Continuamos coas visitas educativas relacionadas con diversos temas do currículo. Neste caso o alumnado de 2º de ESO percorreu a cidade vella coruñesa para estudar in situ as características do mundo medieval. Foron acompañados por Alberto Alonso, noso profesor de Xeografía e Historia. Aí temos as fotos do alumnado (e da cidade):
Actividade "A cidade medieval"
3º de ESO nun Concerto da sinfónica
Estes foron días para 3º de ESO. Aquí os vemos coa profesora de música asistindo a un novo ensaio da Orquestra sinfónica de Galicia. As regalías da foto correspóndenlle á inconmensurable Janna Karatas.
Tamén celebramos o Día do amoooor (videlicet "O Santo Vai Lentiño"), cangado de purpúreos caraveis. Pero diso non imos poñer foto (que as hai, e moi boas), por aquilo de non dar envexa (ou non sentila, cadaquén escolla).
O día 30 de xaneiro celebramos o Día da Paz. O equipo de dinamización da Biblioteca puxo da súa parte para facer visible o compromiso da comunidade educativa de Elviña coa non violencia. O mal tempo non permitiu moitas alegrías fóra do centro (lamentablemente non houbo saída ao patio nin concentración, coma o ano pasado), pero dentro do insti... ¡ai, dentro do insti!... houbo compromiso dabondo: víronse vídeos, fixéronse murais e cada un, deixou a súa pegada na loita pola paz.
Mesmo o martes pola tarde pasaron polo instituto algunhas ratiñas non pouco presumidas que engadiron as súas pegadas ás dos nosos rapaces. Cando a ocasión é boa, benvidas sexan...
Os ratos que viñeron do Alborada
Desta vez, o noso Carlochos fixo vídeo da xornada, coa súa habitual pericia de director e mesmo guionista. Deixamos o enlace coa súa canle de Youtube e engadimos uns versos de Blas de Otero (a poesía, esencial humanidade na palabra enchida de senso e emoción, arma poderosa dos pacíficos) pertencentes ao seu libro Pido la paz y la palabra (1954).
Creo en la paz. He visto altas estrellas, llameantes ámbitos amanecientes, incendiando ríos hondos, caudal humano hacia otra luz: he visto y he creído.
287 rapaces e/ou rapazas 42 profesores, profesoras e persoal do centro de ensino 50 m2 de instalacións do IES Elviña 100 pratos de cartón (contra o cambio climático) cubertos varios unha chea de ricos entrantes, postres... 40 Kg de orixinalidade e gañas 50 Kg de bo humor e 2 toneladas de paciencia familiar (benditas nais...!)
PROCEDEMENTO
Póñanse os rapaces, os profesores os pratos e a chea de ricos entrantes e postres cos cubertos no soto das instalacións do IES Plurilingüe Elviña ás 12:10 horas do día 30 de novembro. O bo humor e a paciencia familiar xa se dan por feitos, tratándose das familias e do alumnado máis rumboso da Coruña (que ninguén se nos enfade, xa dixemos que temos bo humor). Axítese todo ben e déixese acougar vinte minutos.
Et voilà! Bon appétit! Xa temos preparadas as comidas do outono do IES Elviña
III Concurso de "comidas de outono"
Como xa ven sendo tradicional no noso centro o Departamento de dinamización da lingua galega organiza a finais de novembro unha xornada lúdica adicada ao pracer da mesa autumnal, a saber, o Concurso de comidas de outono, que xa vai pola súa terceira edición. Xa se sabe que o de gañar só é unha fermosa honriña para un par de privilexiados; aquí o importante é compartir, pasar un bo chisco xantando as creacións culinarias d@s compañeir@s (e dos demais membros da comunidade escolar, que tamén adicaron a súa tarde a preparar as súas delicatessen). E iso foi o que pasou: alegría para a rapazada (sobre todo, pero non só) no segundo recreo e unha xornada para lembrar.
Nesta ocasión fixéronse máis de 30 receitas, desde as tradicionais castañas cocidas (máis otoñal non se pode) ata as delicias de cenoura e cabaza que fixeron as ídem da populosa concurrencia. Un ano máis, o chocolate saiu triunfante, coa receita de gulosas galletas de Fernando (2º ESO), que levou a palma.
Unha mención especial para Arturo Piñeiro, que deixou abraiado a todo o mundo coa súa Biosfera de outono con aires de vainilla e menta. E abofé que estaban ben saborosos eses ventos con sabores de novembro. Bravo, Arturo!
O noso experto director de cinema Carlochos fixo este vídeo sobre a xornada, adicado a nosa compañeira Pilar, que se xubila en marzo. Que a súa xubilación sexa venturosa!
Cando a xornada comeza, aínda entre as abafantes néboas da mañá, van chegando os rapaces á sinistra biblioteca do IES Elviña (as teas das arañas e as persianas baixadas dan conta do abandono do lugar). En fin, que se unha biblioteca xa é de seu arrepiante no noso país, imaxínense vostedes o sentimento de afogo e terror no día dos defuntos... Grazas á colaboración dos diversos departamentos, o espazo puido engalanarse para tan fúnebre ocasión: testemuñas tácitas os esqueletes que saíron dos armarios para escoitar as historias de aparecidos e asasinatos que leron os rapaces (Esconxurados quedaron sapos, demos, cabras e bruxas!). En fin, que chegou o Samaín e foise un ano máis, sen que o sangue chegase ao río... pero si ao fío cortante dos coitelos e dos vampirescos cabeiros que luciron as pantasmas voadizas que percorrían os pasadizos do castelo, quero dicir, os andares do instituto...
Coma homenaxe a María Victoria Moreno, á que se adica o Día das Letras Galegas 2018, os nosos compañeiros de Lingua galega e do Departamento de Dinamización da Lingua galega fixeron no centro varias actividades conmemorativas e traballos co alumnado.
O alumnado de varios cursos da ESO leu o libro Mar adiante e realizou unhas actividades de creación inspiradas nesa obra. As actividades dos rapaces foron expostas nos taboleiros de exposición do centro para seren contemplados por toda a comunidade. Poden verse aquí as fotografías da actividade e no enlace, os traballos dos rapaces.
Ademais, dentro das mesmas actividades de celebración do Día das Letras, filmouse este vídeo, traballo conxunto de alumnado, profesorado e persoal do centro, inspirado na obra da nosa autora extremeña. Parabéns a todos os que participaron na súa elaboración. Sirva como lembranza da autora na xornada institucional das nosas letras.
As imaxes e vídeos contidos nesta páxina web corresponden ás actividades desenvolvidas dentro da Programación anual de actividades do noso centro polo noso alumnado. Todas as familias e responsables legais do alumnado que aparece nelas asinaron coa matrícula un permiso específico para permitir a difusión destas imaxes a través da web do instituto ou a través das contas en espazos web e en redes sociais que son de titularidade do IES Plurilingüe Elviña. Asimesmo, familias e responsables están tamén informados do seu dereito de revogar esa autorización de uso de imaxe. Lémbrase que a descarga destes materiais visuais e o seu uso por terceiros fóra do estrito marco dos espazos e funcións permitidos pola autorización citada (isto é, a difusión meramente informativa das nosas actividades complementarias e extraescolares a través da páxina web oficial do centro e a través das contas das que o centro é titular) son ilegais, poden e deben ser denunciados. O IES Plurilingüe Elviña non se fai responsable do uso que se poida facer destas imaxes por terceiros fóra do ámbito dos espazos web que son da súa titularidade.
Coma homenaxe a 
