Ante a nota de prensa emitida polo BNG de Cuntis no día de hoxe, 8 de xuño de 2016, publicada no Facebook e recollida na prensa, o Equipo Directivo do CPI Aurelio Marcelino Rey García de Cuntis quere facer constar o seguinte:
O Equipo de Dinamización da Lingua Galega está a promover, como o leva feito nos últimos catro anos, unha axenda escolar para o vindeiro curso 2016-2017.
Esta axenda, como moitas familias saben, todos os anos presenta nas páxinas que separan uns meses dos outros debuxos, fotos ou outro tipo de composicións realizadas polo alumnado. Normalmente búscase unha temática común e repártese entre o alumnado: Educación Infantil fai unha debuxo conxunto e logo cada nivel de Educación Primaria (6 debuxos) e Educación Secundaria (4 debuxos) e escóllese un a maiores para completar os 12 meses do ano.
As temáticas desta axenda nos últimos anos foron as seguintes:
Axenda curso 2012-2013: debuxos da propia imprenta que a fabrica con algún poema e algunha personalización porque se realizou durante o mes de xullo cando o alumnado xa estaba de vacacións.
Axenda curso 2013-2014: personalizouse cada mes con cantigas e refráns populares relativos a cada un dos meses ou estacións do ano e con outros temas (Día da Paz, Día contra a violencia de xénero, Mes dos libros etc) con debuxos relativos á estas temáticas.
Axenda curso 2014-2015: personalizouse con frases célebres de personaxes famosos e con outros temas (Día dos dereitos humanos, Día das Letras Galegas, Día Mundial do Medio Ambiente etc.) e os debuxos estaban relaciondados con estas temáticas.
Axenda curso 2015-2016: personalizouse con patrimonio histórico de Cuntis (fontes, muíños e lavadoiros) e con reflexións sobre a lingua. Os debuxos estaban relacionados con estas temáticas.
Na axenda deste ano decidiuse seguir a traballar co patrimonio histórico e traballar os numerosos petroglifos que hai no concello de Cuntis.
Como se fai todos os anos, a persoa que coordina o Equipo de Dinamización da Lingua Galega busca debuxos sobre o que se vai traballar para repartir entre o alumnado (na ESO entregándollo directamente) e en Educación Primaria repartíndoo entre o profesorado titor e acompáñase cunha breve explicación sobre o que se vai facer.
Posteriormente expóñense durante dúas semanas (neste momento pode visitalos quen queira velos -Anexamos fotos-) e xa no final do curso expóñense só os debuxos gañadores de cada un dos meses que irán finalmente na axenda con nome, apelidos e curso do alumnado.
Para realizar este traballo, como nos últimos anos, a profesora que coordina o Equipo de Dinamización da Lingua Galega este curso busca por internet fotografías ou imaxes de petroglifos que lle sirvan ao alumnado para orientarse e realizar os debuxos. Incluso, no caso de 3º da ESO, que non encontra nada pola rede, mándaos que vaian á Biblioteca Blanco Torres para ver un petroglifo que hai alí. Posteriormente, escribe unhas pautas para que o profesorado e o alumnado saiba o que hai que facer e distribúe a proposta de traballo por clases: na ESO e en Educación Infantil púxoselle no taboleiro ao alumnado para que vise o petroglifo asignado e déronselle indicacións de como realizalo e en Educación Primaria, repartíuselle ao profesorado que nalgúns casos fixo copias e repartiunas entre o alumnado da clase e noutros non.
Pois ben, entre estas imaxes recollidas pola rede había tres delas, asignadas aleatoriamente aos cursos de 3º, 4º e 5º de Educación Primaria, que estaban sacadas dun documento público (polo tanto, ao que pode acceder quen queira) que o partido político local de Cuntis “Veciñanza” tiña colgado na rede e non tivemos a prudencia de eliminar o logo deste partido político deste documento.
Antes de nada queremos aclarar que a Coodinadora do Equipo de Dinamización non é de Cuntis e é o primeiro ano que traballa connosco, polo que en ningún momento identificou ese logo cun partido político. De todas maneiras este equipo directivo asume a responsabilidade total sobre esta cuestión e manifesta a máxima confianza no extraordinario traballo desenvolvido por esta profesora durante este curso.
Así mesmo, pedimos desculpas públicas a todos os membros da comunidade educativa se se sentiron ofendidos/as ou molestos/as por este erro totalmente involuntario e realizado con absoluta boa fe.
Queremos tamén facer constar que non tivemos ningunha queixa e/ou reclamación de ningún pai/nai e ou titor/a legal do alumnado nin do partido denunciante sobre este tema e foi unha sorpresa encontrarse con este tema na prensa e nas redes sociais o día de hoxe.
Por último, apénanos grandemente que desde instancias políticas locais se queira utilizar o centro como arma política, o que redunda no deterioro social da imaxe do ensino público, e dos/as seus/súas traballadores/as, e do prestixio do CPI Aurelio Marcelino Rey García.
Equipo Directivo do CPI Aurelio Marcelino Rey García de Cuntis