Aínda existen campos profesionais onde perduran os estereotipos de xénero. En moitos casos non é doado atopar mulleres ou homes en certos traballos.

Con motivo do Día Internacional da Muller, propomos este concurso, para dar visibilidade a aquelas profesionais que están a romper estereotipos no seu campo.

Seriades quen de atopar representantes femininos e masculinos de distintas profesións?

Creade un collage de imaxes nas que, para cada profesión, amosedes unha imaxe de cada un dos representantes de cada sexo.

Xuntade tantas como poidades!

PARTICIPACIÓN INDIVIDUAL OU EN GRUPO

DATA LÍMITE: 8 DE ABRIL ÁS 15:00h

PREMIO: vale de compra de 20€ (por participante) nunha libraría/papelaría.

*Consultade as bases completas no cartaz.

Este sábado, as nosas alumnas de 1º Bacharelato, Iria M. e Lía B. participaron no concurso de recitado poético "Rosalía sempre viva", que organiza a Casa-Museo Manuel María (Outeiro de Rei). Un ano máis, a calidade de recitado de todas e todos os participantes foi realmente sorprendente, e desde o IES Val do Tea non podemos estar máis orgullosas e orgullosos das nosas alumnas e do seu magnífico traballo!

E para máis ledicia, Iria gañou o premio ao mellor recitado na Categoría de Bacharelato e Ciclos Formativos! Parabéns polo merecido premio!

Este xoves, o alumnado de 4º ESO participou na charla do programa A Ponte "Emerxencia climática: boas prácticas educativas de mitigación e adaptación ao cambio climático nos centros educativos".

Que podemos facer nós para colaborar a contrarrestar os efectos do cambio climático? Posiblemente máis do que pensamos!

Volve o concurso filosófico Repensar o amor!

O concurso vai dirixido ao alumnado matriculado no IES Pedra de Auga, no IES Val do Tea e no IES do Barral. Haberá dúas modalidades de participación:

➔ Modalidade A: ENSAIO. Nesta modalidade, trátase de construír un ensaio PROPIO e ORIXINAL sobre o amor revisando algúns dos mitos que circulan na nosa sociedade sobre este sentimento e/ou aportando novos enfoques de comprensión de dito fenómeno na actualidade.

➔ Modalidade B: IMAXE + LEMA. Nestoutra modalidade, o/a concursante presentará ou ben unha FOTOGRAFÍA FEITA POR EL/ELA MESMO/A ou ben unha ILUSTRACIÓN DE ELABORACIÓN PROPIA (en ningún caso se aceptarán imaxes descargadas) que recolla algún aspecto relacionado co amor e acompañará a imaxe dunha FRASE BREVE que lle dea voz ou a explique e que convide á reflexión.

En cada unha desas modalidades, estableceranse catro seccións de concorrencia ao concurso correspondentes ao NIVEL académico do alumnado, a saber: ESO, BACHARELATO, ESA ou CICLOS FORMATIVOS.

Podedes consultar as bases neste enlace.

O vindeiro 11 de febreiro conmemórase o Día Internacional da Muller e a Nena na Ciencia e esta mañá tivemos connosco a Cristina Fernández, investigadora de Ciencias do Mar na Universidade de Vigo. Veu falarnos das mulleres referentes e/ou pioneiras nas áreas STEM e máis concretamente da súa carreira, "Unha carreira de ciencias cun toque feminista". O alumnado de 3º e 4º ESO tivo ocasión de coñecer un pouco máis o mundo do mar grazas a esta interesante charla.

Grazas, Cristina, pola túa visita e parabéns polo teu traballo!

Hoxe celébrase o Día da Paz, da non violencia. A violencia é terrible sempre, sempre pero aínda o é máis cando a consenten os estados.

Sara Ashour da Fundación Araguaney-Puente de Culturas veunos falar desa terrible violencia que padece o pobo palestino. Acompañouna Ana e escoitárona os alumnos e alumnas de 1 de Bacharelato. Escoitemos sempre os pobos que son tratados con violencia. Expliquemos as causas das guerras, para traballar pola paz.

O alumnado de 1º Bacharelato de Artes, Ciencias Sociais e Humanidades participou este mércores nunha charla sobre "A xestión cultural: un sector profesional emerxente e unha oportunidade de empregabilidade" da man de Gonzalo Francisco Fernández Suárez, Decano da Facultade de Humanidades da USC. Esta charla forma parte do programa A Ponte, da USC.

O alumnado recibiu información que moi posiblemente lle resulte de interese para o seu futuro universitario, cada vez máis próximo!

O pasado martes, o Club de lectura junior do noso insti tivo unha quedada cos clubs de lectura de 5º e 6º do CEIP Fermín Bouza Brey e do CEIP Ramiro Sabel!
Primeiro xantaron xuntos/as todos/as os lectores e lectoras e despois viron a película "O fogar de Miss Peregrine para nenos peculiares".
Tralo visionado da peli, unha encomenda: traballar a plástica da película nos seus coles.
Asemade quedaron en plasmar (nun papel corrido, grande coma as súas lecturas) as impresións da peli e máis do libros de Ledicia Costas que están a ler nos diferentes Clubs de lectura: A señorita Bubble (nos coles) e A balada dos unicornios (no insti).

Quedamos emprazados/as para outro xantar no que haberá intercambio de sentires e pareceres lectores.
E se viñese un unicornio?

Esta mañá, grazas ás xornadas de teatro organizadas pola FANPO, o alumnado de 4º ESO e 1º Bacharelato tivo a oportunidade de asistir á nova representación de Cándido Pazó que leva por título Apaga o candil. Unha obra que fala do Xestal, un dos humoristas galegos máis populares dos anos 60 e 70, cunha historia persoal entre o éxito e a amargura.

Unha obra moi interesante e que desde aquí vos recomendamos a todos e todas! 

O pasado venres, o pallaso Iván Prado (pallaso en rebeldía) achegouse ao noso insti para falar das accións que desenvolven en Gaza (ademais de noutras partes do mundo en situación de risco e conflicto) os Pallasos en rebeldía. O circo combatendo as balas e o xenocidio.
Tamén nos presentou o seu libro Palestina tiene nombre de mujer. A cultura combatendo a barbarie. "Defender la alegría como una trinchera".
Grazas, Iván, e grazas ás pallasas e pallasos por facer dos espazos da dor e da inxustiza lugares máis amables e habitables!