O mércores, 24 de xaneiro, deron comezo as actividades de preparación do Entroido deste ano no CEIP Galán, en Oseiro.
Este día o alumnado de Infantil e Primaria tivo a visita de Xurxo Fernández Carballo, felo do concello ourensán de Maceda, ex-alumno deste centro e membro da Sociedade de Felos da Serra de Corga que ano tras ano e Entroido tras Entroido percorren as aldeas de Maceda facendo soar as súas cinco chocas, botando aturuxos e levando diversión a toda a veciñanza.
Xurxo Fernández, vestido co traxe tradicional de felo, fixo un percorrido pola historia da súa vestimenta e os costumes da súa bisbarra.
A exposición estivo apoiada pola proxección de documentais e un colquio cos escolares para satisfacer a gran curiosidade que esperta este personaxe, reminiscencia dos antigos cobradores medievais de impostos.
Quizais o que máis chamou a atención ao alumnado foi a carauta de madeira, e principalmente a mitra, decorada tradicionalmente coa cara dun animal salvaxe e ameazante, neste caso un lobo.
O percorrido do felo entre a rapazada que pasou por algunha das catro sesións celebradas ao longo da mañá no Salón de Usos Múltiples, tamén provocou aplausos e risas e algún que outro pequeno susto entre os máis pequenos.
Esta actividade complementouse coa edición, por parte do Equipo de Dinamización da Lingua Galega, dunha unidade didáctica sobre os felos de Maceda que se pode visualizar e descargar nesta páxina web e na páxina web da SXPL da Xunta de Galicia.
Con esta actividade dáse inicio á programación do Entroido no CEIP Galán que pasará polos xa tradicionais mandadiños durante a semana do 5 ao 8 de febreiro, a confección de máscaras e disfraces, a exposición de carautas de felos nos corredores do centro e o Desfile de Entroido do día 9 de febreiro con todo o alumnado por Oseiro, caracterizado baixo a denominación de "Patrimonio Cultural Galego".
Todo un reto para a imaxinación!
Podedes ver fotos do felo de Maceda na Galería.
