O TEMPO MADE IN BUEU
DESCUBRIMOS OS MISTERIOS DA METEOROLOXÍA
Enviado por Macu Rodríguez o Mér, 19/06/2024 - 22:16Este curso aprendemos a traballar no eido da METEOROLOXÍA!
Durante unha semana tomamos nota das temperaturas, a presión atmosférica, a humidade, as precipitacións...
Fixémolo por partida dobre, en dúas épocas diferentes: entre xaneiro e febreiro e entre maio e xuño.
A primeira hora da mañá, antes de subir a clase, iamos á caseta meteorolóxica e tomabamos nota das medicións e, inmediatamente, nos dirixiamos ao PANEL DAS METEOESCOLAS que temos no corredor do BIBLIOCASTELO, para rexistrar a información.
Nas primeiras semanas de febreiro, cando chegou a primeira quenda, puxémonos mans á obra!! E para facelo, foi necesario aprender varios conceptos que para nós eran novos.
· TEMPERATURAS:
o MÁXIMA
o MÍNIMA
· PRESIÓN ATMOSFÉRICA
· HUMIDADE
· PRECIPITACIÓNS
ENCÁNTANOS ESTA TAREFA!!!
Entre a última semana de maio e a primeira de xuño, repetimos experiencia e volveu suceder algo parecido á ocasión anterior.
A finais de xaneiro e nos primeiros días de febreiro, as temperaturas foron moi altas para a época do ano e non choveu nin unha pinga.
Polo contrario, cando lles tocou axs compañeirxs de 1º B facer as súas medicións, as precipitacións foron moi abundantes; tanto, que houbo algún deses días nos que non puidemos saír a medir porque chovía moitísimo.
Encántanos esta actividade e sérvenos para reflexionar sobre o terrible problema do cambio climático.
Como ademais nos coincidiu coa celebración do DÍA MUNDIAL DA AUGA o día 22 DE MARZO e o DÍA MUNDIAL DO PLANETA, O 22 DE ABRIL, vimos varias curtametraxes na aula, LEMOS O CONTO DA “BALLENA LLENA” e gravamos na radio escolar un fermoso poema que compuxo a profe María Martínez para reflexionar sobre temas como o uso dos plásticos, a contaminación, o consumo de auga, a reciclaxe...
Entre a última semana de maio e a primeira de xuño, levamos a cabo a derradeira quenda deste curso e fixádevos que curioso; outra vez sucedeu que nos últimos días choveu máis que na semana anterior, igual que nas outras dúas ocasións!!
Temos que coidar o planeta e cumprir cos 3 R, reducir o consumo de plásticos, reutilizar e reciclar!!
PREMEDE NA IMAXE PARA VER O VÍDEO
METEOGALICIA E DIPLOMA EXCELENCIA
Enviado por Marta Valbuena o Dom, 17/11/2024 - 00:00O mércores 15 de novembro, dúas mestras da escola, foron a Santiago de Compostela ás xornadas de Meteoescolas. Alí ademais de recibir formación, foron obsequiadas co DIPLOMA DE EXCELENCIA polo proxecto do ano anterior e un agasallo: un termómetro de terra que finalmente instalouse nas hortas do colexio de Infantil para que os máis pequenos da escola teñan a posibilidade de medir a temperatura.
Moitas grazas a todo o Equipo de Meteogalicia polo recoñecemento e o agasallo!
REINICIANDO AS METEOESCOLAS NO CURSO 24/25
Enviado por Marta Valbuena o Mar, 17/09/2024 - 23:00Retomamos as Meteoescolas neste curso 2024/25 e como ao alumnado xa está moi afeito a observar o ceo, o 18 de setembro chegaron ao cole estranados por ter un ceo tan escuro sen haber nubes. Rapidamente foron preguntar ás mestras e descubriron que ese fenómeno era o fume do incendios de Portugal, que cubriron o ceo de Galicia e daba a sensación de estar vivindo un eclipse de Sol.
O grupo de 5ºA decidiu realizar unhas fotos onde se ve saír o Sol tras a montaña fronte á nosa escola e posteriormente posaron eles para lembrar ese día extraordinario.
Moito ánimo a Portugal e, non esquezades que se coidamos os nosos bosques, evitaremos o cambio climático!!!
Concurso Illas Atlánticas
Enviado por Susana Simoes o Mar, 25/06/2024 - 22:22Este curso traballamos moito, pero de todos os proxectos que fixemos hai un do que nos sentimos especialmente orgullosxs: o noso proxecto sobre o Parque Nacional das Illas Atlánticas.
Todo comezou alá polo 1º Trimestre, cando viñeron Suso e Bea, das Illas Atlánticas, a falarnos do parque nacional e dos seus ecosistemas. Logo, no segundo trimestre, aproveitando o traballo que xa levamos anos facendo na caseta meteorolóxica (do Proxecta Meteoescolas) introducímonos a estudar os climas. Isto permitiunos enlazar cos ecosistemas, centrándonos nos ecosistemas do PN das Illas Atlánticas. Podedes ver algunha foto a continuación dos traballos grupais e das presentacións que fixemos.
Decidimos presentarnos a un concurso que organizaba o PN das Illas Atlánticas, e creamos un Xogo de mesa: custounos chegar a un consenso e decidir como queriamos que fose o xogo, pero unha vez feito isto xa nos puxemos mans á obra: elaboramos un PASAAILLA. Ao estilo dun pasabalabra, co Plotter de corte e manualmente, elaboramos os taboleiros. Logo investigamos na biblioteca do centro, nos libros que trouxeron as profes e en interntet sobre os catro arquipélagos: Ons, Cíes, Cortegada e Sálvora. Despois, con toda a información que tiñamos, preparamos as tarxetas con preguntas para poder xogar.
E, sabedes que? Gañamos o concurso e o premio foi unha viaxe ás Illas Cíes! Que ben o pasamos!
Estamos tan motivados con esta experiencia, que o curso que vén estamos desexando volver participar!
OS FURABOLOS E O TEMPO
Enviado por Marta Valbuena o Mar, 25/06/2024 - 12:43Os Furabolos da Pedra, alumnado de 5º de infantil non podía ser menos e tamén traballou co tempo. Representaron o mapa do tempo de Galicia e recitaron refráns tradicionais.
Premede na imaxe para ver o ben que o fixeron!
OS LARETAS E O TEMPO
Enviado por Marta Valbuena o Mar, 25/06/2024 - 12:37Na aula dos e das Laretas, alumnado de 6º de infantil, cada día hai un protagonista que pinta un rectángulo da columna correspondente, segundo o tempo que faga ese día: sol, chuvia, nubes...
A fin de mes, contamos cantos hai en cada columna para ver o tempo que predominou ao longo do mes e o representamos cun número e material manipulativo.
OS TRASNOS E O TEMPO
Enviado por Marta Valbuena o Mar, 25/06/2024 - 12:25Os trasnos, alumnado de 4º infantil, cada día rexistramos no calendario o tempo atmosférico. Ao finalizar cada mes creamos o nome do mes con letras móbiles e a gráfica do tempo cos number blocks.
OS PELOUROS E O TEMPO
Enviado por Marta Valbuena o Mar, 25/06/2024 - 12:05Ao longo de varios meses do curso, o alumnado de 5º infantil do grupo PELOUROS, observaron e mediron o tempo, que despois rexistraban ao rematar cada mes cun reconto matemático representado de diferente xeito.
Podedes entrar en cada un dos meses para ver o seu traballo.
OUTUBRO
http://pelourosdebueu.blogspot.com/2023/11/meteoescolas-o-tempo-en-outubro.html
XANEIRO
http://pelourosdebueu.blogspot.com/2024/02/tempo-en-xaneiro.html
FEBREIRO
http://pelourosdebueu.blogspot.com/2024/03/tempo-en-febreiro.html
MARZO
http://pelourosdebueu.blogspot.com/2024/04/tempo-en-marzo.html
ABRIL
http://pelourosdebueu.blogspot.com/2024/05/tempo-en-abril.html
MAIO
http://pelourosdebueu.blogspot.com/2024/06/tempo-en-maio-estivo-ben-repartido.html
Moi ben, Pelouros! Fixéstelo xenial!!!
Meteoescolas
Enviado por Susi Fernandez o Ven, 21/06/2024 - 15:30O alumnado de 3º, coma cada ano, participamos na recollida de datos meteorolóxicos en dúas semanas do curso escolar.
Fomos ao inicio da xornada á caseta meteorolóxica no patio da escola para recoller a chuvia do pluviómetro e medir a cantidade que había, ademais das temperaturas máximas e mínimas.
Tamén realizamos un recopilatorio de refráns do tempo.
Encántanos convertirnos en meteorólogos e meteorólogas por uns días!
O tempo en Bueu!
Enviado por Jose Antonio Malvido o Lun, 17/06/2024 - 23:54Todos sabemos que a chuvia é auga que cae das nubes en forma de pingas, mais o que non todos sabemos, é que na nosa lingua temos 100 palabras para designar a choiva.
Isto vai depender de se falamos de chuvia feble (barruñeira, barruzo, borralla, breca, chuvisca...), chuvia forte (chaparrada, chuvascada, chuvasco, chuvieira, cifra...) ou de termos relacionados coa chuvia que representan momentos; como sucede cando remata de chover (amizar, delampar, escambrar, escampar,...).
Sóache "chove a cairos"? É cando se produce un chuvasco intermitente e adóitase utilizar moito no Morrazo!
Nestas fotos podedes observar ao alumnado de 6º recollendo os datos da caseta meteorolóxica e anotándoos para pasalos despois ao mural de Meteoescolas do Bibliocastelo.
