Un curso máis o CEIP de Arzúa participa no Programa de Bibliotecas Escolares Solidarias nas modalidades de: Colaboración coa biblioteca escolar e Ler con... D (é dicir, de lecturas compartidas dentro do centro). Este curso contamos cun grupo de 10 colaboradores e colaboradoras de 5º de E.P. que o venres 18 de decembro se estrearon no seu labor compartindo unha lectura co alumnado de 5 Anos A e B. O libro escollido foi "Monstro Rosa", de Olga de Dios. Trátase dun album infantil que nos fala da diversidade, de respectar a identidade de todas as persoas por moi diferentes que sexan, e tamén da importancia de crear unha sociedade onde todos teñamos cabida. Este conto reforza o valor de crer en nós mesmos e de respectar a nosa identidade aínda que esta choque coa do conxunto da sociedade.

Despois de contarlles o conto, os biblioaxudantes e os nenos e nenas de 5 Anos reflexionaron sobre a historia, as personaxes e as ensinanzas que se poden extraer do mesmo; e remataron cantando a canción de "Monstro Rosa", un canto á diversidade, ao diferente, a encaixar e facer amigos onde cada un sinta que é o seu mundo e poida ser el mesmo.

Na realización desta actividade adoptáronse todas as medidas de protección e hixiene que a situación de crise sanitaria, pola COVID-19, require.

Para finalizar, dar as grazas ao alumnado de 5 Anos A e B e aos voluntarios e voluntarias, por regalarnos momentos tan fermosos e mensaxes tan esperanzadoras.

Grazas e Boas Festas!

O CEIP de Arzúa quere felicitarvos o Nadal "agasallándovos co seu mellor sorriso", que é a proposta do alumnado de 3ºA para a celebración das vindeiras festas.

Os equipos de Dinamización Lingüística e Biblioteca sumámonos á mesma, e engadímoslle unha interesante selección de libros para que tamén poidades celebrar o Nadal, cun bo libro nas mans. Lembrade que en tempos de pandemia, nos que se ve mermada a nosa actividade social, os libros son excelentes compañeiros que nos axudan a combater o aburrimento.

   PREME AQUÍ

Bo Nadal e saúde para todo o alumnado do CEIP de Arzúa e as súas familias. 

 PREME AQUÍ

Deixámosvos aquí outro modelo máis sinxelo para os máis pequenos e pequenas do colexio e animámosvos a escribir en galego a carta que lle ides enviar aos Reis Magos. 

Este curso 2020-21 poderemos gozar destes espectáculos no noso colexio:

- Actuación musical a cargo de Gloria Mosquera e Tomi López de Mamá Cabra. Representación do espectáculo "Patrimonio natural". 

- Representación dun espectáculo de narración oral a cargo da compañía de teatro "Galeatro" de Carballo. 

O  Concello de Arzúa vén de concedernos unha subvención ao CEIP de Arzúa destinada ao EDLG que nos permite financiar estas actividades.

O 17 de decembro de 1999, a Asamblea Xeral das Nacións Unidas designou o 25 de novembro como o Día Internacional da Eliminación da Violencia contra a Muller. 

Desde o CEIP de Arzúa queremos aportar o noso granciño de area na sensibilización e denuncia sobre a violencia contra as mulleres no mundo. Sabemos que entre as claves para traballar contra a violencia de xénero está a educación na igualdade e no respecto ás diferenzas e aos dereitos humanos. Por iso, baixo o lema: "Nós traballamos por un mundo no que haxa...", fixemos unha serie de actividades que agora vos presentamos, co obxectivo de contribuír a un necesario cambio social no que, os nosos nenos e as nosas nenas, xa convertidos en homes e mulleres, vexan cumpridos os seus soños de igualdade, liberdade, diálogo, empatía, confianza e respecto. Actitudes todas elas importantes para erradicar a violencia de xénero da nosa sociedade. 

Este é o mural colectivo que se fixo coa axuda de todas as titorías do colexio.

Para colaborar co CIM de Arzúa elaboramos este vídeo, no que participou un neno ou nena representando a cada titoría de E. Primaria.

Queremos mostrarvos a continuación diferentes actividades levadas a cabo no noso centro; traballos realizados a partir dos libros de lectura, películas escollidas para traballar esta temática do 25 N, murais...

   3 ANOS

  4 ANOS -A   

   5 ANOS -B 

 1º A e B 

 3º A  

  4º A

  5º A

 6º A

O Día Universal dos Nenos e Nenas celébrase o 20 de novembro, desde que na Asemblea Xeral da ONU se aprobou a Declaración dos Dereitos do Neno/a en 1959. É un día de celebración, pero sobre todo é un día para chamar a atención sobre os dereitos da infancia e concienciar ás persoas da importancia de involucrarse no seu benestar e desenvolvemento.

No noso colexio fixéronse moitas actividades para celebrar esta conmemoración e aquí deixamos unha pequena mostra delas:

Grazas á oferta cultural do Concello de Arzúa, o noso centro puido gozar do espectáculo "Cousas de 4" que a compañía Odaiko representou no salón de actos do colexio. Asistiron a esta actuación, no primeiro pase, o alumnado de 1º, 3º e 4º de E. Primaria e, no segundo pase, os nenos e nenas de 3 anos e 4 anos A e B de E. Infantil.

Chegou o outono e trouxo da man dúas festividades moi nosas: o Magosto e o Samaín.

Este curso tan especial non puidemos celebrar o Magosto todas e todos xuntos como nos gustaría,  pero fixemos outras cousiñas nas nosas aulas. 

O mural colectivo confeccionouse coas follas e castañas que decorou o noso alumnado de E. Infantil e despois, o de 1º, 2º e 3º de E. Primaria buscou refráns da castaña para encher outras follas máis grandes. Os maiores escribiron cantigas dentro das siluetas das castañas, que ademais acabaron decorarando e quedaron así de ben.

No pdf que vai a continuación podedes ver outras actividades que se levaron a cabo en todo o colexio: colares feitos con castañas cocidas (os zonchos típicos da nosa zona), manualidades do outono, faroles de Samaín... O teatro de sombras que ensaiaron os nenos e nenas máis pequenos do colexio vainos servir de portada para amosarvos o resto dos traballos. 

  PREME AQUÍ

O 29 de outubro a compañía de teatro "Galeatro" de Carballo veu representar ao noso centro a súa obra "O camiño da lingua".

Acompañamos a Xan, o seu protagonista, nun concurso no que el participaba para levar o gran premio final. Para iso tiña que superar unha serie de probas relacionadas co Camiño de Santiago, coa cultura e a literatura galegas. O alumnado do noso cole axudoulle a Xan a conseguir ese premio resolvéndolle moitas dúbidas que se lle presentaban nas diferentes probas. 

Por mor da situación epidemiolóxica que estamos padecendo, vémonos obrigados a reducir o aforo do salón de actos e fixemos dous pases. No primeiro estivo o alumnado de 2ºA E.P, 5ºA E.P e 6ºA E.P.

O segundo pase foi máis curto e o desfrutou 5 anos-A, 5 anos-B e 1ºB E.P. 

Esta obra de teatro formaba parte da programación das Letras Galegas do curso pasado, pero non se puido realizar no mes de maio porque estabamos confinados. Foi financiada polo Concello de Arzúa. 

Aquí vos deixamos unha selección das últimas novidades editoriais para que este verán descubrades nelas o voso novo libro favorito. Estas vacacións tanto se ides á praia, á montaña ou vos quedades na casa, buscade un tempo para desfrutar da lectura e relaxarvos. Lembrade que ler é unha actividade placenteira e que ademais mellora a vosa habilidade de lectura e amplía o voso vocabulario. Ler é moi saudable e recomendable, así que xa sabedes: "Este verán mergúlladevos entre letras para nadar entre soños". Feliz verán de lectura e aventura para todas e todos!

FAI CLICK NA IMAXE PARA VER AS PROPOSTAS DE LECTURA.

Este ano, o CEIP de Arzúa celebrou a semana das Letras Galegas dun xeito diferente. Desde as súas casas, o noso alumnado foi achegándose á figura do escritor homenaxeado este ano, Ricardo Carvalho Calero, coa axuda dos xogos, vídeos, páxinas web e demais medios postos aos seu alcance.

Algúns quixeron participar nesta pequena homenaxe a este escritor e profesor ferrolán que nos deixou un gran legado enviándonos un dos seus traballos.  Deixámosvos aquí o que nos fixeron chegar. 

As nenas e nenos de Infantil traballaron o conto "As pitas baixo a choiva" e na aula de 4 anos B fixeron este vídeo tan fermoso. Conseguiron que as súas pitas non se mollaran...!

 O alumnado da clase de 5 anos-A fixo esta composición tan orixinal con pitas e galos, que ben podería ser a portada dun libro. 

Este marcapáxinas de Iván González, de 5º E.P, vainos servir agora para presentar os debuxos de moitas nenas e nenos do colexio.

PREME AQUÍ

O vídeo de Ainara Carreira, de 6ºA, fálanos da vida de Carvalho Calero durante a Guerra Civil española. 

Marta, alumna de 6ºA, fixo con este vídeo un repaso dos estudos de Carvalho Calero.

 Chalís, alumna de 6ºA recita "Un cabelo de anxo" de Ricardo Carvalho Calero.

 O alumnado de 6ºB quixo facer un repaso da biografía do autor con estoutro vídeo.

Moitas grazas a todas e a todos pola vosa implicación. 

FELIZ DÍA DAS LETRAS GALEGAS!