Un dos nosos obxectivos e concienciar ás futuras xeracións da importancia de coidar o medio ambiente. Neste senso, este curso programáronse diversas actividades como unha excursión á praia de Esteiro para recoller lixo, que tivo lugar en marzo, ou unha saída á praia de Xilloi coa asociación Nordés, que se realizará en xuño e da que pronto vos informaremos con detalle. 

Nesta mesma liña, o obxectivo deste reto é fomentar a creatividade e conciencia ambiental das nenas e nenos, a través da elaboración de artesanías coas súas familias utilizando materiais de refugallo.

O desafío consiste en elaborar unha artesanía que teña unha función práctica ou decorativa, utilizando material de refugallo. A idea é que os participantes transformen materiais que normalmente se consideran lixo en algo útil e/ou fermoso.

Os materiais  poden ser moi variados, dende botellas de plástico, cartón, papel, latas, ata téxtiles, madeira, entre outros. A creatividade dos participantes non ten límites, poden utilizar os materiais que teñan á súa disposición na casa, na escola ou na súa comunidade.

Duración do desafío: aproveitando que o 8 de xuño é o Día Mundial dos Océanos, escóllese ese día como data límite. Nestas semanas, os participantes poderán elaborar as súas creacións e traelas ao colexio onde se irán expoñendo. 

Todos os participantes recibirán un pequeno agasallo ao finalizar o reto.

Estamos desexando ver as vosas obras de arte!

Lembrade que estes retos son sempre voluntarios e teñen a principal finalidade de facer que nenas e nenos pasen tempo realizando actividades creativas e divertidas coas súas familias.

Este sábado tivemos unha intensa xornada de formación sobre radio escolar no CFR Ferrol. 

Isidoro Valerio (Radio Voz), Luis Pardo (Cadena Ser) e Denís Losada (Rede Espora) amosáronnos todas as posibilidades da radio escolar como ferramenta didáctica, ensináronnos a configurar o equipamento, a elaborar guións e secuencias radiofónicas... Ata gravamos o noso propio podcast! 

Estamos impacientes por transmitir ao alumnado todo o aprendido e poñer a radio escolar en marcha! 

A pegada da chuvia no refraneiro galego é inmensa. A sabiduría popular deixounos frases como "En abril, augas mil" ou "Cando chove e vai sol, anda o demo por Ferrol".

Neste reto, tedes que recompilar ditos populares sobre a chuvia, a neve, a sarabia, o arco da vella ou o tempo meteorolóxico en xeral.

Para compartilos, usade o novo Padlet. Non é necesario engadir ningunha imaxe, soamente escribir a vosa frase no espazo do "asunto" e enviar.

E lembrade tamén que o reto fotográfico do arco da vella segue activo todo o curso.