Dende a biblioteca do centro queremos convidarte a participar no “Reto lector” da Editorial Galaxia. Trátase dunha actividade destinada a fomentar a lectura en galego entre os adolescentes e as adolescentes de entre 12 e 16 anos de idade.

Participar é doado, despois de ler dous libros da Editorial Galaxia, só deberás enviar ao correo electrónico: galaxia@editorialgalaxia.gal dous vídeos nos que fales deles: que foi o que máis che gustou e porque os recomendarías. Os vídeos non poderán exceder os dous minutos de duración.

Un xurado composto por quince nenas e nenos de entre 12 e 16 anos será o que valore todos as propostas fixándose principalmente no poder de persuasión dos participantes, na súa claridade expositiva e na creatividade da gravación.

Os gañadores recibirán un Ipad de última xeración. Ademais, haberá cinco lotes de libros coas últimas novidades da Editorial para os cinco seguintes clasificados. O prazo de entrega dos vídeos estará aberto ata o día 31 de maio, e o fallo do xurado farase público o 12 de xuño.

Fonte: Editorial Galaxia

Radio emBrión, a emisora on line do instituto, presenta en exclusiva un espazo de entrevistas a personaxes históricos da antigüidade. O programa inicia a súa xeira cunha entrevista a Aspasa de Mileto. As alumnas Andrea Rodríguez, Sonia Mosquera e Carmela Vieitez ( 3º ESO ) recrearon, dentro da materia de Cultura Clásica, unha entrevista coa muller de Pericles na antiga Grecia.

Ligazón coa entrevista en Radio emBrión

O alumno de Bacharalato Miguel Barbazán presenta nesta sección unha nova videorecomendación. Neste ocasión vainos falar da popular serie de televisión "Serramoura", emitida na noite dos domingos pola TVG.

Miguel Barbazán Lesta fainos unha recomendación con moito ritmo. Trátase do disco "Consentimento" do recoñecido grupo Leilía. Un traballo que homenaxea a "todas as mulleres que fixeron e fan realidade a creación, a conservación e a transmisión da tradición oral de Galicia (...) personificado na figura de Eva Castiñeira, unha cantadora, unha pandereteira (...) que dende case o anonimato sementaron a nosa terra de arte e cultura"

Mariña Pérez Rei, profesora de Lingua galega e Literatura, presenta unha interesante banda deseñada do debuxante e guionista galego Miguel Cuba. Unha obra ambientada na veciña cidade de Compostela que nos fala dos problemas e inquedanzas dunha xeración de mozos sobradamente preparados que se enfronta á dura tarefa de atopar o seu lugar no mundo na actual coxuntura social e económica.

Ilduara, alumna de 2º de Bacharelato, recoméndanos o primeiro LP de The Beatles, un disco que marcou un antes e un despois na historia da música Pop. Coñece á popular banda británica, os seus inicios e a súa consegración que chegou da man de "Please, Please Me", o album que de seguido presentamos:

Despois dunha suxerencia literaria do profesor Santiago Soliño, agora o bibliotecario municipal recoméndache unha película. Porque nas bibliotecas xunto cos libros conviven outros soportes que tamén conteñen interesantes historias que non debes ignorar. Neste caso trátase da de Will Hunting, un mozo de Boston, carismático, brillante e rebelde que debe encamiñar a súa vida. Por vez primeira, e coa axuda doutros personaxes, Will toma o control dunha axistencia desaproveitada que non o conducía por bo camiño.

Pasade á sala, acomodádevos e descubride a Will Hunting, un personaxe que xa e toda unha lenda máis alá do sur de Boston. Unha película que atoparás na túa biblioteca escolar.

Comezamos con Santiago Soliño, profesor do Dep. de Filosofía, unha serie de video-recomendacións de libros e películas que a partir de agora iremos ofrecéndoche casa mes. Nesta ocasión o profesor Soliño preséntanos unha novela do autor galego Xaime Toxo, "As palabras que move o mar", unha obra que poderás atopar na túa biblioteca escolar.