O pasado xoves, 4 de abril, estreouse, no salón de actos do IES Alexandre Bóveda, o musical MAMMA MIA!, adaptación do coñecido musical baseado nas cancións do grupo sueco ABBA. A el asistiu o alumnado de 3º ESO e parte do de 1º BACH E. O 5 de abril realizaouse un pase para as familias, que encheron o salón de actos. Só un día despois, o 6 de abril, facíanse exactamente 50 anos do triunfo do grupo ABBA, no festival de Eurovisión do ano 1974, coa canción Waterloo

O espectáculo escénico foi escollido polo alumnado de 2º BACH de artes escénicas e musicais do noso centro, como proxecto de fin de curso das materias de artes escénicas e coro e técnica vocal, coordinadas, respectivamente, polas profesoras Beatriz Varandas e Marta Barreiro. Eles e elas foron os responsables do deseño da totalidade do musical (dirección, interpretación, posta en escena, escenografía, tradución de cancións ao galego -cantadas en directo-, coreografías, luces e efectos sonoros, cartelería, fotogrfía, difusión...). Por orde alfabética, participaron: Adrián B., Adrián P., Alba M., Alba P., Alejandro G., Alejandro I., Aline, Claudio, Elena, Ginés, Helena, Izan, Joel, Karol, María, Martina, Mikaela, Sarai, Sofía, Tania e Valeria.

Os nosos parabéns polo gran traballo que se demostrou enriba do escenario! Nós gozámolo a tope como público!!!!

[Poden ver a estrea premendo na seguinte ligazón: Mamma mia!]

Parte do alumnado do bacharelato artístico do primeiro curso fixo unha viaxe a Madrid centrándose no aspecto máis escénico e estético da cidade dende o martes 2 deica o venres 5 de abril.  

Comezando cunha visita libre polo centro, dedicaron a mañá do segundo día a facer un percorrido pola arte europea dende o século XIV até o XX, explorando as obras máis relevantes da colección do Museo Nacional Thyssen-Bornemizsa. O alumnado estivo moi interesado e fixo moitas preguntas á guía.

Xa de tarde coñeceron no corazón de Malasaña a experiencia do microteatro, un espazo dedicado a este formato nacido en Madrid hai unha década, realizando un pequeno obradoiro para entender mellor as súas características e asistindo a catro funcións.

Na terceira xornada visitaron o Parque Warner e na derradeira fixeron unha interesante visita ao Teatro Real.

Estamos seguras de que esta bagaxe cultural  deixará un pouso de recursos do que alumnado tirará bo proveito.

O alumnado de 4ºESO realizou a viaxe de fin de etapa a Madrid dende o martes 2 ao venres 5 de abril.

Pasárono fenomenal visitando Segovia e algúns dos puntos máis emblemáticos do centro da capital, o Parque do Retiro, o Museo Centro Nacional de Arte Reina Sofía ou o teatro Albéniz onde puideron ver o musical inspirado na novela gótica A pantasma da ópera de Gaston Leroux.

Xa na segunda metade da viaxe chegou un dos momentos máis esperados cando visitaron o Parque Warner e o Parque de Europa.

Tanto o profesorado coma os monitores acompañantes quedaron encantados coa actitude do alumnado participante, así que desexamos que a lembranza desta viaxe perdure nas súas memorias por moitos anos.

Xa está aberto o prazo para que o alumnado de 3º ESO poida solicitar o programa "Vigo en inglés". O prazo de presentación de solicitudes é do 8 ao 19 de abril, ambos os dous incluídos. 

Máis información na páxina do Concello: Vigo en inglés

Comprácenos compartir con toda a comunidade do IES Alexandre Bóveda o éxito da ex-alumna da promoción 2017/2018 Antía Álvarez Pazó, sinalada pola Cátedra Feminismos 4.0 da Universidade de Vigo (Uvigo) e a Deputación de Pontevedra como referente de excelencia científica en grao e máster xunto con outras tres mozas.

Con toda seguridade o exemplo de Antía servirá como impulso para que cada vez máis alumnas se vaian sumando ás carreiras e profesións científicas.

Pouco despois de rematar a segunda avaliación, o alumnado dos itinerarios social e humanístico de 1º bacharelato puido facer unha viaxe polo norte español coa que centrarse tanto nas creacións humanas máis modernas coma nas máis antigas, ademais de poñer en valor a riqueza paisaxística do territorio.

Algúns dos lugares máis relevantes visitados polo noso alumnado foi Frómista en Palencia, e a igrexa de San Martiño. Xa en Bilbao, fixeron unha visita autoguiada polo museo Guggenheim en Bilbao, ademais de coñecer con detalle a relevancia arquitectónica da ponte de Biscaia, a estrutura metálica máis antiga do mundo.

Chegados ao mércores 20 de marzo, visitaron Zumaia e a súa praia, Gernika e o Museo da Minaría do País Vasco en Gallarta.

O xoves 21 foi o día dedicado ao xacemento arqueolóxico de Atapuerca, aproveitando a tarde en Burgos onde ademais de visitar a catedral, houbo tempo para facer unha visita guiada pola Cartuxa de Miraflores.

Iniciado xa o regreso, na última xornada aínda houbo ocasión de visitar o Museo da Evolución Humana e a vila romana de La Olmeda.

Unha semana do máis aproveitada!

O alumnado do itinerario científico de 1º bacharelato realizou unha viaxe polo norte cantábrico a semana previa ás vacacións.

Comezando o itinerario polo parque eólico da Farrapa, a primeira xornada estivo centrada en dúas praias: a das Augas Santas ou Catedrais e a praia de Colunga ou La Griega, onde presenciaron o famoso xacemento con pegadas de dinosauros.

Xa en Cantabria, foron ás covas do Soplao, de gran valor xeolóxico, e ao parque da natureza de Cabárceno.

O terceiro día foi o escollido para visitar en Burgos o xacemento arqueolóxico de Atapuerca, ademais do Museo da Evolución Humana.

E xa no camiño de volta, houbo unha visita a Ponferrada e a Fábrica de Luz - Museo da Enerxía.

Seguro que o noso alumnado volta das vacacións coas pilas recargadas para encarar o derradeiro tramo do curso.

O venres 22 de marzo pechamos o trimestre con dúas actuacións de pop rock internacional do Grupo de Música, dirixido pola profesora Judith.

Primeiro fomos ao CEIP Plurilingüe Seis do Nadal e, a continuación, ao IES Álvaro Cunqueiro onde colaboramos co Coro do centro.

O público quedou encantado de poder gozar de boa música e o noso alumnado moi ilusionado de ver como o seu proxecto musical vai enriquecéndose con novas experiencias.