Queridas familias

Durante estas semanas o claustro de profesores/as procedeu á revisión das programacións didácticas tendo en conta o establecido nas Instrucións do 27 de abril de 2020, da Dirección Xeral de Educación, Formación Profesional e Innovación Educativa para o desenvolvemento do terceiro trimestre do curso académico 2019/20, nos centros docentes da Comunidade Autónoma de Galicia.

Durante o terceiro trimestre seguiremos planificando e desenvolvendo actividades de recuperación, repaso e reforzo das aprendizaxes que axudarán ao alumnado a manterse incorporado á aprendizaxe durante o que queda de curso. A realización destas permitirá ao profesorado coñecer o grao de conexión do alumnado e so poderán valorarse positivamente, beneficiando sempre ao alumnado.

En Educación Infantil a avaliación realizarase tendo en conta o desenvolvemento do alumnado durante o primeiro e segundo trimestre. Esta servirá para detectar e valorar os procesos de desenvolvemento do alumnado e analizar os seus progresos e dificultades, así como as súas aprendizaxes. Realizarase un informe individualizado do alumnado atendendo ás instrucións da Consellería.

A avaliación e cualificación do alumnado de Educación Primaria realizarase tendo en conta:

• As aprendizaxes desenvolvidas durante o primeiro e segundo trimestre
• As actividades de recuperación, repaso, reforzo e afondamento das aprendizaxes xa traballadas nos dous primeiros trimestres do curso

 O cálculo da cualificación final (avaliación ordinaria) realizase do seguinte xeito:

•  Media aritmética da 1ª e 2ª avaliación
•  As tarefas realizadas a partir da publicación destas programacións poderán valorarse positivamente atendendo ao esforzo, calidade... destas. (ata un 10%)

Co alumnado con materias pendentes establecerase un procedemento específico para a recuperación de ditas materias, tendo en conta as circunstancias individuais e os medios cos que conta o alumno. O profesorado informará ás familias do alumnado que estea nestas circuntancias do procedemento a seguir.

En canto ao alumnado con necesidades específicas de apoio educativo, os procedementos e instrumentos de avaliación serán adaptados de acordo ás súas necesidades e ás medidas extraordinarias de atención á diversidade dispostas para a súa resposta educativa, considerando en todo caso a coordinación e o consenso entre o profesorado titor/especialista cos correspondentes membros do Departamento de Orientación que interveñen co alumno/a. 

Tendo en conta todo o anterior elaborarase un informe individual do alumnado, que terá un carácter informativo e orientador, no que se detallarán as aprendizaxes imprescindibles non adquiridas que deberán traballarse durante o próximo curso.

 Recordámoslles que seguimos á disposición da comunidade educativa a través do correo electrónico, teléfono do centro, abalar e páxina web para todo o que poidan necesitar.

A dirección