Skip to Content

Protocolo folga

Extracto regulación folga do alumnado no IES Vilar Ponte

PROTOCOLO FOLGA ALUMNADO

Mar, 25/10/2016 - 15:55

13.3. PROTOCOLO FOLGA ALUMNADO

 

O alumnado, en caso de folga, haberá de aplicar o seguinte protocolo de actuación:

  1. Cando o alcance da folga sexa exclusivamente o do propio centro a xunta de delegados redactará unha exposición dos motivos que os levan a convocar a folga na que se incluirá a súa xustificación.

  2. Cando o alcance da folga sexa superior ao propio centro ha de estar convocada por organizacións sindicais legalmente constituidas.

  3. Cando o alcance da folga sexa exclusivamente o dun grupo o delegado redactará unha exposición dos motivos que os levan a convocar a folga na que se incluirá a súa xustificación.

  4. O presidente da xunta de delegados ou o delegado de clase entregarán a acta de convocatoria de folga, xunto coas actas de asembleas dos grupos, a un membro do equipodirectivo ou en secretaría, con non menos de 48 horas de antelación ao desenvolvemento da folga.

  5. Dada unha convocatoria de folga, sexa de ámbito interno ou externo, a adhesión dos alumnos á mencionada folga será decidida en asembleas de grupo, convocadas por cada grupo, da que será preciso levantar acta, na que se incluirá unha lista dos participantes na mesma (Anexo II Folga). Esta acta será entregada ao equipo directivo con 48 horas de antelación ao día da folga.

  6. No caso dos grupos de 1º e 2º de ESO será necesaria unha autorización individual asinada polos pais ou titores legais por cada un dos participantes na folga (Anexo I Folga).

  7. En caso de que nunha convocatoria de folga se decidise colectivamente non secundala, o alumnado que decida individualmente facelo, deberá presentar un documento de comunicación por escrito, onde consten os seus datos persoais, curso no que está matriculado, o motivo da folga, a duración da mesma e a súa adhesión á mesma. Este documento deberá ser entregado a un membro do equipo directivo ou en secretaria, con non menos de 48 horas de antelación ao desenvolvemento da folga.

  8. En caso de alumnos de 1º ou 2º de ESO, o documento deberá estar asinado polos pais ou titores legais.

  9. En calquera dos casos anteriores o centro deberá informar por escrito aos pais/nais ou titores legais de todo o alumnado menor de idade das seguintes cuestións: (Anexo III Folga)

    • As datas nas que o alumno/a menor de idade secundará a folga.

    • Que nesas datas, co fin de non entorpecer o normal desenvolvemento das clases, o alumno/a non deberá asistir ao centro.

    • Que no caso de que un alumno/a acudir ao centro non se lle terá en conta a súa decisión de participar na folga e deberá asistir a clase con normalidade

(Actualizado o 25/10/2016)

 

DEREITO Á FOLGA DO ALUMNADO

Lun, 29/02/2016 - 11:00

 DEREITO Á FOLGA DO ALUMNADO

 

A folga do alumnado non está recollida explicitamente, senón que se pode interpretar como unha consecuencia do dereito de reunión, no artigo 8 da LODE de 1985, modificado pola LOE de 2006, na Disposición derradeira primeira, nos seguintes termos:

«Co fin de estimular o exercicio efectivo da participación dos alumnos nos centros educativos e facilitar o seu dereito de reunión, os centros educativos establecerán, ao elaborar as súas normas de organización e funcionamento, as condicións en que os seus alumnos poden exercer este dereito. Nos termos que establezan as administracións educativas, as decisións colectivas que adopten os alumnos, a partir do terceiro curso da educación secundaria obrigatoria, con respecto á asistencia á clase non terán a consideración de faltas de conduta nin serán obxecto de sanción, cando estas fosen resultado do exercicio do dereito de reunión e sexan comunicadas previamente á dirección do centro.»

Pódese entender pois, que este dereito está recoñecido a partir do terceiro curso de ESO, como exercicio do dereito á toma de decisións colectivas. Establécese tamén a necesidade de que os centros regulen nas súas normas como deberá concretarse este dereito.

Polo tanto estas NOFC establecen que:

  1. Teñen dereito á folga os alumnos de 3º de ESO e cursos superiores.

  2. Teñen dereito a sumarse á folga a título individual os alumnos de 1º e 2º de ESO, coa autorización expresa dos pais ou titores legais.

  3. En calquera caso o centro informará aos pais ou titores legais dos alumnos menores de idade que secunden a folga.

  4. O alumnado ten dereito a adherirse a convocatorias de folga externamente convocadas por organizacións sindicais legalmente constituidas ou ben organizar convocatorias de folga de ámbito interno no centro.

  5. Cada alumno ten o dereito de asistir normalmente á clase no caso de non secundar individualmente a folga, ainda que fose secundada polo seu grupo ou polo alumnado do centro no seu conxunto.

  6. Cada alumno ten o dereito de secundar individualmente a folga no caso de que o seu grupo ou o alumnado do centro no seu conxunto acordase non secundala.

  7. Os alumnos participantes na folga só poderán utilizar as instalacións do centro para a realización de asambleas, previamente solicitadas e concedidas pola Dirección.

  8. Os alumnos en folga que permanezan no centro estarán sometidos á disciplina habitual do mesmo. En ningún caso se permitirá que a actuación dos alumnos en folga entorpeza o normal desenvolvemento das actividades do centro.

  9. A inasistencia á clase do alumnado durante a folga considerarase unha falta xustificada a todos os efectos.

  10. Os alumnos que falten a un exame por estaren participando na folga, teñen dereito a que se lles realice o exame outro día.

  11. Non terán consideración de folga, e polo tanto non estará amparada polo presente regulamento, o abandono colectivo da aula por un grupo de alumnos. Tales conductas serán consideradas como faltas contrarias ás normas de convivencia.

  12. Os alumnos teñen os dereitos anteriormente enumerados cando a súa participación na folga se formalice correctamente en tempo e forma, de acordo co procedemento e protocolo establecido nestas normas (Vid. Protocolo folga alumnado)

(Véxase tamén o arquivo adxunto protocolo folga alumnado)

(Actualizado o 25/10/2016)

 

Distribuir contido


by Dr. Radut