Compostela Medieval

COMPOSTELA MEDIEVAL

No decurso desta visita guiada, os participantes asistirán a escenificacións de personaxes e situacións históricas e, para iso empregaranse documentos adaptados procedentes do Libro do Concello de Santiago (1416-1422) conservado no Arquivo Universitario como por exemplo o Documento do xuramento de dous alcaldes ou xuíces no mosteiro de San Paio de Antealtares; o Pregón coas medidas e prezos dos produtos dos mercados segundo as ordenanzas do concello; ou a Orde do concello de pechar as portas da muralla. Rematado este percorrido, os nenos e nenas participantes completarán un caderno de viaxe para asentar os coñecementos adquiridos, caderno que xunto co que se distribuirá tamén entre o profesorado servirá para seguir traballando o tema nas aulas.

COMPOSTELA MEDIEVAL é un programa aberto a todos os centros de ensino de Compostela que se vai desenvolver do 26 de outubro ao 13 de novembro. Os centros interesados, teñen que cubrir e enviar por fax ou correo electrónico a súa solicitude indicando as datas en que queren realizar a visita guiada e o número de participantes (máximo de 25 por grupo).

Nesta visita guiada os rapaces percorrerán, entre outros, os seguintes lugares:

• Porta do Camiño. É a principal porta de entrada á cidade de peregrinos e mercadorías. Coñeceremos as funcións da muralla e das portas. 
• Rúa Entremuros. Veremos un lenzo conservado da muralla.
• Algalia de Abaixo (nome medieval: Algara de Fondo). Veremos unha tipoloxía de casa e trataremos o aspecto das rúas.
• Praza de Cervantes (Praza do Campo). Era a praza comercial máis importante na Idade Media. Nela, o concello expoñía os prezos e medidas oficiais dos produtos e mercadorías para evitar fraudes.
• Praza da Inmaculada (Praza do Paraíso). Era a porta da catedral por onde entraban os peregrinos. Neste espazo traballaban moitos profesionais relacionados co atención aos peregrinos: acibecheiros, concheiros, albergueiros, cambiadores.
• Praza do Obradoiro. Diante do pazo de Xelmírez falaremos sobre o señorío da cidade e o continuo enfrontamento entre este e os cidadáns e cidadás representados polo concello. Coñeceremos a importancia de Santiago como sé eclesiástica do Reino de Galicia. Descubriremos o aspecto da catedral románica e o desenvolvemento acadado polos oficios relacionados coa construción grazas á construción do templo románico e do resto de igrexas e elementos urbanísticos da cidade
• Praterías (praza dos Ourives). Nesta praza estaban as tendas dos ourives (os prateiros) e os postos do peixe (o de peixeira era un oficio de muller). Poderemos ver a portada románica de entrada á catedral. 
• Praza da Quintana. Foi un cemiterio de clérigos e persoas importantes da cidade e a praza pública principal da cidade nos s. XIV e XV. No mosteiro de Antealtares celebrábase o nomeamento de alcaldes ou xuíces do concello que dependía do arcebispo.
• Rúa Nova. Veremos a igrexa medieval de Santa María Salomé e dous exemplos de casas medievais con soportais. Trataremos as funcións das casas: o espazo de traballo na parte baixa (tenda ou obradoiro) e a vivenda na planta superior
• Praza e porta de Mazarelos. Pola porta entraban os peregrinos da Vía da Prata e diferentes mercadorías como cereais de Castela e viño do Ulla e do Ribeiro. A praza era un importante espazo comercial onde se vendían eses produtos e mais as verduras. A porta de Mazarelos é a única porta da muralla que conservamos e a segunda en importancia en época medieval. A burguesía compostelá estaba dirixida por comerciantes.

• ALUMNADO DE 5ºA e 5ºB [16/11/09].
• ALUMNADO DE 5ºC E 6ºA [17/11/09].
• ALUMNADO DE 6ºB E 6ºC [17/11/09].