O Ministerio de Educación e Formación Profesional e as administración educativas das Comunidades Autónomas acordan flexibilizar as prácticas e o calendario escolar, para que o alumnado da Formación Profesional poida superar o curso pese ás condicións excepcionais.

A duración da Formación en Centros de Traballo (FCT) limitarase de maneira excepcional ás horas mínimas recollidas na normativa básica, é dicir, 220 horas. Asemade, integrarase de forma excepcional o módulo de FCT con un módulo de Proxecto, para que se poidan abordar os obxectivos asociados ó entorno laboral. Esta medida afectará tanto á FP Básica, como á de grao medio e superior.

As probas de acceso á FP de grao medio ou superior tamén serán pospostas se é preciso.

Acceso á nota de prensa na ligazón. 

Hai uns días, o alumnado de 1º e 2º curso do ciclo básico de Servizos Administrativos e o alumnado de 1º curso do ciclo medio de Soldadura e Caldeiraría, desfrutaron do obradoiro “Habilidades Sociais para a convivencia e afrontamento da presión do grupo”. O obradoiro, impartido por Ramón Molina, da empresa Arelar Xestión Socioeducativa, trata de favorecer a prevención da drogodependencia, dotando ó alumnado de habilidades sociais e estratexias para combater a presión exercida polo grupo de iguais, factor tan influente e determinante na adolescencia.

A actividade busca espertar a conciencia no alumnado mediante un enfoque activo e construtivo da aprendizaxe, empregando para elo distintas dinámicas que levan á reflexión, intercambio de ideas e adquisición de coñecementos, á par que se fornece a autoestima do alumnado, se desterran mitos sobre o consumo de certas drogas e se desenvolve a competencia social para que os máis novos sexan quen de saber dicir non ó consumo de sustancias nocivas, promovendo as relacións positivas e a convivencia.

Durante este curso, e como iniciativa para promover a convivencia no centro e a integración, leváronse a cabo xogos durante os recreos, promovidos por un grupo de alumnas voluntarias de 1º curso do ciclo medio de Atención a persoas en situación de dependencia e un grupo de alumnado do curso de 3º da ESO.

Sen dúbida, o brilé foi o que tivo máis éxito! 

Esperando voltar pronto ás clases para seguir xogando e convivindo! 

A Garda Civil  visitou o noso centro de novo, nesta ocasión para impartir a charla para prevención do consumo de drogas e alcol ó alumnado de 3º e 4º da ESO, 1º e 2º da Formación Profesional Básica e 1º do ciclo medio de Soldadura e Caldeiraría.

Na sesión informouse ó alumnado dos distintos tipos de drogas e as consecuencias do seu consumo, desmitificando incluso algún tipo de drogas das que a miúdo temos unha imaxe como menos daniñas. O certo é que calquera abuso de sustancias ten consecuencias, ben sexa a curto ou a longo prazo, pero todas elas van ter efectos na nosa saúde, tanto física como mental, aspecto que poido ser coñecido polo alumnado a través dos exemplos indicados pola axente.

Asemade, tamén se abordaron cuestións legais relativas á tenencia e tráfico de sustancias.

En calquera caso, as drogas e alcol non deben ser unha elección para o tempo de ocio, instando ó alumnado a apostar por un ocio responsable, baseado en hábitos de vida saudables.

No mes de febreiro Isabel e Icía, do centro Quérote Máis, impartiron un obradoiro de Educación Afectivo-Sexual ó alumnado de 3º da ESO. Na actividade abordáronse cuestións de tipo preventivo en materia de educación afectivo-sexual pero tamén aspectos vencellados coa afectividade e as relacións de parella (orientación e identidade sexual; promoción do diálogo, asertividade e empatía nas relacións de parella; abordaxe dos límites e responsabilidade persoal nas relacións). Trátase de proporcionar información fiable que permita ó alumnado vivir a sexualidade/afectividade de maneira satisfactoria  e responsable, dotando de estratexias e coñecementos neste sentido.

No mes de febreiro, a Garda Civil volveu ó noso centro, nesta ocasión para impartir unha charla sobre o acoso escolar ó alumnado de 1º e 2º da ESO e 1º e 2º da Formación Profesional Básica.

O alumnado poido coñecer os distintos tipos de acoso, que van máis aló da violencia física, e como outras formas de maltrato como a exclusión ou calquera outro tipo de violencia psicolóxica son tan daniñas coma a primeira. Asemade, o auxe das novas tecnoloxías provoca que en moitas ocasións o acoso se leve a cabo tamén a través destes medios. Así, o ciberbullying é unha ameza ininterrompida para o acosado, pois aumenta a súa humillación pública por unha banda, e pola outra, o acoso traspasa nestes casos as fronteiras do fogar, ó ser a conexión á rede unha constante, instalándose a inseguridade na vítima de xeito permanente.

Como cada ano, o 30 de xaneiro conmemórase o Día Escolar da Non Violencia e a Paz. Declarado no 1964, a iniciativa xurdiu de forma independente por parte do profesor Llorenç Vidal, como un xeito para promover a educación na tolerancia, solidariedade, concordia, respecto ós dereitos humanos, a non violencia e a paz. O día elixido para a conmemoración coincide ademais co falecemento de Mahatma Gandhi o 30 de xaneiro de 1948.

Como exemplo de entendemento e unión, o alumnado dos distintos cursos elaboraron o Muro da Paz, decorando caixas a modo de ladrillos, nos que plasmaron palabras e frases vencelladas coa convivencia e non-violencia.

Entre todos e todas podemos construír muros de paz, só temos que poñer da nosa parte e ter en conta as cuestións que indica o noso alumnado na súa construción como elementos fundamentais para unha convivencia positiva e enriquecedora: amabilidade, amor, amizade, unión, sorriso, ledicia, empatía, igualdade, respecto, mesmos dereitos...