CS Educación Infantil

https://es-es.facebook.com/pages/category/Local-Service/Ludoteca-Parruli%C3%B1os-1452830848140893/

O alumnado do ciclo de Formación Profesional en Educación Infantil do IES de Chapela solidarízase coas educadoras infantis (0-3) en folga a prol de visibilizar a precariedade laboral na que están mergulladas.

A firma do novo convenio este mércores 22 de maio, no que se perpetúa a súa condición de desvantaxe fronte a outros colectivos cunha formación equivalente, non ten visos de darlles opción a saír a flote.

É por iso que están en loita para reivindicar un salario digno e coherente co seu labor nas escolas infantís, un labor de atención directa ás crianzas, de coidado e acompañamento no proceso de descubrir o mundo das nenas e nenos nun período tan relevante como os tres primeiros anos de vida.

É por iso que desde o IES Chapela nos solidarizamos, pois somos testemuñas do esforzo e a implicación do alumnado do Ciclo Superior de Educación Infantil que desexa ser, máis que ningunha outra cousa, educadora infantil.

E porque queremos futuro, somos conscientes de que hai que coidalo desde o aquí e agora.

Por un traballo digno, por unha educación infantil de calidade.

Sororidade!

Solidariedade!

O alumnado do primeiro curso do Ciclo Formativo de Grao Superior en Educación Infantil do réxime ordinario puxeron en marcha a última acción da actividade Vivindo o Barrio.

Nesta ocasión o alumnado, en pequenos grupos, acudiu aos diferentes centros educativos da contorna (CEIP Frián-Teis, CEIP Alexandre Bóveda, CEIP Laredo e CEIP Igrexa) para implementar as actividades deseñadas polos mesmos, na xornada matutina do pasado 10 de abril.

Os diferentes grupos foron acompañados polas alumnas do Máster en Profesorado que cursan as súas prácticas no IES Chapela, máis concretamente no Departamento de Servizos á Comunidade.

Dende o Departamento queremos agradecer a todos os centros educativos de Chapela a súa colaboración, facilitando ao alumnado contextos de actuación próximos ao seu futuro profesional.

O pasado mércores 10 de abril, o alumnado do Ciclo de Educación Infantil do réxime de persoas adultas visitamos a exposición da XX Edición do Salón do Libro Infantil e Xuvenil de Pontevedra, onde puidemos achegarnos a unha ampla variedade de propostas literarias para a infancia en lingua galega e portuguesa, presentadas arredor do fío condutor da revolución. E ao rematar, complementamos a nosa saída cun roteiro turístico para a infancia polo casco vello da cidade. Tivemos moita sorte de que nos acompañase o bo tempo!

O alumnado de primeiro curso do Ciclo Formativo de Grao Superior en Educación Infantil visitou, o pasado día 11 de marzo, o Espazo Educativo Foresta.

Trátase dun recurso de iniciativa social sen ánimo de lucro que aporta ás crianzas unha alternativa educativa diferenciada da oferta regrada.

O alumnado interactuou con todos os recursos do espazo, especialmente con aqueles naturais exteriores, que aportan significatividade e identidade a Foresta.

As persoas educadoras que desempeñan a súa labor profesional no centro resumiron a súa función e deron resposta ás múltiples cuestións do alumnado.

O pasado mércores 13 de marzo, o alumnado do Horario 2 do Ciclo de Educación Infantil do réxime para persoas adultas do IES de Chapela fixemos unha visita aos espazos MilRamas e Gándara International School en Gondomar. Deste xeito, puidemos achegarnos desde dentro a outras formas de educar e acompañar as crianzas no seu proceso de crecemento sobre a base do respecto ás súas necesidades e intereses. Moitas grazas a Iago por facernos de anfitrión con tanta amabilidade.