IES Pazo da Mercé

Este ano a celebración do Magosto fíxose esperar porque a chuvia non nos daba un descanso. Aínda así, logramos facernos cunhas castañas comestibles que nos alegraron a mañá. O noso castañeiro particular, o profesor Calía, ocupouse da elaboración mentres a rapazada do centro participaba na celebración das cucañas.

Para conseguir gañar os dous premios do Concurso de cucañas o alumnado, dividido en grupos mixtos de 5 persoas, debía de superar no mínimo tempo posible 11 probas. Os desafíos que se lle propuxeron eran do máis variado: dicir un trabalinguas cun polvorón na boca, elaborar un rap, subir por parellas a escaleira central aguantando unha pataca na fronte, resolver enigmas... Ademais, a xornada foi amenizada polas cantareiras que temos no IES. En definitiva, pasamos unha mañá agradable e divertida.

O mércores 20 de novembro celebramos no IES o Día Internacional da memoria Trans dedicado a aquelas persoas que foron asasinadas ou vítimas de abuso físico ou psicolóxico só pola súa identidade.

 Na semana do luns 11 ao venres 15 deste mes de novembro temos no noso Instituto, en Usos Múltiples, a exposición “Reixas. Mulleres baixo o terror franquista”. Son seis paneis dobres que recollen, a través de 78 fotografías e a historia de 172 mulleres, as terribles consecuencias do Golpe de Estado franquista do 36 sobre as mulleres na provincia de Pontevedra. A exposición está artellada a partir de tres grandes eixes: contextualización histórica (os logros da II República), represión en todas as modalidades da ditadura franquista contra as mulleres, e recoñecemento do labor solidario e resistente das mulleres.