Erasmus +

Os mestres de Educación Física Pablo e Martín viaxaron ata Liubliana, a capital de Eslovenia, onde na escola de Vrtec Trnovo realizaron unha observación das prácticas pedagóxicas, aprendendo sobre novos métodos innovadores de ensinanza e familiarizándose con diferentes técnicas sobre como achegar a contorna da escola á aprendizaxe así como introducir o coñecemento e o coidado do medioambiente nas actividades do día a día. Esta actividade forma parte do noso proxecto europeo "Our eco-school is blooming".

Aprenderon sobre o proxecto deste centro, “Work with a puppet” e a súa metodoloxía, así como a integralo no proceso educacional, observando e participando na aprendizaxe por descubrimento.

Tamén foron de excursión ao castelo da cidade co alumnado. Foi unha experiencia moi valiosa, para repetir no futuro e continuar traballando xuntos!

O pasado mes de febreiro fixemos unha actividade de Orientación no Parque de Castrelos co alumnado de 5º de Primaria co obxectivo de coñecer as especies vexetais do parque e fomentar a práctica de exercicio no exterior.

O alumnado realizou un percorrido polo parque atopando unha serie de balizas nas que había un conxunto de preguntas relacionadas coa flora do parque e o coidado do medio ambiente.

Esta foi a última sesión da unidade didáctica integrada sobre Orientación e Medio Ambiente, relacionada á vez co noso proxecto Erasmus+ “Our eco-school is blooming”. Participaron os mestres de Educación Física, os titores de 5º de Primaria e as mestras de Eslovenia participantes no noso intercambio. Que ben o pasamos!

A semana pasada visitáronnos Mateja e Gordana, dúas mestras de infantil de Eslovenia, dentro do noso proxecto Erasmus+ "Our eco-school is blooming". Coñeceron os proxectos do noso cole, viviron o Entroido e tamén nos ensinaron moito sobre a súa cultura! E ata viñeron con nós de excursión a Coruña! 

Grazas á Teachers for Future Spain por difundir a nosa experiencia de liberar libros polo medio ambiente na súa páxina web. Seguimos traballando para mellorar o noso cole e o medio ambiente! Podedes leela clicando AQUÍ.

Este Nadal o noso cole tivo unha decoración moi eco-friendly grazas á colaboración das familias e ao traballo de Carmen. Grazas a todos por seguir axudando ao noso proxecto e a coidar do planeta! Cada xesto conta :)

Como cada Nadal, intercambiamos postais realizadas polo noso alumnado cos nosos colexios socios do Erasmus+, Vrtec Trnovo en Eslovenia e o Rizario Kindergarten en Grecia.

No primeiro trimestre xuntamos tódolos plásticos xerados no recreo durante unha semana enteira, tirámolos no patio e intentamos recollelos nun minuto de tempo. Como comprobamos, non foi unha tarefa fácil. Aprendimos grazas á páxina de Teachers for Future canto duran os nosos desperdicios na natureza.

Queremos seguir coidando o noso Planeta!

Xa podedes atopar na entrada do colexio o noso punto Bookcrossing, onde intercambiaremos libros. Podedes coller os que queirades e deixar os que xa non utilicedes. Animádevos a participar! 

O noso Centro xa forma parte da rede RECREOS RESIDUOS CERO, un programa da plataforma Teachers for Future Spain, polo que animamos e motivamos ao noso alumnado a que nos seus almorzos e merendas non haxa residuos ou polo menos, o mínimo posible. Podedes acceder a máis información, clicando AQUÍ. Xuntos podemos logralo!