Despois de participar durante o 1º trimestre nos recreos deportivos, parte do noso alumnado participou o pasado mércores 20 de decembro no Torneo Intercentros organizado no Pavillón Álvaro Pino. Ben se lles ve na cara que non o pasaron nada mal!

Velaquí o tan agardado álbum de fotos do Magosto deste ano! 

Álbum: Curso 2023-24 -> Magosto 2023

Na mañá de hoxe tivo lugar no Concello o Pleno da Infancia. Unha vez máis, o noso centro foi moi ben representado por Noela e Laura. O tema a tratar eran os dereitos da infancia, e as nosas alumnas reclamaron unha maior atención desde o Concello para os rapaces e rapazas de Ponteareas que poidan ver os seus dereitos fundamentais vulnerados:

Velaquí un fragmento da súa exposición: 

"Pensamos que o Concello podería axudar a mellorar a situación destes nenos e nenas. Como?

- Asegurándose de que teñan cubertas as súas necesidades básicas (alimentación, medicamentos, roupa, material escolar,…)

- Controlando que non se lles prive do dereito á educación.

- Facendo un maior seguimento das familias e da súa situación, para asegurarse de que estes nenos e nenas vivan nun ambiente protexido."

Parabéns, Laura e Noela, polo voso esforzo! Foron horas preparando a intervención e o "mural dos dereitos".

Se tedes curiosidade, neste enlace podedes ver o pleno.

É ben sabido que Ponteareas é terra de músicos e músicas, polo que o Val do Tea non podía ser menos! Celebramos o Día da Música cun concerto organizado polo Equipo de Biblioteca, onde parte do noso alumnado amosou o seu talento.

Parabéns, rapaces e rapazas polo voso traballo!

O noso alumnado da ESO participou ao longo desta última semana de outubro nunha actividade de concienciación ambiental levada a cabo por parte do persoal de voluntariado do Concello. Nesta explicouse a importancia do coidado dos nosos ríos, apoiándose nunha escultura con forma de váter feita con toalliñas recollidas este verán no río Tea.

Os últimos días de curso foron intensos no centro! Nas imaxes podedes ver o compañeiro Pedro (Peri Helio), profe do departamento de Matemáticas, rematando o mural que levou adiante co alumnado de 3º ESO nun tempo récord! E tamén o resultado do mural feito polo alumnado de 1º Bacharelato nestes últimos días, baixo a supervisión de Marta, profe do departamento de Debuxo. 

Grazas, Pedro e Marta, pola vosa iniciativa!

O martes 6 de xuño, o alumnado de Francés de 2º ESO, 3º ESO, 4º ESO e 1º de BACH. participou nun obradoiro de “crêpes”.

Jérémy Thomas trouxo ao centro o seu food truck “La Marinière” e realizou co alumnado unha actividade lúdica e didáctica á vez. O alumnado descubriu información sobre a rexión francesa de Bretaña, practicou diálogos en francés e axudou a facer “crêpes” que logo degustou con diferentes recheos.

De la part des élèves et des enseignants participants, nous disons merci à Jérémy pour cette expérience enrichissante et pour ses crêpes qui sont une véritable délice.

MERCI JÉRÉMY

Compartimos convosco algunhas imaxes da celebración o pasado venres 16 de xuño do Acto de Graduación de 4º ESO.

Ao remate deste curso, estes rapaces e rapazas iniciarán unha nova etapa, algúns deixarán o noso centro, outros comezarán o Bacharelato, pero para todos eles e elas desexamos que sexa unha etapa tan fermosa como esta que rematan e que o futuro lles traia grandes experiencias.

Moita sorte a todas e todos!

Álbum: Curso 2022-23 -> Graduación 4º ESO (16/06)

O pasado venres día 2 de xuño o alumnado de 3º ESO tivo a oportunidade de charlar co alumnado de ACEESCA, unha asociación de utilidade pública sen ánimo de lucro, que contribúe a mellorar a calidade de vida das persoas con discapacidade intelectual. Sen dúbida foi un encontro moi enriquecedor no que o noso alumnado puido coñecer e entender máis de preto a realidade das persoas con discapacidade intelectual.

Compartimos convosco este "pequeno" álbum fotográfico da celebración o pasado venres 19 de maio do Acto de Graduación de 2º Bacharelato. Desde o Equipo de Dirección do centro queremos felicitar o alumnado pola organización deste fermoso evento, xa que demostraron unha vez máis o traballadoras e traballadores que son. Así lles quedou de fermoso o acto!

Parabéns, rapazas e rapaces. Desexámosvos moita sorte nesta nova etapa que comezades. 

Álbum: Curso 2022-23 -> Graduación 2º Bacharelato (19/05)