O IES Monte Carrasco nace no curso académico 1998-99, para dar resposta ás necesidades de escolarización da poboación estudantil de 12 a 16 anos da parroquia de Darbo do concello de Cangas, trala entrada en vigor da LOXSE.
O IES Monte Carrasco é froito da transformación dun centro de Educación Primaria, construído no ano 1986 para acoller ao alumnado de 6 a 12 anos, excedente do ámbito de influencia do CEIP “San Roque”, único centro da zona que acollía ao alumnado de Educación Primaria.
O centro localízase no lugar de San Pedro, parroquia de Darbo, no concello de Cangas, que se atopa no extremo suroeste da península do Morrazo, en pleno corazón das Rías Baixas.
O centro está situado no denominado “Monte Carrasco”, de onde toma o seu nome, nunha zona rica en legados prehistóricos, en concreto, petróglifos, e atópase a unha distancia duns catro quilómetros do centro urbano.
A parroquia de Darbo, contorna xeográfica e social do alumnado que escolariza o centro, está situado no centro do termo municipal de Cangas, sendo a máis poboado do mesmo. Ten unha tendencia clara ao aumento de poboación, pois nos últimos anos algunhas zonas da mesma estanse a converter en áreas residenciais do propio municipio e do propio Vigo.