Blogue

  O día 19 de febreiro, os alumnos de 1º e 2º de ESO fixeron unha saída didáctica a Santiago de Compostela. O noso primeiro destino foi o Museo Pedagóxico de Galicia, onde puidemos coñecer mellor o pasado das nosas escolas e aprender, por exemplo, que era unha escola "de ferrado", que diferenzas existían entre as aulas da II República e as da Ditadura ou con que xoguetes se divertían os nosos avós.

  Despois visitamos, no Museo Centro Gaiás, a exposición titulada Castelao Maxistral, centrada na vida e obra dun dos nosos escritores máis importantes. Alí puidemos contemplar o seu cadro A última leición do mestre, considerado o "Guernica galego". Pintado en Arxentina en 1945 en recordo do seu amigo Alexandre Bóveda, esta obra é propiedade do Centro Galego de Bos Aires, cidade da que saíu por primeira vez na súa historia para formar parte desta exposición temporal.

   O día 8 de febreiro, os alumnos de 4º de ESO asitiron na Casa da Cultura de Cee ao espectáculo Language Planning, a cargo da compañía Os Quinquilláns. Baseada en relatos da obra Made in Galiza, de Séchu Sende, esta montaxe teatral pretende propiciar, desde a risa e a retranca, a reflexión sobre a situación de conflito lingüístico na que se atopan as dúas linguas cooficiais da nosa comunidade.

   Neste segundo trimestre do curso 2018-2019, o EDLG ten prevista a realización das seguintes actividades:

VISITA AO CASTELO DE VIMIANZO

   En colaboración co Departamento de Lingua Castelá e o de Ciencias Sociais, aproveitaremos a asistencia a unha obra de teatro en Vimianzo o 31 de xaneiro para facer unha visita guiada ao seu castelo. Os destinatarios serán os alumnos de 3º e 4º de ESO.

OBRA DE TEATRO MADE IN GALIZA

  O 8 de febreiro poderemos desfrutar da adaptación teatral que o grupo Os Quinquilláns farán de Made in Galiza, un libro de relatos de Séchu Sende. Será na Casa da Cultura de Cee. 

VISITA AO MUPEGA E Á EXPOSICIÓN "CASTELAO MAXISTRAL"

   En colaboración co Departamento de Ciencias Sociais, o día 19 de febreiro farase unha saída a Santiago de Compostela con alumnos de 1º e 2º da ESO para visitar o Museo Pedagóxico de Galicia e o Museo Centro Gaiás, sede da exposición "Castelao Maxistral".

VISITA ÁS TORRES DO ALLO (ZAS) E AOS FAROS

   De novo en colaboración co Departamento de Ciencias Sociais, realizaremos unha visita ao considerado como o primeiro pazo de Galicia e participaremos no seu obradoiro "Escudo de familia". Aproveitaremos tamén esta saída para coñecer mellor dous dos faros da nosa contorna, o de Punta Nariga (Malpica) e o de Cabo Vilán (Camariñas). Os destinatarios serán os alumnos de 3º e 4º de ESO e levarase a cabo o 22 de febreiro.

Un novo ano, a Biblioteca, o Departamento de Lingua Galega e o EDLG organizan un concurso de cartas  de amor con motivo de San Valentín!

Haberá dúas categorías:

CATEGORÍA A: 1º e 2º de ESO.

 CATEGORÍA B: 3º e 4º de ESO.

BASES:

- Escribe unha carta de amor (tamén pode ser de desamor!), ORIXINAL e INÉDITA.

- O texto deberá estar escrito en LINGUA GALEGA e  ser respectuoso no seu contido e na súa presentación.

- Non se admitirán os textos con erros ortográficos.

- Poderase escribir a carta á man (con boa caligrafía) ou ben empregar un procesador de textos.

- IMPORTANTE!!! O nome do autor non poderá aparecer no texto, empregarase no seu lugar un pseudónimo para asinalo. Os datos básicos do participante (nome, curso e pseudónimo empregado) irán nun sobre pequeno e pechado que se introducirá xunto coa carta nun sobre máis grande. No exterior deste sobre grande só deberá aparecer escrita a categoría pola que se presenta.

PRESENTACIÓN:

- Prazo límite de entrega: 8 DE FEBREIRO.

- Lugar: A Biblioteca (serán depositadas na caixa destinada a concursos).

PREMIOS:

CATEGORÍA A

1º premio: obsequio por valor de 8 euros.

2º premio: vale de 4 euros para a cafetaría.

CATEGORÍA B

1º premio: obsequio por valor de 8 euros.

2º premio: vale de 4 euros para a cafetaría.

BASES DO CONCURSO

• Poderán participar todos os alumnos do centro que o desexen.

• A participación é individual e as postais deberán ser orixinais. Só se poderá presentar unha postal por alumno.

• O traballo presentarase en cartolina de tamaño DIN A5 210X148 mm (medio folio). A técnica é libre: cor, branco e negro, collage, ceras... Non se poderán utilizar purpurinas.

• Deberá incluír algún desexo ou algunha mensaxe para o ano 2019 en lingua galega.

• ENTREGA DOS TRABALLOS. Os datos do alumno participante (nome e curso) NON irán na postal, senón nun sobre pechado que se pegará no reverso da mesma con celo. Ese sobre cos datos persoais máis a postal (que debe ser totalmente ANÓNIMA) serán depositados na caixa habilitada para este concurso na Biblioteca.

• Un xurado formado por profesorado do centro elixirá as tres postais premiadas. Valorarase tanto o deseño da postal como a mensaxe.

• A participación no concurso supón a aceptación destas bases.

PREMIOS

• Haberá tres premios:

• Primeiro: vale desconto de 10 € para gastar na cafetería do centro (ou un agasallo de valor equivalente) e o feito de que a súa postal sexa empregada para felicitar as festas desde a páxina web do instituto.

• Segundo: vale desconto de 7 € para a cafetería.

• Terceiro: vale desconto de 5 € para a cafetería.

PRAZO DE PRESENTACIÓN

• O prazo de presentación iníciase dende a publicación das bases, o día 23 de novembro de 2018, ata o día 17 de decembro de 2018.

RECORDA: A POSTAL DEBE SER ANÓNIMA