O pasado venres 27 de outubro o alumnado de 5º e 6º de Educación Primaria, acompañados polos nosos compañeiras e compañeiros do CEIP Rosalía de Castro de Xinzo de Limia, realizamos unha visita guiada á Xunta de Galicia e ao Parlamento dentro do programa “Coñece as túas institucións”.
O obxectivo desta actividade é que o alumnado poida coñecer de primeira man o funcionamento do Parlamento e da Xunta e comprenda a separación de poderes propia das democracias.
No edificio do Parlamento explicáronlles a composición actual do Parlamento e as súas funcións. Ademais, visitamos dúas das tres plantas do edificio onde puidemos observar todas as obras de arte (máis de 300 pezas) que constitúen unha auténtica sala de exposicións de artistas galegos de tódolos tempos.
Agradecer a presenza e a compaña do Parlamentario de Xinzo de Limia Carlos Gómez Salgado, quen respondeu a todas as nosas preguntas e curiosidades sobre esta institución.
Posteriormente, dirixímonos á sede administrativa da Xunta de Galicia no Edificio San Caetano. Alejandra explicounos que este edificio tivo outros moitos usos (escola de nenos xordos, hospital e ata cárcere) antes de converterse na sede do noso goberno autonómico. Visitamos as instalacións onde traballan máis de 3000 persoas e convertémonos por un día, primeiro nos secretarios xerais técnicos e logo nos conselleiros das distintas consellerías, aprendendo de que ámbito se ocupa cada unha delas no noso día a día.
