Complementarias

O luns 19 de xuño o alumnado de 4º, 5º e 6º de Educación Primaria participou no Programa Vexo Vexo Xacobeo dentro do Plan Proxecta do noso centro.

Este programa educativo multidisciplinar achega ao alumnado o significado e os valores do Camiño de Santiago e do Xacobeo e traballa estes conceptos que forman parte da súa contorna social e cultural e consta dun conxunto de actividades que mostran a riqueza do patrimonio cultural e natural do Camiño de Santiago, e traballa os valores que o definen como son o esforzo, a solidariedade, a hospitalidade e o respecto polas diferenzas.

Temos que agradecer a colaboración da Agrupación de Protección Civil e, en especial a Manel e Vicente e ao Concello de Riós pola súa colaboración para a posta en marcha desta xornada de aprendizaxe fóra da escola.

"Santiago non é a fin do camiño, senón o principio."

Paulo Coelho

Un estupendo día pasaron os alumnos e alumnas de Educación Infantil e 1º de Educación Primaria o pasado 15 de xuño no Centro de Ocio ACOUGO situado en plena natureza, no Concello de Vilamarín (Ourense).

Foron moitas as actividades realizadas: tiráronse pola tirolina, construíron cabanas, pasearon en barca por un lago cun crocodilo, descubriron e déronlle de comer aos animais (galiñas, parrulos, galos, cabras, ovellas...), practicaron o equilibrio no slackline e xogaron e gozaron da natureza nun día especial e lúdico no que compartiron a ledicia de estar e xogar todos xuntos.

Sen dúbida unha xornada inesquecíbel!

O xoves 18 de maio recibimos a visita de Rosa, hixienista da Área Sanitaria de Ourense, Verín e o Barco de Valdeorras.

Os hixienistas dedícanse á prevención de enfermidades bucodentais tanto realizando tratamentos coma exercendo de educadores sanitarios en cuestión de hixiene oral e hábitos alimenticios relacionados coas patoloxías orais.

O alumnado do CEIP Plurilingüe das Vendas da Barreira realizou este obradoiro, Mira que boca, no que aprendeu os hábitos de saúde e alimentación axeitados como son o comer verduras, carne, peixe e reducir o consumo de lambetadas e bebidas con azucre.

Rosa ensinounos como debemos limpar os nosos dentes e a nosa lingua.

Ao final, fixémolo tan ben que nos obsequiraron cun diploma e un debuxo.

Pasámolo xenial!

O pasado venres 14 de abril o alumnado de 4º, 5º e 6º visitou InnovArt 2023 na Cidade da Cultura de Santiago de Compostela, un evendo que dá a coñecer o potencial das ensinanzas artísticas, deportivas e de idiomas a través de exposicións e de actividades interactivas de baloncesto, fútbol sala, vela, estampado en tea, creación de chaveiros de metacrilato, animación Stop Motion, set de fotografía, modelaxe sobre manequín, obradoiros de danza e concertos en directo, entre outros. Aquí tedes un pequeno resumo da xornada.

O pasado 8 de marzo celebramos o Día Internacional da Muller. No centro fixemos homenaxe a algunhas delas e para iso contamos cunha visita moi especial.

Esther, Hercilia, Mónica, Salesa e Sara  participaron nun obradoiro do CIM Conso-Frieiras no que elaboraron unhas “fofuchas”. Estas grandes artistas amosaron ao noso alumnado quen era a súa boneca e como loitou pola igualdade.

Co obxectivo de dar visibilidade e recoñecemento a unhas mulleres que destacaron en diferentes campos como a pintura, a física, a tecnoloxía,... faláronnos de mulleres como Clara Campoamor, Marie Curie, Rosalía de Castro, Malala Yousafzai, etc. Mulleres que fixeron aportacións moi significativas e que ao longo da historia, co seu talento, esforzo e actitude conseguiron deixar pegada.  E aínda que foron verdadeiras protagonistas na ciencia, na historia ou na sociedade do seu tempo, a gran maioría delas traballaron na sombra, practicamente invisibilizadas, ou no mellor dos casos, subestimadas pola sociedade na que lles tocou vivir. Políticas, escritoras, científicas, activistas, pintoras... a lista é innumerable.

Grazas a Natalia da Cruz Vermella, ao CIM de Conso-Frieiras e a estas grandes mulleres que compartiron unha xornada tan interesante connosco.