Publicación no DOG do 26 de febreiro da Orde do 10 de febreiro de 2020, pola que se convocan axudas para a realización de actividades de formación en linguas estranxeiras no ano 2020, destinadas ao alumnado dos centros docentes sostidos con fondos públicos, en réxime de concorrencia competitiva. O prazo de presentación remata o 26 de marzo. Para máis información sobre este programa, así como para atopar a aplicación "en liña" que se menciona na convocatoria prema no enlace. Véxase, ademais, o cartel informativo adxunto da dita convocatoria.

Marzo é o “mes da MULLER” e son moitas as actividades que nestes días promovemos -desde o Equipo de Igualdade, Biblioteca e departamentos didácticos- para honrar a súa figura. Continuamos, deste xeito, a xeira emprendida co “Día contra a violencia de xénero” ou coa celebración do “Día da muller e a nena na Ciencia”, encamiñada a sensibilizar e visibilizar a valía feminina na sociedade, lembrando a necesidade e seguir loitando pola igualdade de dereitos e oportunidades entre mulleres e homes.

Asistiremos á protección de documentais, pezas teatrais, presentación de libros, obradoiros de creación audiovisual, charlas, lecturas, regueifas, exposicións... que nos permitirán coñecer, por exemplo, a evolución na visión da muller na arte, as problemáticas que teñen sufrido e sofren, como se vivía a afectividade en tempos de guerra... porque, malia que aínda queda moito por andar, é tarefa de todxs peneirar o camiño, e tentaremos que, polo menos dentro da nosa comunidade educativa, as mulleres deixen de ser “invisibles”...