Hoxe, 9 de xuño de 2023, os nenos e as nenas de 3°EP recibimos a visita de Rosa, a mamá de Iria Maceiras que é farmacéutica.

Contounos unha morea de cousas, algunhas que xa sabiamos e outras que eran totalmente novas para nós.

Falounos do seu traballo na farmacia, de que cada luns preparan os pastilleiros nos que colocan a medicación que as persoas precisan tomar cada día e así non esquezan tomala, isto fanno todos os luns con todas aquelas persoas que o precisan. Explicounos onde debemos botar os medicamentos que están caducados para non contaminar: na entrada das farmacias hai un contedor branco no que depositalos, chámase "punto SIGRE".

Contounos cales eran os hábitos de vida saudable, que debemos comer e todo aquilo do que non debemos abusar, nin nós nin os maiores.

Despois púxonos un vídeo no que vimos cales eran os seis fototipos de pel, o por que debemos botar a protección solar tanto se hai sol coma se está nubrado, cal é o factor que debemos usar e de canto en canto tempo debemos botalo... Díxonos que a pel era o órgano máis grande do corpo e que tiña memoria!!! Iso deixounos un pouco desconcertados e desconcertadas, pois pensabamos que a memoria só estaba no noso cerebro.

Invitounos visitar a farmacia na que traballa e aceptamos de bo grao a invitación, é unha sorte poder ver de primeira man un establecemento sanitario coma este e coñecer como traballan nel!! Quedamos en ir cando comece o curso 2023/2024, ela está a agardar por nós!!!

Grazas Rosa por dedicarnos parte do teu tempo e vir ao cole contarnos tantas cousas... Agardamos poidas volver outro día!!!

"O PAPÓN"

O pasado luns, 13 de febreiro, veu á aula de 3º EP Ignacio, o pai de Enzo, contarnos o conto "O Papón".
A avoa decide prepararlles ás súas tres netas unha sorpresa na bodega: pan con mel (esquecera que ese era precisamente o xantar preferido do papón). As netas, unha por unha, baixan polas escadas escuras, frías e misteriosas; empurran a porta e…  Se queredes saber como remata o conto invitámosvos a lelo, só vos dicimos que non podedes imaxinar o final, adiantámosvos que ás veces a forza non é imprescindible para solventar os problemas.
Grazas Ignacio pola visita, agardamos que poidas volvar outro día, gustounos moito o conto!!!

O pasado luns 13 de febreiro, veu de novo á nosa aula Susa, a avoa de Iria Maceiras, pero desta volta veu contarnos un conto titulado "A burra Ramona" de Paula Carballeira: a burra Ramona, un bo día, deixa de traballar e decide que quere voar; a súa decisión vai influír nunha chea de personaxes que, colaborando con ela, van conseguir realizar os seus soños aprazados e mesmo desouvir os mandados do exército e do rei.

Acompañáronnos nesta ocasión os nosos compañeiros e as nosas compañeiras de 4º EP pois Susa tamén é avoa de Nico.

Para facer máis amena a lectura do conto, Susa pediu axuda ao alumnado asi que, os nenos e as nenas das dúas aulas botámoslle unha man!!!

Gustounos moito o conto, agardamos que Susa poida voltar de novo á nosa aula pois encántanos todo o que nos conta e todos os xogos que nos ensina... Susa volve cando queiras!!! Agardámoste!!!

O pasado luns 16 de xaneiro veu visitarnos Modesto, o pai de Martín... Contounos un conto titulado "A xente da miña aldea"; na aldea, case todas as persoas levan pucha para cubrir a cabeza, pola contra, Pedro, un home entrado en anos non a leva, a súa cabeza está cuberta por un turbante indio. Iso supón un misterio que todos os rapaces e todas as rapazas están desexando resolver.  

Este conto levounos a descubrir que, ás veces, falamos das persoas pola súa apariencia... A rapazada da aldea comezou a indagar o por que Pedro levaba iso na cabeza e chegaron a descubrir que todo era debido a unha promesa que lle fixera a un amigo indio... Para descubrir en que consistía a promesa teredes que ler o libro.

Grazas Modesto por vir á nosa aula, gustounos moito o conto e desexamos que volvas outro día... AGARDÁMOSTE!!!