A Consellería de Educación e Ordenación Universitaria vén de incorporar 83 centros educativos á rede dos beneficiados polo plan de Mellora de Bibliotecas Escolares (PLAMBE). A resolución provisional pode consultarse no portal educativo, no enderezo /portal/node/2817.

Deste xeito a Consellería dá continuidade ás actuación de fomento da lectura que está a desenvolver no marco do PLAN LÍA 2010/2015 de bibliotecas escolares (Lectura, información, aprendizaxe).  No curso 2010/2011 estiveron integrados no programa 374 centros, dos que 134 son institutos de ensino secundario, o que significa que o 51% do total deste tipo de centros, de titularidade pública estaban incluídos no Plan.

A Consellería de Educación achegará no curso que vén máis de 1,6 millóns de euros ás bibliotecas escolares beneficiadas polo PLAMBE, un programa que pretende incentivar a aqueles centros que se comprometen a renovar as súas bibliotecas e a utilizalas de forma eficiente para a mellora da calidade do ensino que ofrecen ao seu alumnado. Deste xeito asignaranse contías para a renovación dos fondos da colección (contemplando o soporte impreso e o soporte dixital), así como para a renovación de equipamento e mobiliario.

Un referente nacional

A convocatoria para entrar a formar parte do Plan espertou un gran interese por parte dos centos educativos. Así, presentáronse un total de 225 solicitudes, das que a Comisión de Valoración seleccionou os 83 centros que mellor se adecuaron aos requisitos contemplados na convocatoria.

Neste sentido cómpre sinalar que as iniciativas de fomento da lectura desenvolvidas pola Consellería de Educación son un referente a nivel nacional pola súa calidade. De feito, Galicia foi a Comunidade Autónoma con máis bibliotecas premiadas - con 8 centros, máis do 30% do total dos galardoados- nos premios do ‘Concurso Nacional de Buenas Prácticas para la dinamización e innovación de las bibliotecas de centros escolares 2010’, organizado polo Ministerio de Educación.

Estes premios recoñecen as iniciativas destes centros para que as súas bibliotecas sexan espazos dinámicos que actúen como recurso didáctico e integrador para a mellora da calidade do ensino.

O conselleiro de Educación e Ordenación Universitaria, Xesús Vázquez Abad, visitou hoxe as aulas Abalar do IES Pedro Floriani, de Redondela, das que se benefician no presente curso os estudantes de 1º da ESO do centro, que dispoñen de cadanseu ordenador ultraportátil na aula.

A este respecto, o titular do departamento educativo da Xunta de Galicia salientou as múltiples oportunidades que o Proxecto Abalar e o seu portal web, espazo Abalar, ofrecen para a activa participación das familias na educación dos seus fillos, así como para a intercomunicación do profesorado coas nais e pais. Ademais, recordou o importante esforzo que supón poñer en marcha un proxecto tan ambicioso como o Abalar, co que a Consellería impulsa a integración das Tecnoloxías da Información e a Comunicación no sistema educativo.

Deste xeito Vázquez Abad recordou o compromiso da Consellería con este instituto, no que estudan 401 alumnas e alumnos, “que se manifesta ademais a través das achegas de 15.850 euros coas que se dotou á biblioteca do centro, enmarcada no Plan de Mellora de Bibliotecas Escolares desde 2010”. Neste sentido o conselleiro destacou tamén o traballo do propio centro no club de lectura desenvolvido por alumnado e profesores, “ fomentando nos máis novos o hábito lector, algo fundamental para o éxito escolar”.

Esta visita, na que Vázquez Abad estivo acompañado polo xefe territorial de Educación na provincia de Pontevedra, César Pérez Ares, enmárcase na rolda de encontros que está a realizar coas comunidades educativas de centros de ensino de toda Galicia, co fin de coñecer de preto as súas necesidades.

O profesorado galego implicado no proxecto ABALAR terá a oportunidade de formarse no uso dos encerados dixitais grazas ao convenio asinado entre a Consellería de Educación e Ordenación Universitaria e SMART Technologies.

O obxecto deste acordo, asinado hoxe polo conselleiro, Xesús Vázquez Abad, e o vicepresidente da devandita compañía, Patrick Lelorieux, é desenvolver un programa de formación que permitirá mellorar as competencias do profesorado no uso do encerado dixital interactivo e o software de aprendizaxe colaborativa.

Esta iniciativa está enmarcada no Proxecto ABALAR, a estratexia de integración das novas tecnoloxías da información e a comunicación (TIC) no sistema educativa, da que se beneficiarán o vindeiro curso 31.000 escolares galegos de 5º e 6º de primaria e 1º e 2º curso da ESO.

Ao acto de sinatura asistiron tamén o director xeral de Educación, Formación Profesional e Innovación Educativa, Jose Luis Mira; o subdirector xeral de Sistemas Informáticos da Consellería, Carlos Vázquez; o managing director de Smart España, Fernando Sanz; e o área manager de Smart Iberia, Rahim Habib.

‘Train the trainer’

Ao abeiro do acordo asinado hoxe SMART Technologies desenvolverá un programa de formación en cooperación cos centros de formación da Consellería, a través do que impartirá a 18 docentes a formación certificada e acreditada ‘Train the trainer’, en materia de encerados interactivos e software de aprendizaxe colaborativa. Estes 18 formadores encargaranse despois de transmitir os coñecementos ao profesorado implicado no Proxecto ABALAR, a través dun plan para a xestión do programa, que contempla o seguimento da aprendizaxe e recursos para os docentes, que desenvolverán en cooperación SMART e a Consellería. Neste sentido SMART Technologies dotará tamén aos centros de formación do profesorado de 21 encerados dixitais para facilitar o desenvolvemento do programa formativo.

Ademais, a compañía tecnolóxica impulsará a posta en marcha de concursos sobre creación de contidos dixitais con participación de centros educativos galegos.

Pola súa banda, a Consellería colaborará con SMART no desenvolvemento e seguimento do plan de formación, así como na xeración de contidos dixitais para a súa posta ea disposición do profesorado galego.

A colaboración entre a Consellería e SMART Technologies supón así un novo avance na modernización e na implantación das TIC nos centros educativos galegos.