A Asociación General de Consumidores presenta esta web a modo de xogo educativo interactivo para contribuír á prevención da obesidade infantil.

A través de múltiples opcións, o xogo vai informando aos nenos e nenas sobre a importancia que teñen os alimentos que comen para a súa saúde, crecemento e desenvolvemento. Dentro do xogo, creáronse dúas guías, unha para os pais e outra para os nenos e nenas, nas que se repasan os principais conceptos sobre dieta saudable e actividade física: importancia de realizar 5 comidas diarias, composición máis adecuada das comidas e repaso da pirámide alimentaria.
Esta proposta está dirixida a nenos e nenas de entre 8 e 13 anos de idade.

A Asociación Galega de Cultura Científica e Tecnolóxica (AGCCT) presenta o programa "Divulga na Escola", a través do cal achega aos centros unha completo listaxe dos principais divulgadores de ciencia e tecnoloxía de Galicia. Esta listaxe creouse coa finalidade de pór en contacto a divulgadores cos centros de ensino e facilitar así a busca de conferenciantes e actividades á medida de cada centro.

Nesta listaxe pódese atopar:

• Nome e contacto do divulgador.
• Unha descrición da actividade.
• Os materiais necesarios.
• Se está condicionado ou se ten custos económicos.

Acaba de ser presentada por parte do Instituto Nacional de Tecnoloxías Educativas e de Formación do Profesorado (INTEF) e do Centro Nacional de Desenvolvemento Curricular en Sistemas non Propietarios (CeDeC) a nova versión da ferramenta de autor eXeLearning. A ferramenta ofrece facilidade, sinxeleza, estabilidade e usabilidade para a creación e reutilización de contidos educativos dixitais.

A principal novidade que incorpora esta versión é independencia do navegador Firefox, podendo ser utilizada co navegador predeterminado do equipo. Ademais, melloráronse as opcións de exportación para a tradución de contidos a través de XLIFF e incluíuse a posibilidade de persoalizar a listaxe de iDevices. eXeLearning é Software Libre e sae totalmente traducida ao galego.

Para información máis detallada sobre a aplicación e as novidades desta versión 7, pulse aquí.

A Sociedade Galega de Medio Ambiente (Sogama) pon a disposición da comunidade educativa tres novos recursos para traballar as temáticas da reciclaxe e a sostibilidade.

Caderno Verde

En primeiro lugar, lanza o portal Caderno Verde, un espazo dixital dirixido aos niveis de Educación Infantil e Primaria que organiza actividades arredor duns personaxes, "Os amigos de Vilaverde". Estas actividades queren xunguir as boas prácticas medioambientais co ensino curricular desde unha perspectiva de transversalidade.  ada ficha dos amigos de Vilaverde está pensada como material de axuda para as aulas do primeiro ciclo de primaria e abranguerán as grandes áreas de coñecemento desta etapa educativa. Ademais, o Caderno Verde inclúe os eco-contos da familia Trebón, destinados á etapa da Educación Infantil, así como diversas actividades en liña e descargables.

Xogo xigante dos residuos

Este recurso percorrerá os 16 centros escolares adscritos ao programa educativo “Recíclate con Sogama”, encadrado dentro do Plan Proxecta e busca contribuír a incrementar as baixas porcentaxes de reciclado en Galicia, habida conta da notable influencia que os escolares teñen sobre o resto da poboación, constituíndo un interesante vehículo canalizador das boas prácticas ambientais.

O obxectivo último é que a separación de residuos se incorpore á rutina da comunidade educativa como un hábito máis, imprescindible para posibilitar o reciclado. Para isto, os centros foron dotados con contedores específicos (recipientes ecolóxicos de cores, de 120 litros de capacidade cada un, aptos para a recollida selectiva de envases lixeiros -envases de plástico, latas e briks-, papel/cartón e restos non reciclables), cos que se pretende que a comunidade educativa incorpore á súa vida diaria a axeitada segregación de desperdicios como un hábito máis de cara a garantir o seu posterior reciclado

A través do xogo o alumnado poñerá a proba os seus coñecementos sobre o principio dos tres erres, é dicir, como reducir a produción de refugallos, como alongar a vida útil dos produtos a través da reutilización e como reciclar axeitadamente os materiais para que estes sexan transformados en novos produtos, posibilitando así un considerable aforro económico e de recursos naturais.

O xogo da reciclaxe

A pretensión desta iniciativa é poñer a proba os coñecementos que o alumnado de idades comprendidas entre os 6 e os 12 anos ten sobre a xestión e tratamento dos residuos, ao tempo que se lle conciencia sobre a necesidade de poñer en práctica o principio dos tres erres (reducir, reutilizar e reciclar).
Dada a súa dimensión lúdica, considérase que, con este formato, o alumnado poderá interiorizar as boas prácticas ambientais coas que permitir a posterior transformación dos refugallos en recursos de utilidade.
Proclamarase gañador o equipo que chegue á meta tras superar un circuíto de probas nas que, nun período limitado de tempo, terá que dar boa conta dos seus coñecementos, pero tamén das súas habilidades e destrezas na mímica, o debuxo e a axilidade mental.

Os materiais e as instrucións para levar a cabo esta actividade pódense descargar na páxina web de Sogama.

Xa está accesible en castelán un resumo do estudo de Eurydice: "Developing Key Competences at School in Europe: Challenges and Opportunities for Policy", publicado o pasado O 19 de novembro de 2012.

Este documento recompila as principais políticas nacionais dirixidas ao desenvolvemento das Competencias Básicas ou Clave nos centros escolares de Europa. Recoñece os progresos acadados ata o momento na incorporación das Competencias Básicas nos sistemas educativos, así como os retos políticos relacionados coa forma na que a educación contribúe a satisfacer as demandas cambiantes no relativo ás Competencias Básicas: mellorar o rendemento na alfabetización lectora, matemáticas e ciencias; aumentar o número de graduados en matemáticas, ciencias e tecnoloxía; e proporcionar máis apoio na adquisición de competencias como a emprendedora, a cidadá e a dixital. O estudo abarca os niveis de educación obrigatoria de 31 países europeos (Estados Membro da UE, Croacia, Islandia, Noruega e Turquía) e toma como referencia o curso 20011/2012.