Novas

Durante 5ª e 6ª hora do 18 de novembro de 2016 celebrouse o Magosto no IES Monte da Vila coas seguintes actividades:

Magosto: asáronse castañas para todo o centro contando tamén coa colaboración da ANPA que proporcionou e repartiu refrescos.

Actuación do Coro Infantil da Confraría de pescadores de San Martiño que se celebrou ás 13:00 h. Puidemos escoitar as voces de nenos dende catro anos ata algúns dos nosos alumnos.

Ademais todo o alumnado puido pasalo ben cos xogos populares que puxo á nosa disposición o Concello do Grove.

Galería de imaxes

O día sete de outubro os rapaces de 2º de bacharelato, asistiron no Centro Galego de Arte Contemporánea a unha charla por parte do compositor Jesús Díaz, onde se explicaron os procesos de creación dunha banda sonora, a evolución da mentalidade do mundo artístico e como defenderse nese mundo laboral de artistas. Ademais, a continuación,  os alumnos puideron falar con un equipo de técnicos de Radio 3 que ían a gravar nese momento o programa “El séptimo vicio”.  O presentador, Javier Tolentino, explicou aos alumnos como se levaba a cabo un programa na radio.

A listaxe de libros de texto para o curso 2016-2017 atópase dispoñible na seguinte ligazón e permanecerá exposta ao público nos taboleiros do centro.

Debe advertirse que hai novos libros nos cursos de 2º e 4º da ESO debido á entrada en vigor da LOMCE. Asimesmo, prodúcense algúns outros cambios no Bacharelato.

O pasado sábado 18 celebramos a graduación do noso alumnado de segundo de bacharelato.

Noraboa a todos e moita sorte!

Galería de imaxes

Os resultados de Selectividade

Acodiron á proba 20 alumnos e alumnas, cun 100% de aprobados. Cabe dicir tamén que a nota media na fase xeral foi de 7,6 e que un 25% do alumnado obtivo nesta fase unha nota igual ou superior a 9. Ademais, o alumno Francisco Prol Lucio obtivo a segunda mellor nota de toda Galicia, sacando 10 en todas as materias salvo dúas (9,75 e 9,5).

Cremos que estes resultados son dignos de mención e nós, como profesorado, estamos moi satisfeitos do esforzo e traballo do noso alumnado ao longo do curso e, concretamente, nestas probas de acceso á universidade.

O xoves 12 de maio o alumnado de 3º da ESO achegouse a Arbo para descender un tramo do río Miño facendo rafting. Os alumnos puideron gozar dunha actividade no medio natural na que puxeron en práctica o traballo en equipo e fixeron deporte dunha forma divertida e diferente.

Galería de imaxes

O alumnado de 1º a 4º da ESO de Relixión desprazouse ata Santiago para visitar a catedral, o museo das peregrinacións e facer un percorrido polo casco histórico da cidade.

A pesar da choiva atrevéronse a subir ás cubertas e gozaron dunhas impresionantes vistas da cidade.

Galería de imaxes

O pasado xoves 5 de maio o alumnado de terceiro da ESO realizou unha visita ao parque eólico experimental de Sotavento, situado na Serra da Loba en Monfero (Lugo).

A visita foi guiada por dous monitores que lles explicaron multitude de conceptos sobre enerxías renovables, dende o seu aproveitamento pasando polas súas aplicacións comerciais ata a contaminación producida.

Logo visitaron unha vivenda bioclimática completamente robotizada onde lles foron explicados os principios físicos nos que está baseada e o aforro de enerxía que produce. Por último realizaron uns xogos, moi divertidos, para avaliar os coñecementos acadados. Despois de comer realizaron a viaxe de volta, chegando ás 18:00 horas ao Grove.

Galería de imaxes

Esta actividade foi realizada polos alumnos de 4º de ESO con materia optativa francés. Levouse a cabo o martes 3 de maio en Pontevedra, e participaron nela un total de 11 alumnos. O obxectivo da actividade era resolver un problema en equipo, recibindo pistas orais en francés.

A actividade organizouse en dous grupos, un de 5 persoas e outro de 6. Tiñan un total de 60 minutos para resolver o enigma. Un equipo conseguiuno, precisando de 55 minutos e 38 segundos, mentres que o outro equipo non o conseguiu, aínda que rematou por resolver o enigma nun total de 62 minutos e 21 segundos.

Os alumnos quedaron moi contentos coa actividade e déronse conta da importancia de traballar en equipo, escoitarse mutuamente e axudarse. En canto á parte lingüística tamén foi satisfactoria, xa que normalmente cando escoitan francés teñen diante á persoa que fala (a profesora) e neste caso falábaselles dende fóra da habitación. A dificultade neste caso era que só escoitaban e ademais a voz estaba un pouco distorsionada, pero aínda así entenderon o que se lles dicía.

Galería de imaxes

Xa van 10 anos de Feira Matemática e outros tantos do Concurso de Fotografía Matemática que se convoca con motivo dela. Este ano, alumnado do IES Monte da Vila participou nas categorías de ESO e Bacharelato, conseguindo o alumno Javier Guillán Rial o premio correspondente á categoría de 2º ciclo da ESO e Bacharelato. O premio, outorgado pola Asociación Galega do profesorado de Educación Matemática (AGAPEMA) e a Fundación Barrie foille entregado o pasado 27 de abril. A fotografía gañadora levaba por título “Reflexión”.

Galería de imaxes

"Descubrindo as rochas que pisas", Programa da AEPECT (Asociación Española Para la Enseñanza de las Ciencias de la Tierra).

O pasado día 21 de abril o Doutor en Xeoloxía José Francisco Canosa visitou o noso instituto da man do departamento de Bioloxía e Xeoloxía. A súa actividade comezou cunha presentación de 50 minutos sobre o traballo dos xeólogos e a xeoloxía de Galicia en xeral e da zona do Grove en particular. Unha vez rematada a exposición, o alumnado de 1º de Bacharelato A, acompañados do profesor de Bioloxía e Xeoloxía, unha profesora de Debuxo técnico e o xeólogo, saíron cara a costa onde fixeron 4 paradas: praias de Montalvo, Bascuas e A Lanzada e Mirador da Siradella. Nestes puntos recoñeceron as características xeomorfolóxicas litorais e do sistema dunar, estudaron os procesos tectónicos (fracturas e pregamentos) e observaron os granitoides, o contacto cos xistos e presencia de rochas carbosilicatadas.

A actividade rematou ao día seguinte, no que se desenvolveu un obradoiro sobre recoñecemento e identificación de rochas de Galicia, con mostras de todas as rochas que podemos atopar na nosa Comunidade.

Galería de imaxes