Título node Learning object
Promover a educación para o consumo responsable nos centros educativos da Comunidade Autónoma de Galicia constitúe un dos obxectivos do Instituto Galego de Consumo, co obxecto de que o alumnado desenvolva as competencias que lle permitan exercer os seus dereitos como persoas consumidoras, actuando no mercado de forma autónoma, responsable e solidaria.
O concurso escolar Consumópolis contribúe a esta finalidade, xa que está pensado para promover entre o alumnado hábitos de consumo responsable, fomentando a participación dos centros educativos en actividades relacionadas coa educación para o consumo.
O Instituto Galego de Consumo participa na organización do concurso escolar Consumópolis, conxuntamente coa Axencia Española de Consumo, Seguridade Alimentaria e Nutrición (AECOSAN) e dezaseis comunidades autónomas máis.
Este concurso desenvólvese en dúas fases:
1ª Fase, informativo – formativa. Na primeira fase do concurso o alumnado ten que superar diferentes probas na cidade virtual de Consumópolis, que cada ano ten unha proposta temática diferente relacionada co consumo responsable. Desenvólvese entre o 19 de outubro de 2015 e o 18 de xaneiro de 2016, ambos inclusive.
2ª Fase, elaboración dun traballo en equipo, con premios autonómicos e estatais. Na segunda fase do concurso preténdese fomentar o traballo en equipo, e consiste no deseño, elaboración e presentación dun traballo conxunto, que reflicta dúas maneiras distintas de consumir. Desenvólvese entre o 19 de xaneiro de 2016 e o 7 de marzo de 2016, ambos inclusive.
Unha vez rematado o prazo para a elaboración do traballo en equipo, correspóndelle ao Instituto Galego de Consumo efectuar a convocatoria autonómica para premiar aos mellores traballos realizados polos centros educativos da Comunidade Autónoma de Galicia e seleccionar aos tres traballos que poderán participar na convocatoria estatal.
En consecuencia, convócase a fase autonómica do concurso sobre consumo responsable e calidade de vida: Consumópolis-11 “Ti consomes: Fano igual en todas as partes?”
Concederanse tres premios de 1.000, 600 e 300 euros para os traballos clasificados respectivamente en primeiro, segundo e terceiro lugar por cada un dos seguintes niveis de participación:
- Alumnado de 3º ciclo de Educación Primaria
- Alumnado de 1º e 2º curso de Educación Secundaria Obrigatoria (ESO)
- Alumnado de 3º e 4º curso de Educación Secundaria Obrigatoria (ESO)
Os traballos clasificados en primeiro lugar en cada un dos niveis de participación sinalados representarán á Comunidade Autónoma na fase estatal, que se celebrará en Madrid.
O prazo para a presentación dos traballos á fase autonómica comezará o día seguinte ao da publicación da presente resolución no Diario Oficial de Galicia e rematará o día 31 de marzo de 2016.