Acceso á Resolución CPInnova do curso 2021/22
A iniciativa de Contratos-Programa Innova (CPInnova) trata de constituír un instrumento de apoio aos centros para que, dentro da súa autonomía, poidan desenvolver un plan de mellora no que se permita, en función das necesidades detectadas e do proxecto educativo, potenciar, de forma prioritaria, o desenvolvemento das competencias clave, afondar no logro da excelencia educativa, incentivar o talento do seu alumnado, promover hábitos de vida saudables, impulsar unha educación para o desenvolvemento sostible e mellorar a xestión dos centros.
Nesta liña, e seguindo as directrices do Plan de Nova Arquitectura Pedagóxica no que se establece una clara aposta polos centros con espazos máis saudables, edificios máis integrados coa contorna e a paisaxe, e cun claro obxectivo de mellora da súa sostibilidade, os CPInnova supoñen unha ferramenta máis, posta ao servizo dos proxectos educativos dos centros docentes.
Con este fin, a Consellería de Cultura, Educación e Universidade facilita aos centros novos instrumentos que lles permitirán acadar os logros que perseguen. Os novos CPInnova dan mostra do compromiso da administración educativa por ofrecer aos centros educativos oportunidades e recursos para desenvolver os seus proxectos dende un enfoque innovador, e seguir afondando na procura de estratexias para cambiar dinámicas e adoptar enfoques metodolóxicos novidosos.
Sendo así, e para avanzar na traxectoria vinculada ao logro do éxito educativo emprendida en cursos anteriores e seguir reforzando a autonomía dos centros, é necesario establecer unha nova convocatoria de Contratos-Programa centrada na innovación que, aproveitando a experiencia acumulada, facilite a posta en marcha de plans específicos de mellora deseñados polos propios centros para o éxito escolar do seu alumnado.
Esta iniciativa consta de 5 modalidades, marcadas en amarelo nas que participa o noso centro:
1. O centro docente como entorno innovador de aprendizaxe a través da mellora permanente. (EDUinnova)
2. O centro docente como promotor da excelencia a través do afondamento nun ámbito de coñecemento. (EDUexcelencia)
3. O centro como dinamizador de hábitos de vida saudables. (EDUsaúde)
4. O centro educativo comprometido cos Obxectivos de Desenvolvemento Sostible (ODS). (EDUsostibilidade)
5. O centro educativo como modelo de calidade a nivel organizativo, de xestión e de funcionamento. (EDUcalidade)
Máis información sobre:
1. O centro docente como entorno innovador de aprendizaxe a través da mellora permanente. (EDUinnova)
A innovación educativa supón a achega de ferramentas aos estudantes para enfrontar os desafíos do mundo actual, non no sentido de saberes estancos, senón como competencias que posibilitan o desenvolvemento de novas capacidades e estratexias que apuntan á mellora continua.
Co obxecto de que o alumnado faga fronte con éxito ás constantes transformacións da sociedade, todas as persoas deben incorporar coñecementos, capacidades, competencias e actitudes que lles permitan acadar o pleno desenvolvemento persoal e social e continuar aprendendo ao longo de toda a vida.
2. O centro docente como promotor da excelencia a través do afondamento nun ámbito de coñecemento. (EDUexcelencia)
A procura dunha educación personalizada baséase na promoción do óptimo resultado posible para cada persoa. Promover a excelencia equivale a facilitar os recursos educativos necesarios que permitan a cada alumno e alumna chegar tan lonxe, tan rápido, con tanta amplitude e con tanta profundidade como a súa competencia lle permita.
Nesta liña, cando se centran accións nunha área definida polos seus intereses e capacidades, aumenta a motivación do alumnado, que incrementa o seu compromiso, progresa na súa aprendizaxe e fornece as súas capacidades e competencias.
O futuro consiste en construír un ensino desde as paixóns e capacidades do alumnado que o axude a personalizar a súa aprendizaxe e a súa avaliación, de forma que se fomente o talento. Trátase de motivar aos estudantes para que sexan enxeñosos.
3. O centro como dinamizador de hábitos de vida saudables. (EDUsaúde)
O benestar físico e emocional do alumnado é decisivo para a consecución dunha aprendizaxe efectiva. Dispor dunha información fundada sobre a saúde permite, ademais, contar cun xuízo válido para tomar decisións responsables sobre o coidado da propia saúde, a prevención de enfermidades ou a mellora da calidade de vida. Os centros educativos son institucións vitais para contribuír ao benestar físico e alimentario, polo que cómpre impulsar tanto a actividade física como os hábitos alimentarios ligados a unha vida saudable para que poidan ser mantidos ao longo da vida.
4. O centro educativo comprometido cos Obxectivos de Desenvolvemento Sostible (ODS). (EDUsostibilidade)
A transición ecolóxica constitúe un dos núcleos centrais da Estratexia Galega de Cambio Climático e Enerxía 2050 e doutros organismos internacionais para os vindeiros anos. A transformación cara a unha economía sostible desde o punto de vista medioambiental, circular e climáticamente neutra, ten un carácter transversal, polo que depende do compromiso de todos os colectivos da sociedade.
Neste sentido, débese garantir que todo o alumnado adquira os coñecementos teóricos e prácticos necesarios para promover o desenvolvemento sostible e, paralelamente, fomentar a sensibilización, a concienciación e a educación de calidade, xa que son fundamentais de cara a formar unha cidadanía que participe activamente para afrontar o cambio climático e garantir un desenvolvemento sostible.
5. O centro educativo como modelo de calidade a nivel organizativo, de xestión e de funcionamento. (EDUcalidade)
A autonomía dos centros para adoptar decisións sobre a súa organización e funcionamento e a potenciación da función directiva son factores clave para a promoción da calidade do sistema educativo.
É necesaria unha avaliación inicial que permita identificar a realidade do centro e o seu contexto para deseñar accións de calidade educativa que teñan por obxecto o fomento e a promoción da calidade nos centros.
