Skip to Content

Obradoiro Linguaxe de signos

Mér, 16/02/2022 - 20:26 — karina
O pasado venres 11 de febreiro a Federación de Asociacións de Persoas Xordas de Galicia (FAXPG) impartiu un obradoiro de dúas horas de aproximación á linguaxe de signos destinado ao alumnado de 2º CM de Xestión Administrativa e 1º CS de Administración e finanzas. Informaron sobre o traballo que realizan e concienciaron aos asistentes sobre os problemas que sofren as persoas xordas e como a lingua de signos é unha ferramenta fundamental para superar barreiras comunicativas e sociais do día a día.
Nunha primeira parte máis teórica, Xavier Sánchez Álvarez, logopeda, ofreceu un panorama amplo respecto ao que significa ser unha persoa xorda: tipos de xordeira, detección, modos de actuación (familia, colexio, médicos), principais barreiras ás que se enfrontan e alternativas para solucionar ou adaptarse a esta discapacidade. Ademais, explicou cales son os servizos que ofrece a fundación e en que provincias se encontra.
Na segunda parte máis práctica,  Isabel Pardo Sampayo, persoa xorda, fixo unha breve introdución á linguaxe de signos española e púxoo en práctica. Non todo se comunica co abecedario, utilízanse expresións, movementos, xestos e sobre todo coas mans. Ensinoulles desde adxectivos, días do ano, días da semana, sentimentos e todo con moito humor e alegría que os cativou a todos.
Accede AQUÍ á reportaxe fotográfica.
 
Aurora e Nenúfar, 1º CS de Administración e finanzas
  • 34 lecturas

Semana dos afectos

Mar, 08/02/2022 - 23:05 — karina
Os emisarios de Cupido pasaron polas aulas para avisar que o seu servizo de mensaxería xa está operativo. 

Adícalle á persoa que aprecias uns dos teus mellores versos. Deixa a túa carta na caixa instalada no hall de entrada. Non esquezas indicar o destinatario/a e o seu curso.

Poderanse dirixirte as cartas a calquera membro da comunidade educativa, sempre e cando estean escritas dende o respecto.

Tes ata o día 11 para mandar versos afectuosos a quen queiras.

Despois de estar as cartas en cuarentena repartiranse o luns 14.

  • 121 lecturas

Obradoiro de xoguetes naturais

Dom, 06/02/2022 - 23:46 — miruca
No marco das celebracións do San Xoán Bosco, a nosa Asociación Cultural Os Matos programa un obradoiro de elaboración de xoguetes con elementos da natureza impartido por José M. García Fernández, un dos autores dos cadernos Xoguetes naturais Primavera-Verán Outono-Inverno, publicados conxuntamente co profesor Xosé López González.
 
  • 189 lecturas

Ecoauditoria da Oficina de Medio Ambiente da UDC

Dom, 06/02/2022 - 23:45 — miruca
O pasado 24 de xaneiro viñeron, dende a Oficina de Medio Ambiente da Universidade da Coruña, Verónica e Martina, para facer unha Auditoría Ambiental no noso centro. Neste proxecto analizamos os restos do día anterior acumulados no noso instituto para ser conscientes do lixo que xeramos e valorar a posibilidade de separar os residuos segundo a porcentaxe de cada tipo de lixo previamente separado e calcular a porcentaxe de cada un.
 
Antes de nada, déronnos unha breve charla na que nos explicaron de onde veñen e as cousas que se fan no seu departamento. Faláronnos tamén sobre os residuos, a súa composición e a reciclaxe. A media galega de lixo xerada ao día por persoa é de 1,5 kg aproximadamente e vimos tamén a súa clasificación, os modelos de xestión de residuos, o ciclo da materia orgánica e os seus beneficios. 
 
Logo, fixemos a auditoría.  Primeiro dedicámonos á fase de diagnóstico para saber como está o noso centro. Para facelo, comezamos separando o lixo xerado no centro en plásticos, aluminio, papel, materia orgánica, vidro e restos. A continuación, pesamos cada unha das partes previamente clasificadas e finalmente apuntamos e interpretamos os resultados nunha táboa que nos deron. 
 
Pódese acceder ao resto das imaxes aquí. 
 
Dámari Carballo Dorado – 1° Bach A
  • 135 lecturas

Simone de Beauvoir

Lun, 31/01/2022 - 23:14 — karina

Simone de Beauvoir naceu en París o 9 de xaneiro de 1908 e finou o 14 de abril de 1986. Foi unha novelista francesa, filósofa existencialista e feminista figura importante na reivindicación dos dereitos da muller. Escribiu novelas, ensaios, biografías e monográficos sobre temas políticos, sociais e filosóficos. O seu pensamento enmárcase dentro do existencialismo e obras como O segundo sexo son elementos fundacionais do feminismo. Foi parella do tamén filósofo Jean-Paul Sartre.

 
Para celebrar o seu aniversario, o alumnado de 2º de Bach fixo un mural recollendo información sobre esta icona do feminismo no mundo. 
Accede ao álbum de fotografía AQUÍ.
  • 88 lecturas

Mulleres Premios Nobel da Paz

Dom, 30/01/2022 - 22:43 — karina
Dende 1901 en que existen os Premios Nobel da Paz, só foron 18 as mulleres merecedoras deste maior recoñecemento mundial. 
Aquí tedes unhas infografías realizadas polo alumnado de 2°A de Investigación e tratamento da información. 
As 18 mulleres en recibir o Premio Nobel da Paz aparecen por ordenación cronolóxica. 
 
  • 119 lecturas

Celebramos o Día escolar da paz

Ven, 28/01/2022 - 04:17 — miruca
O alumnado de 2º PMAR quere conmemorar o Día escolar da paz, que se celebra o 30 de xaneiro, lendo versos de Antonio García Teijeiro. 
 
A súa obra Bicos e non balas recórdanos a importancia da paz no mundo e as desastrosas consecuencias dos conflitos bélicos. 
 
Esperamos que vos gusten as súas palabras e que vos fagan reflexionar sobre a importancia de convivir en paz.
 
  • 166 lecturas

Coñecemos a nosa vila

Xov, 20/01/2022 - 22:17 — miruca
O martes 14 de decembro o alumnado de 1º ESO tivemos unha saída para coñecer mellor o noso pobo. Os nosos guías nesta visita foron Antón Niñe e Maribel Crecente, antigos profesores do IES Perdouro.

 A reunión comezou no aparcamento do instituto. Alí o profesor Niñe contounos que o noso centro foi inaugurado no ano 1978, que nos seus comezos só había cinco profesores e que máis tarde foron construídos o instituto Monte Castelo e tamén o pavillón Vista Alegre. 

Antes de iniciarmos o paseo, organizámonos en grupos de cinco persoas para preparar as respostas a un cuestionario, sabendo xa que o equipo gañador tería un agasallo. De seguido, dirixímonos ao barrio de Torrentes, onde nos falaron da historia de Burela. Destacáronnos que estivo habitada desde a Prehistoria, que agora pertence á Mariña Central, que é o concello número 314 de Galicia -despois de segregarse no ano 1995 do concello de Cervo- e que na actualidade conta con 9.498 habitantes e a súa actividade máis importante é a pesca. Tamén nos falaron dunha empresa que tivo gran importancia na vila, a fábrica de ECESA, máis coñecida como a fábrica de caolín e que hoxe en día permanece pechada. Como curiosidade, aprendemos que no cabo Burela hai unha rosa dos ventos coas coordenadas da vila, que o torque de Burela pesa 1874 gramos, que hai restos arqueolóxicos romanos na zona dos Castros ou que os barrios máis antigos son Vila do Medio e a rúa Pascual Veiga. 

Despois dunha boa andaina, chegamos á igrexa de Vila do Medio, unha das catro coas que conta Burela. Deste edificio contáronnos moitas cousas, como que se construíu no século XII e que no século XVII sufriu un incendio. Tamén que entre os séculos XIV e XV se realizaron nela unhas importantes pinturas de estilo gótico onde se recollía en imaxes a vida de Xesús para explicar esta historia á xente que non sabía ler. Estas pinturas foron recubertas con cal no século XVI, cando a igrexa acolleu persoas afectadas pola peste. Tamén nos dixeron que o templo estivo aberto ata o ano 1962, data en que este se pechou e se inaugurou o de nova construción. Con este cambio, a igrexa de Vila do Medio caeu no abandono e pasou a ser utilizada como almacén para gardar os carros e a palla, ata que a principios dos anos noventa se restaurou e volveuse a abrir no ano 1994. 

Ademais de aprendermos historia, tamén vimos un Belén moi bonito e soubemos que é colocado polos veciños e veciñas durante tres días de traballo. 

No camiño de volta ao instituto, os nosos guías aínda nos falaron do faro de Burela, que é realmente unha baliza, e explicáronos o que é unha rasa continental como a que vai de Burela a Asturias. En pouco tempo, aprendemos moitas cousas sobre o noso pobo. 

Se queres ver as imaxes do itinerario, mira o vídeo ou preme aquí.

 Ángel Blanco, Hugo Domínguez e Sara Rodil - 1º ESO

  • 131 lecturas

Feliz 2022!

Lun, 03/01/2022 - 21:06 — miruca

 

  • 118 lecturas

Charla do Plan Director sobre adicción aos videoxogos

Lun, 03/01/2022 - 21:04 — miruca

O xoves 2 de decembro veu un garda civil chamado Ramón Peña a falarnos sobre os videoxogos e demais aspectos relacionados con eles. Falounos mentres ía pasando unha presentación con diferentes vídeos e fotos tratando o tema. Primeiro, presentouse coma un garda civil ao que lle gustaban moito os videoxogos, ensinounos as súas contas dalgúns videoxogos e mais o seu ordenador, moi potente, para xogar. Todo isto, eu penso que para ir pouco a pouco chamando a nosa atención e introducíndonos no tema do que estaba a falar. 

Despois, ensinounos un vídeo de Elxokas, un streamer galego bastante coñecido pola xente nova, que trataba o tema do xogo competitivo e a súa comparación cos deportes. Chegamos á conclusión de que non é o mesmo un deporte onde fas exercicio físico ca xogar diante do ordenador. Iso, en realidade, non se pode considerar deporte. Tamén nos puxo de exemplo a Elxokas, explicándonos que, a pesar de ser streamer, el ten uns estudos detrás diso e se lle vai mal na súa carreira como streamer podería dedicarse a traballar como enxeñeiro, que foi para o que el estudou.

Falounos tamén sobre os diferentes tipos de negocio dos videoxogos, que son: 

• Os de pago por licencia, nos que ti pagas por ter o xogo, xa sexa por disco, por tarxeta ou dixital; 

• os gratuítos, pero con anuncios; 

• os de suscrición, nos que, con esa suscrición, tes unha variedade de xogos 

• e os máis importantes, os xogos Freemium, onde hai micropagos e o resto é totalmente gratis e de fácil acceso. Obteñen beneficio a partir da xente que gasta neses micropagos que soen dar vantaxes dentro do xogo. Ata hai psicólogos dentro das empresas creadoras deses xogos que estudan como manipularnos para gastar diñeiro no seu xogo. Normalmente, neses xogos hai moedas propias que podes comprar co teu diñeiro real. 

O que nos veu dicir Ramón é que xogar moito ten consecuencias negativas e que os videoxogos están feitos para producir adicción e para que as empresas que os crean gañen diñeiro. 

Podedes ver imaxes da charla AQUÍ. 

Mateo Docal Sampayo – 2º ESO C

  • 170 lecturas


by Dr. Radut