blogue de : Jacqueline

Ola a todos e todas!

Xa estamos vivindo os últimos días de cole e iso nótase no ambiente, máis nervios, máis inquietude, moita alegría, bo tempo... 

Como sabedes, hoxe cada neno/a levou para casa todo o que fixemos ao longo do trimestre: traballiños, debuxos, notas, fotografías... Aínda así, quería compartir con todos vós estes últimos momentos do curso. O venres celebramos os aniversarios dos nenos/as que cumprían ao final do curso e durante o verán: Vera, Julia, Pablo e Yago. Tamén podedes ver unha foto de Sara, pero o seu aniversario celebrámolo a comezos deste mes.

Tampouco quería esquecer aos maiores da clase! O vindeiro curso comezarán noutro cole e por iso fixemos unhas fotos de despedida, a modo de recordo.

Iván, Claudia, Pablo, Sara, Lucía, Rubén, Diego, Hugo, Lucas, Tomás e Lara espero e deséxovos que todo vos vaia moi ben nesta nova aventura que agora ides emprender. Non esquezades nunca esta pequena escoliña, na que vivimos e disfrutamos moito neste tempo que se fixo tan curto.

ATA SEMPRE!

Estes días tamén recibimos unha visita inesperada, pois un mago xa coñecido por moitos dos pequenos/as deixounos unha carta na aula que limos durante unha das nosas asembleas. Despois da lectura, dímonos conta que se trataba de Gonzalo, o mago da palabra que coñecimos o ano pasado e que nos mostrou a maxia e a ledicia que poden transmitirnos os contos. Nesta carta contounos que seguía polo mundo na procura de historias, contos e  persoas como os vosos pequenos/as, que xa botaba en falta. Por iso, enviounos un vídeo no que nos contou un conto moi chulo chamado "La ovejita que vino a cenar" (Steve Smallman, Joelle Dreidemy) e, ademais, deixounos un recadiño: os nenos/as debían pensar nunha mascota que acompañe ao Mago nas súas aventuras, pois así séntese só.

Puxémonos mans á obra e despois dun fin de semana para pensar, o luns votamos na asemblea que mascota lles gustaría crear aos nenos/as para enviarlla a Gonzalo. Tras varias opcións (como polo, gato, can...) a gañadora foi un LORO, pero... a este loro fatáballe algo... Tras moito pensar, dímonos conta de que había que poñerlle un nome, así que volvimos votar e o nome gañador foi o de... LOLO. O loro Lolo!

Este foi o resultado. Agardamos que vos guste e, por suposto, que tamén lle guste a Gonzalo.