Blogue de crissap

O pasado 7 de novembro, o alumnado de 6º recibiu unha interesante e imprescindible charla sobre "O BOSQUE ATLÁNTICO", organizada polo Concello de Pontevedra.

Da man do educador ambiental Marcos Guisandes, o alumnado coñeceu as principais características do Bosque Atlántico e as especies arbóreas que habitan nel. Ao longo da sesión, puidémonos concienciar da importancia de protexer o noso bosque autóctono, moi escaso xa na nosa Comunidade, e démonos conta da necesidade de preservar e repoblar os nosos bosques con algunha das 25 especies autóctonas que aprendemos a identificar, substituíndo así algunhas das actuais especies invasoras.

Despois de todo o aprendido, practicamos a identificación de especies a través dun divertidísimo xogo.

A recuperación nos nosos bosques autóctonos non só mellorará o colorido das nosas paisaxes, senón que favorecerá o regreso de moitas especies animais que están a desaparecer debido a perda da diversidade.

RECUPEREMOS O COLORIDO E A BELEZA DOS NOSOS BOSQUES!

MÁIS BOSQUES AUTÓCTONOS E MENOS PLANTACIÓNS DE EUCALIPTOS!

O pasado xoves, 10 de outubro, coincidindo coa celebración do Día Internacional da Saída do Armario, tivemos a gran sorte de contar coa presenza de Cristina Palacios, presidenta de ARELAS, que impartiu unha charla para sensibilizar e concienciar ao alumnado sobre a necesidade de tolerancia, respecto e igualdade de todas as persoas, independentemente da súa orientación sexual ou a súa identidade de xénero.

A asociación ARELAS é unha asociación de familias de nen@s e adolescentes transexuais, cuxo obxectivo é traballar e promover a defensa dos dereitos d@s nen@s e adolescentes trans en todos os ámbitos da súa vida.

Ao  longo  da sesión, e sempre a través de exemplos e vivencias reais, aprendemos os catro elementos que conforman a diversidade afectivo - sexual: sexo asignado, identidade sexual, orientación sexual e expresión de xénero. Falouse tamén sobre os roles e comportamentos de xénero “normativos” e sensibilizámonos co colectivo LGTBI+ para así previr posibles delitos de odio no futuro,  que lamentablemente continúan presentes a día de hoxe.

 PORQUE TOD@S SOMOS DIFERENTES, RESPECTEMOS A RIQUEZA DA DIVERSIDADE!

Hoxe, a pesar do mal tempo, o alumnado de 5º gozamos dunha xornada de golf no CAMPO DE MEIS.

Grazas ás explicacións de Miguel e Javier, e á práctica previa nas clases de Educación Física, aprendemos unhas nocións básicas para poder divertirnos no campo con un pouco de técnica. 

ANIMÁDEVOS A REPETIR COAS VOSAS FAMILIAS!