O venres 24 de novembro comenmoramos o Día Internacional da Eliminación da Violencia contra as Mulleres. Todo o centro saiu ata a praza do concello para manifestar o noso rexeitamento da violencia contra as mulleres.
O alumnado de 4º da ESO bailou unha canción de "As fillas de Cassandra" chamada Lisístrata e despois fixeron bailar a todas as persoas alí presentes.
Aquí deixamos unha pequena mostra da conmemoración
No CPI Aurelio Marcelino Rey García cremos que as nenas e as mulleres son aínda as dianas de condutas que a sociedade recoñece como violentas e mesmo doutras que aínda están aceptadas como “normais”.
“Queremos ser” integrantes dun pobo que semente actitudes nas que non se pase nin unha actuación violenta da índole que sexa –verbal, física, psicolóxica... – contra nenas e mulleres.
“Queremos medrar e vivir” en vilas, establecementos públicos e privados, na natureza... sen temor a sermos importunadas, atacadas ou mesmo asasinadas.
“Queremos ser” exixentes coas Administracións responsables de proporcionar os recursos legais e económicos necesarios para que isto poida suceder.
“Queremos ser” capaces de convivir tranquilas e en paz desenvolvendo ao máximo as nosas potencialidades sen ningún tipo de limitación ou ameaza!
Non hai escusa! “Queremos ser NÓS!”
Para conmemorar o 25N este ano decidimos facer un vídeo no que expresamos o que queremos ser e o que non queremos ser en relación coa violencia de xénero.
O lema elixido está relacionado co tema transversal deste ano.
O vídeo foi editado por alumnado do Club Feminista do centro.
O próximo luns 27 novembro ás 18:30 levarase a cabo unha sesión da Escola de Familias do CPI Aurelio Marcelino Rey García na sala de usos múltiples do Centro. Unha das preocupacións comúns, de toda a comunidade educativa é o benestar emocional das crianzas. Para favorecelo, dende o centro educativo promovemos a realización dun Obradoiro de Xestión emocional positiva dende a familia co que as familias poderedes adquirir ferramentas e coñecementos para mellorar a capacidade de regulación emocional dos vosos fillos e fillas, logrando así un mellor benestar físico e emocional. A sesión será impartida por Belén Montesa Lou e Juan Carlos Permuy psicólogos xerais sanitarios especializados na Prevención das condutas aditivas e en Terapia Familiar Sistémica. Esta sesión está organizada polo CPI Aurelio Marcelino Rey García en colaboración co Proxecto de Prevención das Condutas Aditivas no eido local do Concello de Cuntis.
O alumnado de 4º da ESO está a preparar a excursión de final de curso. Por este motivo realizaron este marabilloso deseño de camisola para vender.
Aquelas familias que queiran colaborar co alumnado de 4º da ESO comprando unha camisola poderano facer por un prezo de 8 euros a camisola de neno e 10 euros a de adulto, reservándoa até o día 1 de decembro.
O luns 20 de novembro tivemos unha visita moi especial. As señoras e señores do centro de día de Cuntis viñeron ao colexio a compartir con nós un tempo de lecer e aprendizaxe . Primeiro os nen@s fixemos unha pequena representación polo día internacional da infancia e despois compartimos experiencias e aprendizaxes sobre as formas de vida noutros tempos, os xoguetes que tiñan... O peón resistíusenos a nen@s e maiores pero, aínda así, aprendemos e pasámolo moi ben. Grazas pola vosa visita!
Álbum: Curso 23-24 -> 20N. Día mundial da infancia (Centro de día II)
O día 14 de novembro conmemoramos no cole o Día Mundial da Diabetes.
Desde o centro tiñamos previsto realizar unha andaina pola zona peonil de Cuntis, pero foi suspendida por mor do mal tempo. Subsituímos esta actividade por unha mostra de apoio e visibilización desta doenza no patio do centro.
O alumnado de 4º da ESO quixo participar no III Certame Coreografíate da AS-PG, evento organizado e xestionado pola Asociación Socio-Pedagóxica Galega, nun apoio a música realizada en galego como forma de divulgación da lingua e música galega. Neste caso escolleron e presentáronse a este concurso, cun tema musical de Fillas de Cassandra, LISÍSTRATA (varre vasoira). Animámosvos a botarlle unha ollada a esta marabillosa coreografía, “DANCEMOS CONTRA A GUERRA”. Desexámoslle moita sorte!
O pasado martes día 7 de novembro o alumnado de 1º ESO realizou unha saída á cidade da Coruña para participar en tres actividades relacionadas coas materias de Tecnoloxía, Lingua Galega e Literatura e Bioloxía e Xeoloxía. Pola mañá, asistiu na fundación de Abanca a unha obra de teatro sobre o acoso escolar cun coloquio posterior. A continuación, no Aquarium Finisterrae realizou un obradoiro sobre as focas que crían nel e visitou as súas instalacións. Finalmente, despois de xantar, acudiu ao MUNCIT para realizar un obradoiro sobre electrónica e percorrer posteriormente o museo acompañado por un guía. Foi unha xornada moi aproveitada na que aprenderon e disfrutaron moito.
O martes 7 de novembro visitou o centro Óscar Vidal, cociñeiro do restaurante Asador O Pazo. O restaurante foi galardoado cunha estrela Michelín no ano 2022.
Esta visita forma parte do proxecto "Comer e rañar" que está a traballar o alumnado de 5º de EP. Este proxecto xira ao redor das profesións relacionadas coa cociña, no marco do PDI de centro que esta curso denomínase: "Que quero ser"
Na primeira parte da actividade Óscar falou da súa traxectoria como cociñeiro. Ao rematar a mesma o alumnado entrevistouno sobre aqueles aspectos que lle espertaban máis curiosidade.
Como sobremesa realizouse un obradoiro onde aprenderon a elaborar un petisco doce do menú do seu restaurante chamado "Peido de lobo".
Queremos agradecer a Óscar a súa participación desinteresada no noso proxecto.
O día 31 de outubro celebrouse no centro o Magosto e o Samaín de maneira conxunta.
Empezamos a mañá practicando xogos tradicionais. O alumnado da ESO exerceu de organizadores e monitores do alumnado de 1º a 5º de Educación Primaria. Por outra banda, o alumnado de 6º de EP exerceu de padriños e madriñas do alumnado de Infantil.
Na segunda parte da mañá o alumnado de EP participou en obradoiros de distintas temáticas: "Sinte o medo", "Canapés terroríficos", "Catrinas" e "Cabazas, pantasmas e esqueletos" ; o alumnado de Infantil dunha obra de teatro e o alumnado da ESO practicou os xogos tradicionais.
Por último, pasamos a degustación de castañas e demos por rematada a festa.
