Dende o Departamento de Música achegamos un PDF co seguinte contido:

Actividades musicais organizadas polo Departamento de Música co gallo das Letras Galegas 2023.

Concerto con material de refugallo a cargo de Xavi Lozano para EI e 2º de Primaria.

Taller de instrumentos Tradicionais a cargo de Pablo Seoane para 5º de Primaria.

Con motivo da  celebración do Entroido no centro, desde o departamento de música, decidimos retomar a actividade que se realizara xa no Entroido de 2020 (podedes atopar máis información na seguinte ligazón).

Por que optamos por un obradoiro de percusión? Tanto no curso pasado como no actual, debido á situación sociosanitaria que estamos a vivir, e segundo os protocolos que dita a normativa vixente, era moi complicado o emprego de instrumental de vento (frauta doce) mantendo a seguridade do alumando.

En base a isto, no presente curso, decidimos darlle máis protagonismo ao instrumental de percusión indeterminada e determinada. Para iso, foi necesario mercar unha partida importante de material de percusión para as aulas de música de Educación Infantil e Primaria, de tal xeito que cada nena e neno puidese dispoñer do seu propio instrumento.

Como motivación e para iniciar aos nenos na percusión, e sabendo a boa acollida que tivera na edición anterior, pensamos que este obradoiro que nos ofertaban, era ideal para este fin.

A actividade consistíu na realización dun obradoiro musical de percusión de altura indeterminada, cunha duración dunha hora por clase. As aulas participantes nesta ocasión foron as do 1º e 2º nivel de Educación Primaria.

O encargado de impartir o obradoiro este ano foi Ibrahim, percusionista profesional que pertence ao grupo Ecopercussión, con sede na provincia de  Pontevedra. O termo Ecopercussión une ecoloxía e música, polo que todos os instrumentos empregados eran de refugallo: cubos de pintura, bidóns de pvc de diferentes tamaños e sons. Para percutir foron empregadas baquetas de madeira; (todo o material foi achegado polos organizadores da actividade).

Como agardabamos, foi todo un éxito e nos gustaría repetir a experiencia en cursos vindeiros e con outros niveis educativos. 

Podedes ver esta actividade na Galería de Imaxes.

-Departamento de Educación Musical

A pasado 14 de xaneiro  tivo lugar no Auditorio de Galicia a presentación da nova obra musical, Gratulantes, de Sofía Oriana Infante a cargo da Real Fhilarmonía de Galicia dirixida nesta ocasión polo seu director titular, Paul Daniel. Xa é con esta obra, a segunda que estrea coa citada formación, por petición desta, pois na temporada 2019/20  o fixo con  In memoriam tamén no Auditorio de Galicia.

Artigos de prensa sobre a compositora e as súas obras:

La Voz de Galicia xaneiro 2021

Melómano Digital xaneiro 2021

La Voz de Galicia outubro 2019

Concertos en directo

No curso 2018-19 puidemos disfrutar do privilexio de ter á compositora no noso colexio por un tempo, facendo unha substitución, da que gardamos un grato recordo tanto mestres/as  compañeiros como os nenos e nenas,  que naquel curso, tiveron a sorte de escoitala na charla que impartiu na biblioteca do colexio para os alumnos e alumnas de 6º de Primaria. Neste enlace podedes ver  ou recordar a experiencia:

Queremos  felicitar a Sofía  e animarvos a coñecer a obra desta compositora galega,  que sen dúbida vos fará desfrutar e vos axudará a esquecer por un intre a situación que nos está tocando vivir. Apostamos como sempre desde aquí pola cultura! Que siga!

Obradoiro de Percusión

Recentemente o grupo Eco Percussión ofreceunos a posibilidade de facer un obradoiro de percusión no colexio. Como os alumnos e alumnas de 5º nivel estabamos coñecendo este trimestre a familia de percusión a través dos instrumentos nas distintas culturas, seguindo o libro dixital da editorial Netex, pensamos que o taller que nos propoñían era ideal para complementar o que estabamos a aprender. Así, como estudamos, vimos e coñecemos a batucada en Brasil, e os folións ou fulións en Viana do Bolo, Manzaneda e Trives como manifestacións típicas do Entroido, pensamos que que mellor que completar isto cunha práctica de percusión no Entroido. Por iso pedimos aos músicos de Eco Percussión que o taller se desenvolvera durante a semana na que se celebraba o Entroido no colexio.

Así os días xoves 20 e venres 21, Edgar e Didier trouxeron todo o material que iamos necesitar. Cada grupo tivo a súa clase correspondente. Todos moi atentos pero partícipes, atendíamos ás indicacións do percusionista que nos dirixía. Practicamos ata que conseguimos que o que nos propoñía Edgar nos saíra ben. Tamén na clase de música, fixemos un pequeno ensaio da exhibición que faríamos no patio do colexio para o resto dos compañeiros e compañeiras dos distintos cursos do colexio.  

O venres 21 celebrabamos o Entroido no noso colexio e, xa disfrazados todos, saímos ao patio e xunto con Mercedes, que tamén quixo participar con nós, fixemos unha breve actuación para os nosos compañeiros/as para así ter a nosa propia batucada, charanga ou folión, como se queira entender. O asunto é que aprendemos moito, nos divertimos e o pasamos xenial. Grazas a Eco Percussión por esta experiencia que agardamos se poida repetir!

"Neste curso no colexio temos a sorte de ter  a unha compañeira facendo unha substitución na materia de música: Sofía Oriana Infante. Nunha conversa sobre música  e a materia  que ela vai impartir, coméntame que ademais de mestra especialista en Educación Musical é tamén compositora. Recentemente compuxo a banda sonora da película Elisa y Marcela de Isabel Coixet, entre outros  traballos.

Propóñolle entón que lles dé unha charla aos alumnos e alumnas de 6º curso. Inmediatamente Sofía acepta e a organizamos antes de que remate a súa substitución. Non é unha oportunidade que xurda todos os días e non queremos desaproveitala. Os nenos e nenas  coñecen e teñen referencia de compositores e de mulleres músicas, pero non de compositoras e nos pareceu  unha excelente oportunidade de que coñeceran esta profesiónda man dunha compositora de actualidade.

 Durante a interesante charla que Sofía ofreceu aos nenos e nenas de 6º,  faloulles sobre os anos de estudos e de formación que esixe chegar a ser compositora e animounos a perseguir e persistir para conseguir os seus sonos. Tamén lles explicou como algúns  compositores/as non dispoñen dunha orquestra cando están a compoñer, senón que utilizan, previo pago, as “bibliotecas de sons”.  Os nenos/as comprobaron a través de exemplos prácticos que ela puxo, como a música nos transmite moita información e por iso é fundamental nunha película. Amosoulles un dos seus traballos e lles fixo reflexionar  finalmente, sobre a importancia de estudar, coñecer e prepararse para poder diferenciar e seleccionar, a boa música.

 Os nenos e nenas, que amosaron moito interese polo tema, ao final poideron facerlle preguntas a Sofía. Algunhas delas foron, por certo moi interesantes: que sentiches cando te escolleron para facer a banda sonora desa película? ou, se poideras escorller compoñer unha banda sonora, para que director a farías?

  Como vedes a charla resultou tremendamente proveitosa como xa esperábamos e desde aquí queremos darlle a Sofía as grazas unha vez máis".

Ligazóns:  

www.sofiainfante.wixsite.com/composer                                          

https://www.google.com/search?client=firefox-b-d&q=sofia+oriana+infante+souto

 https://www.lavozdegalicia.es/noticia/ferrol/ferrol/2018/06/06/xan-viano-componer-coixetferrolana-referentes/0003_201806F6C12993.htm

   En breve está prevista unha nova saída didáctica, esta vez cunha temática distinta, para que así os nosos alumnos e alumnas acudan ao logo da Educación Primaria, a distintos tipos de espectáculos, que resulten deste xeito máis motivadores e enriquecedores para a súa formación, non só artística, senón tamén como persoas.

   Nesta ligazón tedes a información sobre a saída:

https://www.compostelacultura.gal/espectaculos/evento/somos-iguais-somos-distintos

O trimestre pasado os alumnos e alumnas de 4º nivel asistiron no Auditorio de Galicia ao concerto didáctico do Crebancoces de P.I. Tchaikovsky, interpretado pola Real Filharmonía de Galicia xunto coa compañía de monicreques PER POC.

Como sempre que imos a un concerto didáctico, preparamos na clase de música a asistencia ao mesmo e despois fixeron estes debuxos. Tedes máis información no PDF adxunto.

  Os nenos e nenas de 2º nivel acompañados polos seus titores e a mestra de música, foron ao AUDITORIO DE GALICIA e, na sala  Mozart,  presenciaron un inesquecible e fantástico CONCERTO SOBRE MÚSICA E CINE.

   Proxectáronse fragmentos de películas ao tempo que o TRÍO CASPERVEK  formado por violín, batería e piano interpretaba a música de dita película. (ver máis información da actividade no PDF adxunto)

   Durante este ano, tanto nas clases de música como de plástica, traballamos coa proposta de "Proxectando en verde" como  fío condutor do curso.

   Así, no 2º nivel coa cantiga "Buscando Papá Noel", fixemos un mural dun bosque de Nadal e cantamos coa música de Susa Herrera.

Fixemos carteis con slogans para salvar o planeta, un mural primaveral con árbores, plantas e animais de todo tipo.

    Na clase de música aprendemos e cantamos a cantiga popular  ”Tres hojitas madre” cunha sinxela coreografía.

     No 3º nivel a partir da mesma cantiga fixemos debuxos, un libro para a biblioteca e cantámola así:

    No 4º e 5º nivel traballamos a partir da cantiga “ Aparta loureiro verde”.  E no 6º nivel aprendimos a tocala coa  frauta doce.

 LER  PREMENDO AQUÍ O ARTIGO COMPLETO COS TRABALLOS DOS RAPACES.

2º NIVEL

  Neste nivel traballamos durante este curso, conxuntamente os titores e titoras de segundo curso e a mestra especialista en Educación musical a partir da canción “Buscando Papá Noel” de Susa Herrera.

Traballamos tanto nas clases de música como de plástica durante o mes de decembro e durante o desenvolvemento da Unidade Didáctica do Nadal.

Nesta ligazón, publicada recentemente, está reflectida a nosa experiencia:

http://www.edu.xunta.gal/centros/ceipamaia/?q=node/610

Coa chegada da primavera tratamos de seguir co fío condutor,  que sería de novo un alegre e transformado bosque primaveral.

Retomamos para iso os slogans que traballaramos no Nadal, pero nesta ocasión propuxemos aos nenos/as de segundo, que en equipos e na clase de plástica, fixeran un cartel e que o decoraran.

   Aproveitando a saída a Apípolis, os nenos e nenas fixeron debuxos de abellas e bolboretas para decorar o mural. Completamos o mural con flores e algúns paxariños. En equipos tamén tiveron que  elaborar animais vertebrados. Para iso vimos distintas imaxes destes animais e observamos as súas características principais.

E así de bonito quedou o noso mural!

  Na clase de música aprendemos e cantamos unha cantiga popular sobre as árbores: ”Tres hojitas madre” e tamén fixemos con ela, unha sinxela coreografía. Todos se animaron a participar, pois o fixemos a modo de xogo: cada un propoñía un paso ou movemento e todos o repetíamos, iso si, ao ritmo sempre da música. Finalmente, cada clase creou a súa propia coreografía que os nenos e nenas de segundo, non se cansaron de bailar e practicar. 

3º NIVEL

  Traballamos  como no segundo nivel, a partir da canción “Tres hojitas madre”, conxuntamente titoras e a mestra de música.

  Unha vez motivados xa foi moi fácil aprendela, pois a todos nos gustou moito e logo nas nas clases de plástica, os nenos e nenas debuxaron libremente a partir da cantiga aprendida. Con todos eses debuxos tamén fixemos un libro para a biblioteca.

4º e 5º NIVEL

   Traballamos a partir da cantiga popular galega “ Aparta loureiro verde”.   Vimos fragmentos de vídeos coa interpretación da canción por distintas formacións instrumentais. Comprobamos, entón que é unha canción moi coñecida e popular en Galicia.

Cantamos a canción seguindo a letra e acompañados pola frauta pola nosa mestra de música.

6º NIVEL

   Traballamos tamén coa cantiga “Aparta loureiro verde” pero aprendendo a tocala e interpretala coa frauta doce.

Para empezar, na clase de música, propuxemos aos nosos alumnos/as que buscaran e seleccionaran na rede, cantigas populares galegas cuxo tema foran as árbores ou  as prantas.

Logo fixemos unha posta en común sobre a información atopada.

Na plataforma de Edixgal e dentro da área de música, se lles proporcionaron aos nenos e nenas diversas ligazóns con recursos, para traballar a cantiga e aprender a tocala, xa de forma máis autónoma, pero guiados sempre,  pola mestra de música.