Índice, Conferencias, Cursos en liña, Documentación, Eventos, Notas de prensa, Prácticas

One Health. Un planeta, unha saúde

Ven, 19/11/2021 - 11:02

A doutora Marta López Alonso, profesora de patoloxía animal na Facultade de Veterinaria do campus de Lugo, impartiu este mércores 17 de Novembro a conferencia titulada One Health. Un planeta, unha saúde.

Nesta amena e didáctica charla, a doutora Marta López explicou o concepto de One Health, unha saúde, e a importancia que está a adquirir nestes últimos 20 anos, especialmente a partir da COVID-19.

Así o alumnado de primeiro de StemBach viu a importancia que ten a colaboración interdisciplinar entre médicas/os, veterinarias/os, investigadoras/es que traballan a nivel local, nacional e global pola saúde das persoas, animais e medio ambiente.

Ao final da conferencia as/os asistentes propuxeron medidas para aportar o seu gran de area na mellora do medio ambiente como, reutilizar, reciclar e reducir, consumir produtos locais e nos que se prime o benestar animal, entre outras medidas.

Álbum: Sen categoría -> StemBach 21-23. Conferencia One Health

Práctica 5. Ensaios físicos en madeira

Ven, 12/11/2021 - 12:53

Este mércores 10 de novembro, o alumnado de primeiro curso de STEMbach, supervisados polos profesores Xoán Carlos Rodríguez, Demetrio Hermida, Verónica Varela, Ana Rodríguez e Inmaculada R. Lahoz, realizaron tres ensaios físicos en mostras de madeira no laboratorio de ensaios do noso IES.

Máis específicamente, o alumnado divididos en tres grupos de catro, realizaron ensaios de dureza Brinell, de resistencia á flexión estática e, de resistencia ao impacto (resilencia) co péndulo de Charpy. Posteriormente, a partir dos datos experimentais obtidos, realizaron os cálculos segundo as distintas normas destas propiedades mecánicas.

Álbum: Sen categoría -> StemBach 21-23. Práctica 5

Práctica 4. Distribucións bidimensionais. Relacións entre dúas variables estatísticas. Regresión lineal

Ven, 05/11/2021 - 10:27

Este mércores, 3 de Novembro, os docentes do departamento de matemáticas do noso IES, José Luis Iglesias e María José Macía impartiron un seminario de estatística aplicada para tratamento de datos experimentais.

Nesta práctica, Distribucións bidimensionais. Relacións entre dúas variables estatísticas. Regresión lineal, o alumnado de primeiro de STEMBach viu os fundamentos matemáticos da regresión lineal, polinomial e exponencial, utilizando como exemplos os datos obtidos por eles mesmos nas prácticas anteriores.

Álbum: Sen categoría -> StemBach 21-23. Práctica 4

Práctica 3. Ensaio de compresión de formigón con esclerómetro

Ven, 29/10/2021 - 10:15

O mércores 27 de Outubro, o alumnado de STEMbach levou a cabo a súa terceira práctica deste curso.

Nesta sesión, as profesoras Verónica Varela García e Ana Rodríguez López, explicaron o procedemento para obter a resistencia á compresión dunha probeta de formigón cun esclerómetro ou martelo de Schmidt a partir da medición do índice de rebote.

Deste modo o alumnado obtivo experimentalmente o índice esclerométrico. Posteriormente, mediante un axuste non lineal (polinómico), calcularon a resistencia á compresión do formigón en MPa.

Así mesmo, o alumnado, baixo a supervisión dos profesores Xoan Carlos Rodríguez e Inma R Lahoz, remataron a práctica anterior, é decir a realización de medidas por refractometría e polarimetría das disolucións de azucre e alcohol.

Con estes datos experimentais, realizaron axustes lineais empregando as rectas de calibración. A partir destes axustes lineais determinaron a concentración en sacarosa da mostra problema, así como, o grao alcohólico da mostra de augardente.

Álbum: Sen categoría -> StemBach 21-23. Práctica 3

Práctica 2. Medidas por refractometría e polarimetría das disolucións de azucre e alcohol. Cálculos de concentracións

Ven, 22/10/2021 - 11:44

O mércores 20 de Outubro, o alumnado de primeiro de STEMbach levou a cabo a súa segunda práctica deste curso. Como no anterior caso, esta práctica foi supervisada polos profesores Xoan Carlos Rodríguez e Inma R. Lahoz.

O obxectivo desta práctica, Medidas por refractometría e polarimetría das disolucións de azucre e alcohol. Cálculos de concentracións, foi o emprego adecuado dos instrumentos de laboratorio que se basean na refracción da luz e na rotación da luz polarizada. Así como, construir rectas de calibrado e facer medidas de concentración de azucre dunha mostra problema e do grao alcohólico nunha augardente.

Nesta sesión, a partir das mostras patrón de diferente concentración coñecida de sacarosa preparadas previamente na primeira práctica, a metade do alumnado en grupos de 3, realizou medidas do índice de refracción con refractómetro de Abbe e a outra metade, tamén en grupos de tres, mediu o ángulo de rotación óptica. A partir destas medidas obteranse as rectas patrón correspondentes.

Tamén mediron, empregando estas dúas técnicas, unha mostra problema de concentración descoñecida de sacarosa, da que determinarán posteriormente a súa concentración de azucre por medio dos axustes lineais dos seus datos.

Álbum: Sen categoría -> StemBach 21-23. Práctica 2

Práctica 1. Preparación de disolucións

Mér, 20/10/2021 - 08:43

O pasado mércores 13 de Outubro, o alumnado de STEMbach levou a cabo a primeira práctica deste curso. Esta práctica foi supervisada polos profesores dos ciclos da familia profesional de química do noso IES, Xoan Carlos Rodríguez e Inma R. Lahoz.

O obxectivo desta práctica, Preparación de Disolucións, foi a familiarización do alumnado co material de laboratorio empregado na preparación de disolucións, así como, a realización de cálculos de masas, volumes e molaridades.

Máis concretamente, o alumnado en grupos de 3, preparou disolucións de diferentes concentracións de sacarosa (8, 16, 20 e 24 % m/v) e de etanol en auga (5, 10, 15, 20 % v/v). Estas disolucións gardadáronse, previamente etiquetadas, no conxelador e, empregaránse na próxima práctica; as disolucións de sacarosa, para determinacións analíticas cuantitativas mediante polarimetría e refractometría e, as disolucións de etanol, para determinación do grao alcohólico.