Día 5. Semana 4.

Bo día, familias!

E chegamos de novos ao último día da semana, polo que nos toca un VENRES CIENTÍFICO. 

Coma sempre lembrámosvos que o máis importante é a propia experimentación: manipular, observar.  O apartado de “explicación” é para que vós saibades cal é a explicación científica que hai detrás de cada experimento,  en ningún caso será para trasladárllelo aos nenos e nenas. Como xa sabedes, o que pretendemos é que pouco a pouco eles vaian chegando a conclusións, desenvolvendo así o pensamento científico, evidentemente adaptado a estas idades. Coma sempre en infantil o importante é o proceso que facemos e non tanto o resultado final (que pode ser unha ficha, unha manualidade…).

O experimento científico, é o seguinte: O BAILE DOS PALILLOS/PEMENTA

- Materiais : bandexas de plástico ou pratos fondos, palillos planos e xabón/antigraxa (tipo Fairy).

- Proceso: Poñemos a flotar os palillos planos na auga, deben facelo con moitísimo coidado. Axudándonos doutro palillo podemos tentar construír algunha forma estrelada, e así, cando lles digamos que boten unha pinguiña de xabón no medio, todos os palillos sairán correndo en sentido oposto, alonxándose da gota de xabón (onde rompeu a tensión superficial).

Isto mesmo podemos facelo cubrindo a superficie da auga con pementa negra (queda flotando na superficie da auga). Posteriormente introducimos no medio da bandexa un dedo manchado de xabón e observamos o que ocorre.

Coma sempre, lembrade de ir facéndolles preguntas que lles axuden a ir razoando: “Os palillos, flotan?”, “Que pasa ao botar a gota de xabrón?”, “E cando usamos tamén pimenta, e igual ou diferente?”. Lembrade que o importante non é que dean a resposta correcta, senón axudarlles a que observen e que razoen en función do momento madurativo no que se atopan e, sobre todo, que nos vaian contando o que elas e eles ven. 

Explicación: Como no experimento da semana pasada, isto ocorre por TENSIÓN SUPERFICIAL (forza intermolecular dos líquidos -sobre todo na auga- que vai dirixida ao interior. Para romper ditas forzas intermoleculares na superficie da auga precísanse substancias tensoactivas como os deterxentes ou xabóns).