Os pasados 12 e 13 de marzo estaba prevista a realización dos Encontros PLAMBE 2020 que tiveron que ser adiados pola situación sanitaria ocasionada pola COVID-19. Ao longo destes meses foise configurando unha nova actividade na que se recolle a meirande parte do programa daqueles encontros e se inclúen algúns contidos necesarios, como experiencias de bibliotecas no confinamento e outros.Cómpre tamén mudar o formato e o que antes era un encontro gozoso do colectivo do profesorado vinculado ás bibliotecas escolares galegas, debe ser, polas circunstancias sanitarias que vivimos, unha actividade telemática, á que cada quen poderá participar desde os seus dispositivos electrónicos e desde a súa casa. 

Publícase o programa do ENCONTRO BIBLIOTECAS ESCOLARES DE GALICIA 2020 NA REDE que terá un formato telemático e que se celebrará nas tardes do 19 e 20 de novembro e na mañá do sábado 21. A actividade está aberta a todo o profesorado interesado (1.000 prazas), contemplándose como criterio de prioridade a vinculación á biblioteca escolar dun centro PLAMBE, no caso de que haxa máis inscricións que prazas dispoñibles. O profesorado interesado deberá asistir a 8 horas de formación para acceder a certificado. Deberá conectarse 4 horas de sesións plenarias ou obrigatorias, ao longo das tres xornadas, e outras 4 horas a elixir entre a oferta dispoñilbe de experiencias e relatorios, organizado incialmente en tres itinerarios posibles, pero combinables entre si. A asistencia ás 8 horas en total daralle dereito a un certificado de participación. 

Está aberto o prazo de inscrición en FPROFE, co código G2003002. Unha vez superado o proceso de inscrición, admisión e confirmación, o profesorado participante poderá elixir as sesións optativas nas que ten interese, a través dunha ligazón que se lle facilitará, realizando o seu propio itinerario ou escollendo dentro do itinerario de preferencia. Finalmente recibirá os códigos para poder asistir ás sesións do Encontro.

O prazo de inscrición remata o 20 de outubro.

Animamos a todo o profesorado interesado a compartir con nós esta nova aventura formativa.

• PROGRAMA DEFINITIVO
• DOSSIER (Información sobre relatores/as alleos aos centros))

Vén de publicarse no Portal educativo a convocatoria de 29 de outubro de 2020, da Dirección Xeral de Centros e Recursos Humanos, no contexto das actuacións para o fomento da lectura no ámbito educativo, pola que se incentiva o funcionamento de CLUBS DE LECTURA en centros públicos de titularidade da Consellería de Cultura, Educación e Universidade que acollen ensinanzas de educación secundaria, bachalerato, formación profesional ou ensinanzas de réxime especial para o curso 2020-2021.

O prazo límite para a presentación de solicitudes remata o 16 de novembro de 2020 (data incluída)

• PUBLICACIÓN NO PORTAL EDUCATIVO
• TEXTO DA CONVOCATORIA
• ANEXOS DE SOLICITUDE 

O 13 de novembro celébrase, desde o ano 2011, o Día das Librarías promovido por CEGAL e a Dirección Xeral do Libro e Fomento da Lectura do Ministerio de Cultura e Deporte. En Galicia está incluÍda no Calendario do Libro e a Lectura e conta co apoio da Federación de Librarías de Galicia. Desde CEGAL sinalan que “… queremos mostrar que somos espazos próximos, modernos e en continua evolución para xerar cultura, e crear comunidades en torno ao libro e a lectura”

Pensamos, que este é un bo ano para reivindicar, unha vez máis, as librarías de proximidade, espazos que van máis alá da venda de libros, transformándose en motores culturais da comunidade. Librarías con profesionais que entenden a literatura como algo non supeditado ás modas. Libreiros e libreiras que consiguen o imposible, que nos axudan a conformar unha colección rigorosa nas nosas bibliotecas. Librarías que son espazos de acubillo para  alumnado e familias, con múltiples actividades compartidas.

Agora que nos precisan ao seu carón, promovamos actividades, entre a comunidade educativa, para achegarnos ao seu traballo: entrevistas, traballos de investigación, visitas virtuais... É necesario coñecer e preservar a cadea do libro.

• CARTEL A4 
• CARTEL A3

Desde a Asesoría iremos visibilizando estas actividades baixo o lema E ti, de que libraría vés sendo? 

• CEIP de Caión (A Laracha-A Coruña): Libraría "Encontos" 
• CEIP de Carballedo (Cerdedo-Cotobade/Pontevedra): Día das Librarías (Eu merco na libraría)
• CEIP Eduardo Pondal (Vigo-Pontevedra): Visitas virtuais e entrevista a un libreiro
• CEIP Flavia (Padrón-A Coruña): Día das Librarías
• CEIP Graxal (cambre-A Coruña): Visita á libraría do barrio
• CEIP Rosalía de Castro (Padrón-A Coruña): Día das Librarías
• EEI de San Roque (Viveiro-Lugo): Día das Librarías e Mes da Ciencia en Galego nas Bibliotecas
• IES Fin do Camiño (Fisterra-A coruña): Día das Librarías 2020
• IES Johan Carballeira (Bueu-Pontevedra): Día das Librarías 2020
• IES Xesús Taboada Chivite (Verín-Ourense): Día das Librarías

Aos poucos, as bibliotecas escolares galegas van collendo rumbo, amodiño, con paso firme e obxectivos claros. A pesar das restricións e "okupacións" retoman actividades sistematizadas e estables no tempo.

Pode que este sexa un bo curso para facer fronte aos medos que asexan e crean incertidume, para viaxar pola súa xeografía e descubrir que cadaquén ten os seus propios temores e os enfronta como pode. 

A lectura e a escritura son, sempre, un bo acubillo para navegar en tempos complexos.

Imaxe do CEIP As Covas-Meaño 

Actividades do Samaín nas nosas bibliotecas:

• CEIP P. A Cristina (Carballo-A Coruña): Lenda de Samaín e exposición virtual, Lecturas terroríficas (lecturas compartidas), Contos terroríficos (familias)
• CEIP de Abelendo (Moaña-Pontevedra): Podcast Relatos de Medo do Samaín
• CEIP Apóstolo Santiago (Santiago de Compostela-A Coruña): Lendas de Samaín
• CEIP Arquitecto Casas Novoa (Santiago de Compostela-A Coruña): Recursos, Receitas, Conto I, Conto II
• CEIP As Covas-Meaño (Meaño-Pontevedra): Samaín no monte A Toxa (contos de árbores tenebrosas)
• CEIP de Caión (A Laracha-A Coruña): Samaín na BIBLIOTECaión
• CEIP P. de Carballedo (Cerdedo-Cotobade/Pontevedra): Canto Conto!, Castarecomendacións Samaín, Podcasts Historias de Samaín, Obradoiros
• CEIP de Celeiro (Viveiro-Lugo): Contos, Ambientación, Recomendacións lectoras
• CEIP Coirón-Dena (Meaño-Pontevedra): Un Samaín de conto
• CEIP Couceiro Freijomil (Pontedeume-A Coruña): Samaín (lecturas ás escuras e recursos)
• CEIP Eduardo Pondal (Vigo-Pontevedra): Samaín 2020
• CEIP Emilia Pardo Bazán (A Coruña): Contos de medo polo Samaín (Voluntariado)
• CEIP Enrique Barreiro Piñeiro (Cambados-Pontevedra): Lendas de medo , Contos no Camiño-Os monstros de Compostela
• CEIP Filomena Dato (Barbadás-Ourense): Actividades para o Samaín
• CEIP Graxal (Cambre-A Coruña): Lecturas no Samaín, Galería virtual do Samaín
• CEIP do Hío (Cangas-Pontevedra): Historias de Samaín, Samaín na casa
• CEIP Juan Fernández Latorre (A Coruña): Recomendacións lectoras, Contacontos de medo en familia
• CEIP da Laxe (Marín-Pontevedra): I Concurso de monstros e contos terroríficos, Educación Infantil
• CEIP Manuel Cordo Boulloso (Pontecaldelas-Pontevedra): Padriños e madriñas lectoras, Teatro,Contos a cachos
• CEIP Manuel Sueiro (Ourense): Samaín 2020
• CEIP Milladoiro (Malpica-A Coruña): XI Semana de Lecturas Terroríficas
• CEIP Nicolás del Río (Cedeira-A Coruña): Indo para o Samaín, Contos para pasalo de medo
• CEIP P. O Pombal (Vigo-Pontevedra): Recursos de medo
• CEIP P. de Oca (A Estrada-Pontevedra): Lecturas Terroríficas, Compartindo postais
• CEIP da Pobra do Brollón (A Pobra de Brollón-Lugo): Celebramos o Samaín en familia
• CEIP P. Profesor Albino Núñez (Ourense): 100 libros de medo e misterio, Concurso de contos de medo, Colaboración coas familias
• CEIP Rosalía de Castro (Padrón-A Coruña): Verbas de Samaín, Contadas dende as casas
• CEIP Santa María do Valadouro (O Valadouro-Lugo): De que cor pintarías o medo?, Espantando o virus
• CEIP Santiago de Oliveira (Ponteareas-Pontevedra): Recomendacións lectoras para Samaín
• CEIP de Seixo (Marín-Pontevedra): Samaín 2020, Merendas terroríficas, Polo Samaín cóntame a mín
• CEIP Sofía Casanova (Culleredo-A Coruña): Samaín 2020
• CEIP Torre-Cela (Bueu-Pontevedra): Neste Samaín temos moito que contARTE!
• CEIP Vicente Otero Valcarcel (Carral-A coruña): Contos de Samaín, Bibliografía de medo
• CEIP Vistahermosa (Ourense): Polo Samaín... (concurso de relatos, vocabulario, recomendacións de libros e xogos interactivos)
• CEIP Xesús San Luís Romero (Carballo-A Coruña): Orixe do Samaín, Materiais, Contos e cancións, Conto coa túa emoción: o medo
• CPI A Picota (Mazaricos-A Coruña): Un Samaín... peculiar, III Concurso de relatos "Terror na Picota"
• CPI P. Antonio Orza Couto (Boqueixón-A Coruña): Creacións de Samaín (Calaveritas literarias, poema colaborativo e concurso de historias de terror)
• CPI P. de Castroverde (Castroverde-Lugo): Concurso Samaín
• CPI P. de Fonte-Díaz (Touro-A Coruña): É tempo de Samagosto!
• CPI Virxe do Monte (Cospeito-Lugo): Samaín
• CRA A Picaraña (Ponteareas-Pontevedra): Contada de Samaín
• CRA Raíña Aragonta (Salceda de Caselas-Pontevedra): Samaín 2020
• EEI Barrionovo (Arteixo-A Coruña): A lenda do peregrino, Samaín 2020, O libro dos medos
• EEI San Roque (Viveiro-Lugo): Analizando contos e curtas
• EEI Vilarrodís (Arteixo-A Coruña): Exposición e obradoiros
• IES Cabo Ortegal (Cariño-A Coruña): Samaín 2020
• IES Fin do Camiño (Fisterra-A Coruña): Concurso de microrrelatos de terror e Lendo... de medo
• IES Johan Carballeira (Bueu-Pontevedra): Recomendacións lectoras para morrer de medo
• IES Maximino Romero Lema (Baio-A Coruña): Calafrío nun chío! (concurso de chíos de terror)
• IES de Meaño (Meaño-Pontevedra): Concurso de relatos de terror
• IES P. Neira Vilas (Oleiros-A Coruña): Pavoroso. II Concurso de Microrrelatos e Vídeorrelatos de Medo
• IES Pazo da Mercé (As Neves-Pontevedra): Concurso "Relatos de Medo"
• IES de Quiroga (Quiroga-Lugo): Cabazas poetas
• IES San Paio (Tui-Pontevedra): Caderno das xeografías literarias dos medos, Polas xeografías poéticas da morte
• IES Universidade Laboral (Culleredo-A Coruña): Samaín e xeografía de lendas e contos
• IES Xograr Afonso Gómez (Sarria-Lugo): Novembro, Tebro, Noitebro

O Portal educativo publica a resolución de 29 de outubro de 2020, da Dirección Xeral de Centros e Recursos Humanos, relativa á convocatoria do II Concurso de Podcasts - Radio na biblio en colaboración coa CRTVG (Radio Galega). A convocatoria estaba destinada a centros públicos non universitarios de titularidade da Consellería de Cultura, Educación e Universidade que traballan a radio como ferramenta pedagóxica, integrados ou non no programa Radio na biblio. Esta proposta está vinculada á celebración do Día das Letras Galegas, dedicado este ano ao filólogo, mestre e escritor Ricardo Carvalho Calero.

Os podcasts seleccionados serán difundidos pola Radio Galega a través da  páxina do Diario Cultural; así mesmo, serán difundidos a través dos medios web da Consellería de Cultura, Educación e Universidade.

• PUBLICACIÓN NO PORTAL EDUCATIVO
• TEXTO DA RESOLUCIÓN

A UNESCO propón a celebración da semana AMI baixo o lema: Resistir a Desinfodemia: Alfabetización mediática e informacional para todos e por todos. Destácase a necesidade de recoñecer o noso interese común por mellorara as competencias de todos para actuar criticamente coa información, os medios de comunicación e a tecnoloxía, mentras participan do desenvolvemento social.

A desinformación xa existía antes da COVID-19, mais esta pandemia incrementou a difusión de noticias falsas e estafas cibernéticas que se nutren do medo e da desesperación da poboación, polo que a UNESCO acuñou un novo termo para este fenómeno: desinfodemia. Ademais, a desinformación na área científica resulta especialmente dañina polas súas consecuencias na poboación.

As bibliotecas escolares deben , máis que nunca,  reforzar o traballo cos medios de comunicación e identificación das noticias falsas e as competencias ALFIN e AMI.

• PROPOSTA PARA AS BIBLIOTECAS ESCOLARES QUE QUEIRAN PARTICIPAR DESTA SEMANA 

Actividades nas bibliotecas escolares galegas:

• CEIP da Igrexa-Candeán (Vigo-Pontevedra): Semana AMI: comezamos o noso taller de radio! 
• CEIP Nicolás del Río (Cedeira-A Coruña): AMI: Rutinas de pensamento
• CEIP Vistahermosa (Ourense): Fagamos un uso seguro e responsable da tecnoloxía
• IES Universidade Laboral (Culleredo-A Coruña): Semana da Alfabetización Mediática e Informacional (Montando un programa de televisión)

Dende 1997 celébrase o Día das Bibliotecas o 24 de outubro, unha conmemoración impulsada pola Asociación de Amigos del Libro Infantil y Juvenil á que se foron sumando, xa dende hai algún tempo, o propio Ministerio de Cultura e todas as administracións autonómicas. 

A Dirección Xeral do Libro e Fomento da Lectura, a través da Subdirección Xeral  de Coordinación Bibliotecaria, impulsa a celebración do Día das Bibliotecas, este 24 de outubro de 2020. "A edición deste ano, baixo o lema 'Bibliotecas, sempre ao teu carón' céntrase en destacar o importante papel que xogan as bibliotecas ofrecendo acceso á cultura, ao coñecemento e ao entretemento en calquera lugar e circunstancia." Trátase de poñer en valor a capacidade de seguir ofertando servizos en circunstancias tan complexas como as que estamos a vivir.

As bibliotecas escolares galegas amosáronse, e continúan facéndoo, como unha ferramenta ao servizo da comunidade educativa ofrecendo recursos, información e apoio. Cómpre reivindicalo e celebrar que están sempre ao noso carón. 

A biblioteca escolar, esa biblioteca pola que pasan todas as nenas e todos os nenos do país, a primeira biblioteca que lles aprende, tamén, a usar outras, que os pon en contacto con eses outros espazos do coñecemento e do lecer, eses lugares nos que pasan moitas cousas, que son as bibliotecas públicas, eses lugares que están sempre ao noso carón: as BIBLIOTECAS. 

Este curso, o lema das bibliotecas escolares de Galicia XEOGRAFÍAS LECTORAS NA BIBLIOTECA ESCOLAR , quere poñer o foco nas posibilidades que ofrece a biblioteca escolar para a construciónn da  persoa lectora  a través das distintas actividades  que programa e dos recursos que pon a disposición da comunidade educativa, que a ten sempre ao seu carón. Este lema é aproveitado por algunhas das bibliotecas para esta celebración.

•   CARTEL EN GALEGO 

Actividades nas bibliotecas escolares galegas:

O Día das Escritoras é unha iniciativa promovida pola Biblioteca Nacional de España en colaboración coa  Federación Española de Mujeres Directivas, Ejecutivas, Profesionales y Empresarias (FEDEPE) e coa Asociación Clásicas y Modernas. Desde 2016 búscase reivindicar o labor e o legado das escritoras a través da historia.

Como en edicións anteriores, a data elexida é o luns máis cercano á festividade de Teresa de Jesús, o 15 de outubro. A V Edición celébrase este ano 2020  o 19 de outubro baixo o lema "O esforzo cotián das mulleres". "Ben se podería dicir que a literatura escrita por mulleres está a miúdo esporeada por unha conciencia esencial do esforzo." , explica Elvira Lindo, comisaria desta V Edición do Día das Escritoras 2020.

Desde as bibliotecas escolares propomos que se visibilice a obra das escritoras galegas, ben a través dunha exposición, ben lendo fragmentos nunha maratón literaria ou mesmo nos clubs de lectura ou a través de actividades de investigación, exploración ou creación...

Animamos a toda acomunidade educativa a participar nesta actividade que visbilizaremos a través desta páxina e nas redes sociais. #bescolaresgal #bescolaresgalabertas #DíaDasEscritoras 

"Tócanos facer as cousas ás agachadas, que non se note que estamos, porque somos invisbles como o ar. O que non saben, ou non pensan, é que o ar se coa en todos os recantos precisamente poque non se ve. Así facemos nosoutras."

Eva Mejuto "Memoria do silencio" (Editorial Xerais) 

• RECOMPILACIÓN DE FRAGMENTOS DE ESCRITORAS GALEGAS 

O Portal Educativo publica a Resolución da Dirección Xeral de Centros e Recursos Humanos, de 14 de outubro de 2020, pola que se resolve a convocatoria do programa BIBLIOTECA CREATIVA correspondente ao curso 2020/21. Incorpóranse 25 novos centros e  publícanse as asignacións que recibirán os 77 centros que presentaron a súa solicitude de continuidade neste proxecto. En total, son 102 centros PLAMBE os que participan nesta iniciativa destinada a apoiar a cultura da experimentación, a creación e a investigación en espazos creativos e cooperativos no seo da biblioteca escolar.

Os espazos creativos ou espazos maker creados nestas bibliotecas son bos exemplos da evolución que pode vivir unha biblioteca escolar que acolle os multialfabetismos e atende as necesidades da comunidade escolar, ofertando oportunidades para as aprendizaxes a modo de laboratorio de creación e experimentación. 

Profesorado integrante dos equipos de biblioteca destes centros participarán nunhas xornadas mixtas (modo presencial/telemático) que se celebrarán os vindeiros 26 e 27 de outubro na Cidade da Cultura e do que xa se pode adiantar un programa.

• PUBLICACIÓN DA RESOLUCIÓN NO PORTAL EDUCATIVO
  
• PROGRAMA DAS XORNADAS "BIBLIOTECA CREATIVA 2020"

A experiencia dun bo número de bibliotecas vinculadas ao programa "Radio na biblio" durante o período de cese da actividade presencial nos centros durante a primavera de 2020, por mor da COVID-19, puxo de manifesto as posibilidades desta ferramenta para desenvolver actividades educativas a distancia, con capacidade para vincular ao alumnado ao ámbito educativo e para conectar á comunidade escolar arredor dunha proposta temática. A radio foi unha ferramenta pedagóxica de gran alcance capaz de xerar unha importante dinámica de comunicación, de apoio aos proxectos, de difusión de produtos culturais e das investigacións elaboradas polo alumnado. A situación vivida facilitou, a través do programa, a educación para a competencia en información e medios tanto para o alumnado como para as súas familias.

A Radio na biblio transformouse no espazo de encontro da comunidade educativa, o lugar no que escoitarse, no que poñer en común o traballo feito na casa, no que falar ...

De entre todas as marabillosas experiencias deste periodo, seleccionamos oito que ofrecen unha variedade de recursos e propostas do que se pode facer en tempos complexos, mesmo poñer en marcha a emisora.

•   DÍPTICO RADIO NA BIBLIO EMITE... DENDE A CASA 

O prazo de presentación de solicitudes remata o 9 de outubro de 2020. 

• TEXTO DA CONVOCATORIA 
• ANEXO I. SOLICITUDE
• ENDEREZO DE PRESENTACIÓN DA SOLICITUDE

A Consellería de Cultura, Educación e Universidade publica o lema e o cartel para as bibliotecas escolares de Galicia de cara a este curso 2020/2021. O lema elixido, XEOGRAFÍAS LECTORAS NA BIBLIOTECA ESCOLAR, quere  poñer o foco nas posibilidades que ofrece a biblioteca escolar para a construción da persoa lectora a través das distintas actividades que programa e dos recursos que pon a disposición da comunidade educativa. 

Cada libro que o alumnado ten a oportunidade de ler é unha ocasión para ampliar a súa imaxinación e aumentar os seus coñecementos, de aí a importancia da selección de lecturas que se pon ao seu alcance. A ilustradora encargada este ano de interpretar o lema elixido foi Bea Lema, quen nos ofrece unha imaxe evocadora deses mundos imaxinarios que a lectura pode axudar a visitar e construír.

En tempos confusos como os que estamos a vivir cómpre volver ás orixes, ao fundamental: a lectura e toda a súa potencialidade, sen esquecer outras oportunidades da biblioteca escolar para unha formación integral do alumnado. Atravesar o mapa da lectura pode facerse desde distintas ópticas, comezar a viaxe desde distintos portos:

- Pescudar nas lecturas que convidan a viaxar, a explorar, a investigar. Lecturas que nos permiten chegar lonxe sen movernos da escola (ou da casa). Lecturas que axudan a incentivar o inconformismo, a necesidade de coñecer outros mundos, de ampliar a nosa visión, de "ler o mundo". 

- Configurar o itinerario  lector como punto de partida da nosa xeografía lectora.

- Debuxar o mapa das nosas curiosidades, exploracións e descubrimentos a través das lecturas.  Descubrir as relacións entre identidade e lectura.

- Observar o modo en que cambiou a nosa xeografía lectora durante o período de confinamento (os nosos hábitos, as nosas lecturas...).

- Saber que somos os nosos propios cartógrafos, os que organizamos o noso espazo lector (e o noso "liberespazo", o sistema de lecturas que imos creando ao longo da vida).

- Observar o noso corpo como un mapa de coñecemento, achegarnos á práctica da lectura a través do propio corpo. Descubir a capacidade reparadora da lectura. 

- Deixarse levar polas relacións entre cartografía e literatura,  que convidan á aventura (debuxar espazos peritextuais, con mapas e planos que crean expectativas e acompañan na aventura lectora, debuxar mapas que representan mundos coñecidos e mundos imaxinarios, relacionar as nosas lecturas a través de "constelacións literarias", en función da temática, os personaxes...).

XEOGRAFÍAS LECTORAS NA BIBLIOTECA ESCOLAR convida a explorar todas as posibilidades da lectura: en calquera soporte, en calquera formato, con calquera finalidade; lecturas textuais e icónicas; imaxes fixas e en movemento; lectura de gráficos, planos, mapas ou infografías; lecturas individuais e lecturas compartidas, en silencio ou en voz alta; lectura de ficción e de información; lectura libre e guiada; lectura que nos axude a comprender mellor o noso mundo e lectura que nos axude a entender o mundo dos outros...

Con data 13 de febreiro de 2020, a Consellería de Educación, Universidade e Formación Profesional, a través da Dirección Xeral de Centros e Recursos Humanos, facía pública a convocatoria do II Concurso de Podcasts-Radio na biblio, en colaboración coa CRTVG (a través da Dirección da Radio Galega), co gallo da dedicación do Día das Letras Galegas de 2020 ao filólogo e escritor Ricardo Carvalho Calero, destinado aos centros públicos integrados no programa Radio na Biblio con extensión a outros centros de titularidade da consellería que traballan xa coa radio como ferramenta pedagóxica, co fin de estimular, por unha banda, a valoración da lingua galega e, por outra, reforzar a lectura de dous xéneros literarios aos que Carvalho Calero dedicou parte da súa obra: a poesía e o teatro. O prazo de presentación de traballos remataba o 25 de abril.

Aínda que moitas emisoras vinculadas a "Radio na biblio" estiveron activas nesta primavera estraña de 2020 (tempos de pandemia, confinamento e aprendizaxe non presencial), tamén outras moitas viron paralizadas as súas posibilidades de intervención co alumnado.

Por outra banda, e nesta situación provocada pola COVID-19, a Real Academia da Lingua Galega comunicou o traslado ao día 31 de outubro de 2020  do Pleno do día das Letras Galegas adicado ao citado autor, e tamén pospuxo diferentes actos presenciais á volta do verán, prolongando, deste xeito, a celebración do ano Carvalho Calero ao longo do último cuadrimestre do 2020.

Co fin de facilitar a posibilidade de participación no II concurso de podcasts "Radio na biblio", convocado en colaboración coa CRTVG (Radio Galega), con temática vinculada á celebración das Letras Galegas 2020 en honra de Ricardo Carvalho Calero, amplíase o prazo para a presentación de traballos ao II Concurso de podcasts "Radio na biblio" ao vindeiro 10 de outubro.

• PUBLICACIÓN NO PORTAL EDUCATIVO
  

O Portal Educativo publica a convocatoria da Dirección Xeral de Centros e Recursos Humanos, de 2 de setembro de 2020, do proxecto BIBLIOTECA CREATIVA, para apoiar a cultura da experimentación, a creación e a investigación, en espazos creativos e cooperativos no seo das bibliotecas escolares dos centros que matriculan alumnado de educación infantil e primaria, integrados no Plan de mellora de bibliotecas escolares, para o curso 2020/2021.

Poderán participar os centros integrados en anteriores convocatorias do proxecto BIBLIOTECA CREATIVA e seleccionaranse 25 centros de nova incorporación.

Non poderán participar os centros que se incorporan ao PLAMBE no curso 2020/2021, curso no que cómpre centrar a súa actividade na consolidación do modelo de biblioteca escolar segundo os obxectivos presentados no seu proxecto.

O prazo de presentación de solicitudes remata o 23 de setembro de 2020.

• Publicación no Portal Educativo 
• Convocatoria proxecto Biblioteca creativa
• Anexo I. Solicitude

O Portal Educativo publica as Instrucións da Dirección Xeral de Centros e Recursos Humanos, de 1 de setembro de 2020, en relación coa organización e funcionamento da biblioteca escolar, destinadas aos centros públicos de niveis non universitarios, de titularidade da Consellería de Educación, Universidade e Formación Profesional.

Estas instrucións inclúen unha cláusula específica relativa á situación xerada pola COVID-19, e actuacións que se consideran necesarias na biblioteca escolar, coordinadas e supeditadas ás instrucións xerais das autoridades sanitarias e educativas para os centros no seu conxunto.

• INSTRUCIÓNS PARA A ORGANIZACIÓN E O FUNCIONAMENTO DA BIBLIOTECA ESCOLAR. Curso 2020/21 (texto principal)
• Anexo I (Anotacións ás instrucións)
• Anexo II(Disposición adicional convocatoria PLAMBE 2020/21)