O alumnado de 3º ESO participou no programa Spring Week entre os días 14 e 20 de abril na vila de Mondariz-Balneario. Nesta estadía de inmersión lingüística en lingua inglesa, o alumnado practica e mellora o seu dominio do idioma dende un enfoque comunicativo, especialmente oral, no que combinan as tarefas de aula con outras actividades lúdicas.   

No primeiro día o grupo visitou Mondariz-Balneario para coñecer mellor este concello, pequeno en tamaño pero dunha historia moi rica que garda relación coas súas famosas instalacións termais, e nos días sucesivos coñeceron outros puntos de interese da vila e a contorna, como o Castelo de Sobroso.

Nas aulas os rapaces e as rapazas do noso centro e doutros institutos elaboraron, en pequenos grupos, diferentes proxectos sobre "sustainability", que presentaron o último día diante de todos e todas. Polas tardes participaron en actividades lúdicas e diversas como archery, jungle trek, wildlife identification, horse riding..., para completar unha experiencia que foi moi intensa e enriquecedora.

O programa foi convocado pola Consellería de Educación e impulsado polo Departamento de Inglés do noso centro e a profesora Lucía, que acompaña o alumnado.