncios do centro ou na aplicación admisionalumnado, mediante certificado dixital ou chave365. Contra esta relación ábrese un prazo para posibles reclamacións de TRES días hábiles, do 8 ao 10 de xuño, inclusive, a presentar na secretaría deste centro no horario habitual. 

A listaxe definitiva publicarase antes do 25 de xuño.

A formalización de matrícula será do 1 ao 10 de xullo.

 

AXUDAS LIBROS DE TEXTO E MATERIAL ESCOLAR 2020-21.

Mar, 19/05/2020 - 15:29 — admin

Estimadas familias:

A Consellería acaba de publicar a Orde que convoca as axudas de libros de texto, fondolibros e material escolar para o vindeiro curso.

O prazo vai desde o 20 de maio ao 19 de xuño, incluidos.

As solicitudes presentaranse preferentemente de xeito telemático nos seguintes espacios web en dito prazo:

Fondolibros (Para cubrir a solicitude)

Chave365  (Para entregala, xunto ca documentación aportada)

Dadas as excepcionais circunstancias que estamos a pasar, de non ser posible facelo por internet, tamén se poderán presentar na Secretaría do centro, solicitando CITA PREVIA no teléfono 881 880 214 ou escribindo a ceip.sanxose.obreiro@edu.xunta.es

O HORARIO DE ATENCIÓN será de 9:30 a 12:00 horas.

Se fose preciso, nese horario pódese vir recoller (sen cita) a solicitude para poder presentala posteriormente (con cita). Para calquera outra cuestión chamade ou escribide.

Solicitude de axudas libros, material escolar e fondolibros.

Circular informativa 

NOTA: O alumnado de 6º de Primaria deberá facer a solicitude no IES PASTORIZA ou no instituto que sexa admitido.

APERTURA DO CENTRO PARA SOLICITUDE DE MATRÍCULA

Mér, 06/05/2020 - 09:37 — admin

 

NOTICIA IMPORTANTE SOBRE A ADMISIÓN DE ALUMNADO:

Segundo os novos acordos do Centro de Coordinación Operativa da situación de emerxencia sanitaria de Galicia,  o vindeiro luns, 11 de maio, reanúdase o prazo para solicitudes de admisión (Só para alumnado de novo ingreso). 

Recoméndase encarecidamente facer a presentación telemática . Pode facelo AQUÍ. (a partir do luns)

En todo caso, o Colexio volverá abrir a partir de dito día baixo as seguintes condicións:

  • O novo prazo de entrega de solicitudes será do 11 ao 18 de maio ambos inclusive.
  • A documentación a presentar será a que se indica neste apartado.
  • O horario de atención será de 10:00 a 13:00 horas, na secretaría do colexio. (Aquelas persoas que xa presentaron a solicitude non teñen que volver a facelo).
  • A presentación de documentación acreditativa do baremo (no seu caso) será ata o 26 de maio. (En caso de dúbida, recoméndase entregala do 11 ao 18 de maio)
  • As listaxes provisionais de alumnado admitido e non admitido publicaranse antes do 8 de xuño.
  • As posibles reclamacións terán lugar do 9 ao 11 de xuño no horario antes indicado, tamén na secretaría.
  • A publicación das listaxes definitivas realizarase antes do 26 de xuño.
  • Por último, a formalización da matrícula será do 1 ao 10 de xullo.

A información e as datas anteriormente descritas atópanse na Resolución da Consellería de Educación do 7 de maio.

NORMAS BÁSICAS DE ACCESO AO COLEXIO

  1. Só se atenderá unha persoa de cada vez na secretaría.
  2. Deberán seguir as indicacións do conserxe na entrada, e manter distancia de seguridade con outras persoas que se poidan atopar no recinto.

NOTA IMPORTANTE: O colexio abrirá desde o luns 11, e co persoal imprescindible, exclusivamente para atender a este proceso de  admisión de alumnado.

Para o resto de consultas ou trámites, por favor, chamar ao  teléfono 881 880 214 ou escribir  ao correo ceip.sanxose.obreiro@edu.xunta.gal

TERCEIRO TRIMESTRE. ADAPTACIÓNS DAS PROGRAMACIÓNS PRIMARIA.

Lun, 13/04/2020 - 18:59 — admin

ACTUALIZACIÓN DE MAIO: PROGRAMACIÓNS DO 3º TRIMESTRE

Dadas as especiais características deste trimestre, as programacións dos cursos foron modificadas para adaptarse á nova situación, seguindo instruccións da Inspección Educativa.

Estas son as modificacións realizadas en Educación Primaria para o terceiro trimestre:

1º curso.                     2º curso.                   3º curso.

4º curso.                     5º curso.                   6º curso.

 

Estimadas familias, estimados nenos e nenas:

Hoxe damos comezo ao terceiro trimestre con un montón de incertidumes xa que de momento, como sabedes, toca seguir confinados. Nesta situación tan extraordinaria que nos toca vivir, agardamos que vos atopedes ben de saúde, que é o máis importante.

Comentámovos que, seguramente igual ca vós, estamos impacientes por saber como se van artellar o traballo escolar e a avaliación, tanto deste trimestre como do curso completo. Todo apunta a que probablemente haberá unha decisión neste senso a finais de semana así que, en canto teñamos noticias, farémosvolo saber.

Mentres tanto, tal e como nos comunican desde a Consellería, continuaremos co repaso, reforzo e recuperación do traballo desenvolvido ata o momento.

Unha aperta moi cordial e moito ánimo, que xa queda menos!!

AVISO E ENTREGA DAS NOTAS DA 2ª AVALIACIÓN

Xov, 02/04/2020 - 12:34 — admin

Estimadas familias, queridos nenos e nenas:

Comunicámosvos que  temos a intención de chamarvos por teléfono (é posible que vos apareza con nº oculto) ao longo dos días de hoxe e de mañá, para interesarnos por vós e saber como vos vai despois de tantos días de confinamento. Como sabedes o día 3 de abril darían comezo as vacacións polo que aproveitamos tamén para dicirvos que os boletíns de notas estarán dispoñibles desde a app  abalarMóbil a partir das dúas da tarde dese día. A avaliación está feita con remate o día 14 de marzo, último día de clase efectiva.

Quen non teña a aplicación terá que descargala antes seguindo as indicacións desta páxina. No caso de que vos dea erro, solicitádea no correo do centro ceip.sanxose.obreiro@edu.xunta.es ou tentade comunicar co centro no 881 880 214 ou no 623 22 75 23, desde onde tentaremos axudarvos. Se non fose posible, entregaranse cando se poida, ao rematar a cuarentena.

Saúdos e moito ánimo para que se acabe pronto isto e poidamos volver vernos pronto!

AVISO IMPORTANTE DO CONCELLO

Lun, 30/03/2020 - 14:52 — admin

Desde o Departamento de Servizos Sociais do Concello infórmannos que están a disposición de todas as familias que o precisen no 690067041 ou nos seguintes teléfonos:

UNHA MENSAXE DE TODO O PROFESORADO!

Xov, 26/03/2020 - 16:11 — admin

Queridos nenos e nenas:

Pronto se cumplirán 15 días desde que se decretou o estado de alarma e queremos felicitarvos polo ben que o estades facendo, axudando na casa e  facendo os deberes que vos imos poñendo. Infelizmente, isto aínda non acabou. Agora ven a parte máis difícil, quedan outros quince días máis e por iso queremos mandarvos unha mensaxe moi importante para que nos se vos esqueza: 

                                             QUEDA NA CASA! 

Porque ese é o mellor xeito de axudar a todas as persoas que non poden facelo por nós: á xente que nos atende e mantén funcionando os supermercados, panaderías, etc, aos repartidores, transportistas, forzas de seguridade e, sobre todo, á máis importante: o persoal sanitario, a quen lles aplaudimos todos os días por como se están xogando a vida. Ánimo, xuntos podemos conseguilo. Aquí vai o noso aplauso para vós!!

NOVIDADES

Dom, 15/03/2020 - 18:00 — admin

DÍA 23 DE MARZO

Como sabedes, o estado de alarma vai ser prorrogado outros 15 días máis, sentímolo pero é necesario para ganarlle ao virus. Nós imos seguir traballando e axudando quedando na casa, ese vai ser o noso traballo máis importante e o noso mellor xeito de axudar. Mentres tanto, seguiredes a ter as actividades no curso correspondente. Saúdos e moito ánimo a todos e todas!!

 

DÍA 17 DE MARZO

Algunhas familias fixéronnos chegar que teñen problemas con algunhas das actividades que están en flash porque non dispoñen de ordenador ou prefiren facelas co teléfono móbil. Se este é o voso caso, a solución é descargar unha app desde google play chamada PUFFIN WEB BROWSER, un navegador que permite visualizalas correctamente. O malo é que ten anuncios, sentimos as molestias.

Lembrade que estamos á vosa disposición no tfno. 881880214 (horario de 10 a 13 horas) ou no correo ceip.sanxose.obreiro@edu.xunta.es a calquera hora. Moito ánimo!!

 

 

DÍA 16 DE MARZO:

Estamos tendo moitos problemas para as actividades nesta web, xa que se colapsa continuamente. Agardamos poder facelo ao longo do día. 

Se precisades comunicarvos con nós, podedes usar o correo electrónico do centro: ceip.sanxose.obreiro@edu.xunta.es. Procuraremos atendervos o mellor que poidamos.

DIA 15 DE MARZO:

Consecuentemente co que determina o Real Decreto que establece o estado de alarma, o proceso de matrícula queda suspendido. 

Tamén queda suspendido polo mesmo motivo o horario de atención ao público xa que non haberá profesorado no centro.

Aproveitamos de novo para transmitirvos moitos ánimos para pasar estes días. Unha aperta moi forte!!

INSTRUCIÓNS RECIBIDAS PARA ESTES DÍAS DE PECHE DO COLEXIO

Ven, 13/03/2020 - 13:53 — admin

Estimadas familias,

Como sabedes, todos os colexios permanecerán pechados tanto para as actividades lectivas como para madrugadores, comedor, transporte, etc. desde o vindeiro 16 de marzo por un tempo de 14 días naturais, debido ao Coronavirus Covid19.

Durante este tempo, convén ter en conta as seguintes instrucións provisionais nos acaba de pasar a Consellería:

1. O prazo de presentación telemática e presencial de solicitudes de admisión amplíase e finalizará 1 semana despois do reinicio das clases. Recoméndase a utilización preferente da modalidade telemática para a presentación das solicitudes. O centro unicamente abrirá as portas estes días para tal efecto, de 10:00 a 12:00 horas.

2. O profesorado irá colgando na páxina web do centro, no curso e materia correspondente, as actividades a realizar polo alumnado no domicilio. Ditas actividades é preferible realizalas no horario matinal e poden ir variando ao longo destes días.

3. O profesorado fará, dentro das súas posibilidades, un seguemento das actividades realizadas, titorizándoas de xeito telemático, nunca presencial, e tentarán axudar e resolver as posibles dúbidas por correo electrónico.

Lembrade que estas medidas son provisionais e teremos que estar atentos ás noticias que se vaian producindo. 

Desexámosvos moita sorte para que todo esto pase rápido e poder volver a vernos o máis axiña posible.

Un saúdo moi cordial do equipo directivo e de todo o profesorado do centro!

AVISO MOI IMPORTANTE!!

Xov, 12/03/2020 - 10:19 — admin

ACABAMOS DE RECIBIR AGORA MESMO, ÁS 14:00 HORAS, O SEGUINTE COMUNICADO DA INSPECCIÓN EDUCATIVA:

"Dacordo co informado hai uns intres polo Xefe do Servizo de Inspección e, segundo o comunicado en rolda de prensa polo Presidente da Xunta, suspéndense as actividades lectivas nos centros educativos de Galicia oficialmente o luns 16/03/2020, e de xeito recomendable a partir de mañá 13/03/2020.
Para calquer información adicional consultar a páxina web da Consellería de Educación."

 

Polo tanto, as familias que así o prefiran, poderán enviar aos seus fillos e fillas mañá venres día 13 de marzo ao centro, pero a partir do luns 16 xa non haberá aulas.

 

Distribuir contido


by Dr. Radut