O laboratorio de ideas persegue a xeración de ideas en pequenos e/ou gran grupo a través dinámicas de traballo cooperativo co fin de xerar conxuntamente un proxecto ou un prototipo determinado. O rol do relator é de dinamizador da creatividade dos participantes e enriquecemento das ideas xurdidas.
Teñen prazas limitadas. A reserva farase en Platega entre as persoas que confirmaran a súa asistencia en Fprofe antes do 13 de abril. Por outra banda, só se poderá asistir a un obradoiro ou laboratorio de ideas dos que se ofertan durante toda a xornada. [Acceso á zona de escolla]
Un dron a medida. Robótica polo aire
Impartido por Jorge García Caamaño
Neste laboratorio de ideas valoraranse os distintos métodos existentes para construír un dron á medida da súa funcionalidade tendo en conta os recursos dispoñibles nos centros educativos (reciclados ou reutilizados a poder ser).
O taller xirará arredor da construcción dos prototipos aéreos e a inserción de dispositivos robóticos (sensores, cámaras, etc.) Cada grupo de 5 persoas presentará a súa proposta.
Laboratorio de ideas con lista de admitidos/as. Hall traseiro (planta baixa). 12:05 h.
Bos e malos hábitos na utilización profesional do teléfono intelixente
Impartido por Mar Castro Maestre (@marcastrops)
O laboratorio de ideas estará estruturado en tres partes. Na primeira, dividiranse os asistentes en 4 grupos. Dous deles elaborarán unha proposta de bos hábitos, os outros dous farana de malas prácticas.
Na segunda parte, xúntanse, por unha banda, os grupos que elaboraron unha listaxe de boas prácticas e, pola outra, os dous grupos que recolleron accións que cómpre evitar. Terán 20 minutos para propoñer unha lista conxunta partindo das dúas que elaboraron previamente.
A última parte consistirá na defensa argumentada de cada proposta para o que terán 5 minutos cada grupo.
Un terzo dos integrantes de cada grupo adoptará o rol de pais, outro exercerá de membros do equipo directivo dun centro escolar e o terzo restante farán a súa proposta desde a súa óptica de docente.
Laboratorio de ideas con lista de admitidos/as. Aula 25. 13:05 h.
Conspiración Robótica: desafío aceptado
Impartido por Isabel Blanco Pumar (@isabelbp)
O obxectivo da sesión é que o profesorado planifique unha tarefa competencial sobre a robótica para a aula na que se dea solución a un problema da vida real.
A tarefa planifícase en agrupamentos heteroxéneos de 4 ou 5 persoas. A sesión desenvólvese en varios momentos diferenciados:
- Introdución e contextualización por parte da encargada do laboratorio. (5 minutos)
- Agrupamentos. (3 minutos)
- Técnica cooperativa 1, 2, 4. (5 minutos)
- Planificación e deseño da tarefa segundo o modelo proporcionado. (35 minutos)
- Elevator Pitch: exposición de cada tarefa durante 1 minuto para cada grupo. (5-10 minutos)
Para a realización dos agrupamentos repartiranse imaxes con compoñentes do Mbot (segueliñas, ultrasóns...). O profesorado deberá agruparse cos que que teñan a mesma imaxe. A idea é crear grupos heteroxéneos que sexan especialistas en distintas materias e traballen en cursos distintos para que poidan compartir ideas e enriquecer os seus deseños.
O profesorado segundo os seus coñecementos e habilidades asume un rol cooperativo (enxeñeiro, construtor, secretario ou programador).
- O enxeñeiro expón o problema e a idea xeral a desenvolver.
- O construtor pensa nos elementos que se precisan para levala a cabo (sensores e actuadores).
- O programador decide os bloques de programación necesarios e escribe o código.
- O secretario toma nota da información e sobe á Rede a planificación da tarefa.
A metodoloxía a seguir será construtivista, todo o profesorado deberá participar activamente no grupo propondo ideas e melloras. Para facer a planificación da tarefa teranse en conta os distintos pasos no proceso de deseño de pensamento (Design Thinking):
- Empatizar. Pensamos un problema da vida real e conectamos coas persoas afectadas por ese problema.
- Definir. Reflexionamos sobre distintas solucións e a súa viabilidade.
- Idear. Xeramos un documento co problema e a solución.
- Prototipar. Reflexionamos sobre o material necesario e facemos un prototipo. Se o tempo é suficiente realizamos o prototipo de forma física.
- Avaliar. Validamos o seu funcionamento (no laboratorio ou posteriormente nas nosas aulas).
O deseño da tarefa recollerase nun modelo predeseñado en Google Drawings. Este modelo estará previamente dispoñible para o profesorado na aula virtual das xornadas para que o poidan ter descargado no momento da sesión.
Todos os traballos compartiranse nun muro público en Padlet para que poidan estar a disposición de todos aqueles interesados.
Laboratorio de ideas con lista de admitidos/as. Aula 25. 17:10 h.