O entroido

A orixe da palabra Entroido deriva do latín “introitus” que significa entrada ou comezo da  primavera. O Entroido  é unha festa moi popular en Galiza. Aínda que tamén se celebra no resto de España e noutros países do mundo, na nosa comunidade ten unhas peculiaridades que lle dan unha personalidade propia. Destacan pola súa popularidade os peliqueiros de Laza, os cigarróns de Verín e as pantallas de Xinzo (na provincia de Ourense), e os xenerais do Ulla (onde a provincia da Coruña limita coa de Pontevedra).Mentres na cidade de Santiago se celebra un entroido moi semellante ao do resto das cidades galegas a base de desfiles, carrozas etc., as parroquias do rural intentan recuperar e perpetuar as tradicións.  Isto é o que pasa na comarca do Ulla (concellos de Boqueixón, Teo, Vedra, A Estrada) cos chamados “encontros dos xenerais”.

EXPOSICIÓN DE CARTEIS DE ENTROIDO

Que son? Os encontros son disputas verbais entre dous exércitos, un invasor e outro defensor compostos por un abandeirado, un sentinela, un correo e tres xenerais cada un .Todos van a cabalo e con uniformes que recordan os traxes militares da Francia napoleónica.O ritual que seguen é moi semellante en tódalas parroquias. A confrontación comeza cando o correo do exército atacante solicita a entrada nos dominios do sentinela defensor, e ao que responde o correo do exército defensor. Este acude a comunicarlle ao seu xeneral a situación do atranque. Logo de que os xenerais sexan sabedores da situación comeza o enfrontamento, sempre verbal , no que se burlarán de situacións da vida cotiá ou de acontecementos destacados da actualidade nacional, autonómica  e sobre todo local.Rematado o repertorio de coplas satíricas que os veciños prepararon con anterioridade, o enfrontamento acaba  con vivas á paz, á unión entre parroquias, a determinados persoeiros, aos veciños e ao público alí presente. As coplas son o centro de atención desta festividade e son utilizadas en rima octosílaba asonante, habitualmente en castrapo,e retratan situacións que afectan a convivencia parroquial, a vida política ou á actualidade dos medios de comunicación. 

Como van vestidos? O entroido do Ulla destaca pola vistosidade do seu disfrace. Os xenerais montan a cabalo e visten un uniforme que recorda aos traxes militares da época napoleónica.As súas chaquetas e sombreiros van repletas de enfeites, charreteiras, bordados, flocos, bandas e medallas.

Cal é a súa orixe? Non se sabe moi ben de onde procede este entroido pero diferentes estudos  apuntan que a súa orixe está nas guerras contra os franceses na época napoleónica. Pero no que si coinciden tódolos antropólogos é que o entroido do Ulla pode deberse “á necesidade de autoafirmación dunhas parroquias fronte a outras”.