O repositorio do espazoAbalar segue ampliando a súa oferta cunha selección de 31 novos contidos educativos en formato dixital baseados en distintas tecnoloxías.
Coa nova actualización do repositorio alcánzanse os 1.195 recursos para educación infantil, primaria, secundaria, bacharelato e ciclos formativos en varios idiomas.
Nesta ocasión os traballos proceden fundamentalmente:

• Da licenza de formación de José Manuel Blanco Guimarey cunha completa unidade didáctica en galego e castelán con 64 actividades guiadas para coñecer o programa de edición de imaxes GIMP.
• Da licenza de Manuel Luis Blanco Pinedo con dúas secuencias didáctica feitas co Constructor formada por 9 Obxectos Dixitais Educativos (ODEs) nos que aprenderán a falar en inglés cos compañeiros e co docente e sobre os sons da lingua inglesa.
• Da licenza de José Antonio Cartelle Cudilleiro con unidades didácticas de inglés sobre cuestións culturais de EEUU e Reino Unido.
• Dunha unidade didáctica dentro do proxecto "Contamos co deporte" da licenza de Xoán Trigo e Elia Villamarín.
• De ODEs en flash feitos pola docente Nani Lima para traballar cuestións de música e educación infantil utilizando o protocolo de cesión de dereitos.
• Das Unidades didácticas en inglés sobre Grecia e Roma feitas co exeLearning por Fernando Domènech Rey durante o período de licenza de formación.
• Das coleccións didácticas de peixes, moluscos e crustáceos de Galicia cedidas polo docente César J. Pais Balsalobre do IES Chan do Monte de Marín.
• Dunha secuencia didáctica sobre a luz e o son feita con Cuadernia durante a licenza de formación de Iria García de la Fuente.
• De tres xogos de preguntas-resposta feitos coa aplicación de Fran Macías BrincaLetras, un deles axeitado para traballar o Día da Paz.

• Acceso á listaxe dos últimos recursos publicados

Acaba de publicarse o número 64 da Revista Galega do Ensino (EDUGA) nun formato dixital que ofrece a posibilidade de consultar documentación multimedia complementaria no corpo das súas páxinas.

O volume 64 (xullo-decembro 2012) recolle, nas súas diferentes seccións, experiencias innovadoras e de investigación que poden ser de interese para boa parte do profesorado.

Índice do número 64 (xullo-decembro 2012)

Experiencias

• A historia dun proxecto de innovación. Experiencia con biorreactores  (Mariano Pazos -coord.)

• A maxia na escola  (Fernando Domínguez Dapía) 

• Desde as cavernas ás estrelas  (Carmen Presedo)

Investigación

• TDAH na educación primaria: detección temperá e intervención na aula  (María  Fiuza)  

Foro

• Xestión das habilidades no contexto da aprendizaxe permanente (José Raposeiras)
• Entre Monarquía e Nación española: o esquecemento da Galicia soberana de 1808 (Manuel Mª de Artaza Montero) 

Opinión

• Dálle tempo ao neno (José Manuel Vázquez) 

Que é?

• O arquivo de Galicia (Gabriel Quiroga Barro)

A nosa escola

• A radio escolar. Aprender de xeito divertido (Carlos Sever Valverde)

Cartafol

• Os plans de formación permanente do profesorado en centros educativos (Ángel Rodríguez Sánchez)
• Campionatos de formación profesional (Mª Pilar Álvarez Martínez)
• Plan Proxecta (Julia Taboada Martínez e Alberto Sacido Romero)
• Educando para salvar vidas (Almudena Lacomba Maruri)
• A nós vainos o consumo responsable (Maribel Landeira Varela)

Actualidade

• Galicia
• España
• Europa (Emilia Seoane Pérez)
• Internacional

Lexislación  (Venancio Graña Martínez)

Entrevista

• Iago González Iglesias, realizador do filme Máscaras (Juan Granados)

Editorial  (Juan Granados)

Mediateca

A Consellería de Cultura, Educación e Ordenación Universitaria acaba de publicar no Diario Oficial de Galicia (DOG) a convocatoria de 15 prazas para o primeiro proxecto de Formación Dual que se vai poñer en marcha en Galicia, en colaboración coa empresa Coremain. Así, iníciase un programa dirixido ao ciclo de grao superior en sistemas de telecomunicacións e informáticos cun plan de estudos de 2 anos e medio no que o alumnado compaxinará a súa formación no CIFP Politécnico de Santiago coa formación na empresa e cun contrato de traballo remunerado.

A convocatoria vai dirixida a persoas que cumpran os requisitos de acceso aos ciclos formativos, que teñan entre dezaseis e trinta anos e que non teñan realizado con anterioridade un contrato de formación e a aprendizaxe. Con carácter xeral, as persoas candidatas non poden estar –nin ter estado– matriculadas en ningunha ensinanza no presente curso académico, aínda que, de xeito excepcional, a Consellería poderá autorizar a matrícula no proxecto ás persoas aspirantes matriculadas en ciclos formativos polo réxime de persoas adultas.

As persoas interesadas en participar nesta iniciativa poderán presentar as súas solicitudes entre o día 21 e o 25 de xaneiro, as 13 horas, na secretaría do CIFP Politécnico de Santiago de Compostela. O centro fará pública a relación definitiva de persoas candidatas que cumpran os requisitos de acceso aos ciclos formativos. De entre elas, a empresa Coremain será a encargada de realizar a selección dos 15 estudantes que participen no proxecto que comezará a mediados do vindeiro mes de xaneiro.

Formación e traballo

O carácter diferencial da FP Dual consiste na combinación da formación curricular co traballo remunerado nunha empresa na que, ademais, o alumnado recibirá formación complementaria á establecida no currículo formativo correspondente, co fin de reforzar a súa preparación e mellorar a súa empregabilidade. Deste xeito, dos 2 anos e medio de duración do proxecto, o 21,7% desenvolverase no centro educativo correspondente, mentres que o restante se levará a cabo nas instalacións da empresa.

O proxecto terá unha duración total de 4.828 horas, das que 1.899  serán de formación e 2.929 horas serán de traballo efectivo. Ao longo dos dous anos e medio que dura o proxecto, o peso da parte correspondente ao traballo irá aumentando: do 45% do primeiro ano ao 72% do último curso.

No tempo de traballo efectivo na empresa o estudante terá un contrato de traballo para a formación e a aprendizaxe, de acordo co recollido no título II do RD 1529/2012, do 8 de xaneiro, polo que se desenvolve o contrato para a formación e a aprendizaxe e se establecen as bases da FP dual. Trátase dun contrato remunerado, polo que o traballador se acollerá, ademais, ao convenio colectivo da compañía e ás normas da mesmas en materia e normativa laboral. De feito, a retribución fixarase de acordo co estipulado no convenio colectivo, en proporción ao tempo de traballo efectivo que realicen.

Xa están a disposición de todo o profesorado os artigos que analizan os proxectos en acción presentados na Xornada de Formación Inicial do Plan Proxecta  e publicados agora na sección Cartafol do número 64 da Revista Galega do Ensino (EDUGA). As autoras, as profesoras Almudena Lacomba Maruri e Mª Isabel Varela Landeira, fan dúas propostas de traballo interdisciplinario, transversal e sempre centradas en estratexias activas e cooperativas entre o alumnado e o profesorado participante.

O primeiro modelo ofréceo Almudena Lacomba desde o IES Carlos Casares de Vigo (Pontevedra), ilustrado con produtos finais de imaxe e vídeo do traballo do alumnado participante na experiencia. O programa Salvavidas, da Consellería de Sanidade, ten como obxectivo traballar valores como a solidariedade e a cooperación referidos á doazón e transplante de órganos, e o equipo interdisciplinario de profesorado deste IES, como subliña Almudena no seu artigo, consegue partir do contorno próximo do alumnado para levar a cabo actividades e tarefas que consigan a súa motivación e, finalmente, contribúan á súa autonomía e ao seu espírito crítico. En suma, como tamén indica nos obxectivos, conséguese "ser quen de transformar estados de ira ou de desesperanza en estados de ilusión e de calma", en reflexionar profundamente sobre o paso dun feito negativo a unha situación de esperanza mediante accións solidarias de enorme calado. Os resultados dan conta da fondura dos efectos educativos no alumnado que investiga e, sobre todo, desenvolve a súa creatividade mediante un proxecto que involucra a case toda a comunidade educativa do centro.

Pola súa banda, Maribel Varela diríxese ao seu diario contándolle o camiño percorrido en compaña do alumnado e dos compañeiros do CEIP Pepe de Xan Baña de Santa Comba (A Coruña) durante a súa participación no programa Consumópolis, da Consellería de Economía e Industria. O proxecto parte do obxectivo e actividades específicas do concurso e amplíase a boa parte do traballo que levará a cabo o alumnado de 5º de primaria durante todo o curso. Como indica a autora, parten dunha especie de “baúl didáctico” onde podían “atopar cousas moi diversas sobre: consumo responsable, medio, publicidade, lecer e tempo libre, comercio xusto, saúde e seguridade, alimentación e unha morea de cousas máis”. Como resultado conseguiuse “unha aprendizaxe significativa, motivadora e activa” que os levou a darse conta de que “innovar e divertirse son uns bos aliados para aprender”.

Orde do 27 de setembro pola que se establecen as normas procedimentais aplicables aos concursos de traslados de ámbito estatal, que deben convocarse durante o curso 2012/2013, para persoal funcionario dos corpos docentes contemplados na Ley Orgánica 2/2006, de 3 de maio, de Educación.

Redeiras é unha rede social educativa con vocación profesional, destinada aos docentes dos centros públicos de ensino non universitario de Galicia e aloxada nos sistemas informáticos da Consellería de Cultura, Educación e Ordenación Universitaria, nun entorno profesional e fiable.
Trátase dun proxecto desenvolto por Asesores Abalar, fundamentado en tecnoloxías baseadas en software libre (ELGG e LAMP), que toma como base o núcleo da ferramenta de software libre ELGG para crear unha rede social integrada no sistema corporativo de autenticación de usuarios da Consellería que incorpora módulos e funcionalidades propias.
Así mesmo, Redeiras ofrece todas as funcionalidades propias de calquera outra rede social, como son a creación de espazos privados e individuais, a creación de espazos de grupo e creación de grupos por intereses comúns, o intercambio de ficheiros, a publicación de contidos personalizados ou de grupo, a posibilidade de compartir ficheiros e documentos, a creación de documentos colaborativos en liña, o intercambio de marcadores de internet, a publicación de contidos multimedia (imaxe, vídeo e son), un servizo de mensaxería interna para uso exclusivo entre os usuarios da rede social, etc.
 

Está dispoñible o novo número de EDUGA (Revista Galega do Ensino).

Este volume 63 (xaneiro-xuño 2012) presenta un formato web redeseñado, pero mantén as seccións xa habituais da revista: Foro, Opinión, A Nosa Escola, Experiencias, Investigación, Mediateca, Que é.

Ás anteriores engadíronlle unha nova, Cartafol, na que se poden atopar distintos relatorios de FP que formaron parte da Mostra do Ensino 2012 (ExpoCoruña, 11-14 de abril).