INSTRUCIÓNS se estivo en contacto cunha persoa que pode ter unha infección polo novo coronavirus:
Vostede ten que permanecer no seu domicilio habitual, en corentena, durante os 10 días seguintes ao último contacto que tivo co doente.
Non deberá recibir visitas no seu domicilio.
Procure ter medios para o entretemento como libros, revistas, música, televisión, etc.
Manteña as mans limpas e láveas axeitadamente, e con frecuencia, con auga e xabón, ou empregue unha solución hidroalcóolica, se dispón dela.
Evite tocar o nariz, a boca e os ollos. Se os toca, lave inmediatamente as mans.
Ventile ben a súa vivenda.
Se convive con outras persoas no domicilio que non son contactos do caso, terá que permanecer illado nun cuarto exclusivo, se isto non é posible mantéñase a 2 metros de distancia das outras persoas e manteña unha axeitada e frecuente hixiene de mans.
Se vive só, ou todas as persoas do domicilio son contactos do doente, asegúrese de que algún familiar ou amigo poida levarlle os alimentos ou outros produtos que precise. Deixarán as bolsas fóra da casa e non entrarán na vivenda para deixalas.
Mida 2 veces ao día a temperatura para ver se ten temperatura elevada (maior de 37ºC), e estea atento á aparición de síntomas (malestar xeral, tose, dificultade para respirar). Neste caso:
- Chame ao seu centro de saúde ou pida por internet unha consulta telefónica ou chame ao 900 400 116 e coméntelle que está en corentena por ser contacto dun caso de COVID-19. Non acuda directamente a un centro sanitario.
- Se convive con máis persoas afástese delas ou procure ir para un cuarto.
- Cubra cun pano o nariz e a boca cando esbirre ou tusa, senón fágao contra a flexura do cóbado e lave inmediatamente as mans con auga e xabón ou empregue unha solución hidroalcólica, de dispoñer dela.
- Os seus contactos estreitos (estar con vostede cando presentaba síntomas máis de 15 minutos a menos de 2 metros) seguirán as mesmas recomendacións que vostede, polo que ten que informalos.